ភ្នំពេញៈ អគ្គិសនីកម្ពុជា (EDC) បានប្រកាសដាក់ឲ្យមានការដេញថ្លៃជាសាធារណៈក្នុងការទទួលសិទ្ធិវិនិយោគគម្រោងសាងសង់កសិដ្ឋានផលិតថាមពលដើរដោយផ្ទាំងសូឡានៅខេត្តកំពង់ឆ្នាំង ដែលមានអនុភាពផលិតថាមពល ៦០ មេហ្កាវ៉ាត់។
គម្រោងនេះនឹងស្ថិតក្នុងទម្រង់ សាងសង់ ធ្វើជាម្ចាស់ និងដំណើរការ (BOO) ដែលជាផ្នែកមួយនៃគម្រោងសាងសង់ ឧទ្យានជាតិថាមពលសូឡា នៅខេត្តកំពង់ឆ្នាំង ដែលត្រូវបានគាំទ្រផ្នែកបច្ចេកទេសដោយធនាគារអភិវឌ្ឍន៍អាស៊ី (ADB)។ ថាមពលដែលផលិតចេញពីគម្រោងនេះនឹងត្រូវភ្ជាប់មកបណ្តាញជាតិរបស់អគ្គិសនីកម្ពុជា។
យោងតាមសេចក្តីជូនដំណឹងស្តីពីការបើកទទួលពាក្យដេញថ្លៃរបស់ EDC ដែលមានហត្ថលេខារបស់លោកអគ្គនាយកអគ្គិសនីកម្ពុជា កែវ រតនៈ ក្រុមហ៊ុនដែលទទួលបានជោគជ័យពីការដេញថ្លៃនេះនឹងតម្រូវឲ្យធ្វើការអភិវឌ្ឍ ដាក់ទុនវិនិយោគ សាងសង់ និងដំណើរការគម្រោងថាមពលសូឡា ៦០ មេហ្កាវ៉ាត់នេះ។ EDC នឹងធានាទិញថាមពលដែលបានពីគម្រោងនេះក្រោមកិច្ចព្រមព្រៀងទិញថាមពលរយៈពេលវែង (PPA)។
លិខិតជូនដំណឹងរបស់ EDC លើកឡើងថា៖ «តម្លៃលក់អគ្គិសនីដែលស្នើដោយអ្នកវិនិយោគចាំបាច់ត្រូវទាបជាង ០,០៧៦ ដុល្លារ (៧,៦ សេន) ក្នុង ១ គីឡូវ៉ាត់ម៉ោង ហើយត្រូវធ្វើការកែសម្រួលបន្តបន្ទាប់យោងតាមកិច្ចព្រមព្រៀងទិញថាមពលរយៈពេលវែង (PPA)»។
ការកំណត់ពេលវេលាសម្រាប់ការដាក់ឯកសារដេញថ្លៃសម្រាប់ការអភិវឌ្ឍគម្រោងនេះ នឹងមិនឲ្យយឺតជាងម៉ោង ១០ ព្រឹក នៅថ្ងៃទី ១៧ ខែឧសភាទេ។ EDC រំពឹងថា គម្រោងនេះនឹងជួយកម្ពុជាក្នុងការពង្រីកការផលិតថាមពលតម្លៃទាប និងធ្វើពិពិធកម្មការផលិតថាមពល រួមជាមួយការបង្កើនភាគរយនៃថាមពលស្អាត។
កសិដ្ឋានផលិតថាមពលដំណើរការដោយសូឡាថ្នាក់ជាតិនឹងក្លាយជាគម្រោងទី៣របស់កម្ពុជាសម្រាប់ថាមពលសូឡាដែលសម្រេចបាន។ រហូតមកដល់ពេលនេះ កម្ពុជា មានកសិដ្ឋានសូឡាដំណើរការតែ ១ គត់ ជាគម្រោង ១០ មេហ្គាវ៉ាត់ដោយក្រុមហ៊ុន Sunseap របស់ប្រទេស សិង្ហបុរី នៅក្រុងបាវិត ជាតំបន់សេដ្ឋកិច្ចពិសេសរបស់កម្ពុជានៅខេត្តស្វាយរៀង នៅជិតព្រំដែនប្រទេស វៀតណាម។
SchneiTec Group ជាក្រុមហ៊ុនវិនិយោគមួយរវាងក្រុមវិនិយោគិនក្នុងស្រុក និង ចិន កំពុងដំឡើងបន្ទះសូឡា នៅក្នុងកសិដ្ឋានរបស់ខ្លួននៅខេត្តកំពង់ស្ពឺ ដើម្បីបង្កើតរោងចក្រសូឡា ៦០ មេហ្គាវ៉ាត់។ រោងចក្រនេះត្រូវបានរំពឹងថា នឹងចាប់ផ្ដើមដំណើរការនៅចុងឆ្នាំ ២០១៩ នេះ។
លោក Victor Jona អ្នកនាំពាក្យក្រសួងរ៉ែ និងថាមពល បានឲ្យដឹងថា វាជាគោលនយោបាយរបស់រដ្ឋាភិបាល ដែលកំណត់ទិសដៅក្នុងការផ្ដល់អគ្គិសនីតម្លៃទាបដល់អតិថិជន និងមានប្រភពថាមពលកាន់តែច្រើនក្នុងការតភ្ជាប់អគ្គិសនីជាតិនឹងរួមចំណែកក្នុងការបំពេញផែនការរបស់រដ្ឋាភិបាល។ លោកបានបន្ថែមថា ក្រុមហ៊ុន SchneiTec ត្រូវបានផ្ដល់សិទិ្ធសាងសង់រោងចក្រសូឡា នៅខេត្តកំពង់ស្ពឺ ខណៈក្រុមហ៊ុននេះស្នើតម្លៃក្នុងចំនួន ៧,៦ ភាគរយក្នុង ១ គីឡូវ៉ាត់ម៉ោង។
លោកថ្លែងថា៖ «ក្រុមហ៊ុនដែលទទួលសិទ្ធិវិនិយោគនេះ នឹងអាស្រ័យលើការប្រកួតប្រជែងដេញថ្លៃ។ ប្រសិនបើលក្ខខណ្ឌបច្ចេកទេសរបស់គាត់គ្រប់គ្រាន់ទៅនឹងការតម្រូវនៃការដេញថ្លៃ ហើយអាចផ្តល់តម្លៃទាបមក EDC ជាងអ្នកចូលរួមដេញថ្លៃផ្សេងទៀត ក្រុមហ៊ុននឹងឈ្នះការដេញថ្លៃនេះ»។
របាយការណ៍ប្រចាំឆ្នាំ ២០១៨ របស់អាជ្ញាធរអគ្គិសនីកម្ពុជា បានបង្ហាញថា ការចែករំលែកការផ្គត់ផ្គង់ថាមពលកកើតឡើងវិញនៅកម្ពុជានៅតែមានចំនួនតិចបំផុត។
របាយការណ៍បានបង្ហាញថា តម្រូវការថាមពលរបស់កម្ពុជា បច្ចុប្បន្នត្រូវបានផ្គត់ផ្គង់ភាគច្រើនដោយរោងចក្រវារីអគ្គិសនី ប្រហែល ៤៨ ភាគរយ និងរោងចក្រថាមពលដំណើរការដោយធ្យូងថ្ម ដែលមានចំនួនប្រហែល ៣៤,៥ ភាគរយ។ នៅសល់ប្រហែល ១៥ ភាគរយ គឺជាថាមពលនាំចូលពីប្រទេសជិតខាង៕LA