.jpg)
ប្លង់នៃគម្រោងអភិវឌ្ឍន៍កោះប្រើស។ FN
ព្រះសីហនុៈ គម្រោងវិនិយោគកោះប្រើសនៅខេត្តព្រះសីហនុដែលមានតម្លៃជិត ៣០ លានដុល្លារ សម្រេចបានជាង ៣០ ភាគរយ ហើយនៅក្នុងដំណាក់កាលទី ១។ នេះបើតាមតំណាងផ្នែកសាងសង់របស់ក្រុមហ៊ុន។
កោះប្រើសដែលមានចម្ងាយប្រមាណ ២ គីឡូម៉ែត្រ ពីឆ្នេរអូរត្រេះត្រូវបានរដ្ឋាភិបាលប្រគល់ឲ្យក្រុមហ៊ុនក្នុងស្រុក Angela Real Estate Co., Ltd វិនិយោគរយៈពេល ៩៩ ឆ្នាំ ចាប់តាំងពីឆ្នាំ ២០០៨។ នេះបើយោងតាមលោក ឃាង ភារម្យ អ្នកនាំពាក្យសាលាខេត្តព្រះសីហនុ។
លោកថ្លែងថា៖ «ក្រុមហ៊ុន ARE ដែលមានម្ចាស់គ្រប់គ្រងជាជនជាតិខ្មែរបានវិនិយោគលើការសាងសង់សណ្ឋាគារផ្កាយ ៥ កាស៊ីណូ ភូមិគ្រឹះ និងសំណង់ផ្សេងៗទៀតនៅលើកោះប្រើស»។
កោះប្រើសមានផ្ទៃដីសរុប ៥៦,២៨ ហិកតា ស្ថិតនៅឃុំរាម ស្រុកព្រៃនប់ ខេត្តព្រះសីហនុ។ លោក ឃាង ភារម្យ បានឲ្យដឹងថាក្រុមហ៊ុន Angela Real Estate Co., Ltd បានចុះកិច្ចព្រមព្រៀងវិនិយោគជាមួយរដ្ឋាភិបាលកាលពីថ្ងៃទី ១៨ ខែ មករា ឆ្នាំ ២០០៨។
លោកបន្តថា៖ «ការវិនិយោគនេះពិតជាអាចនឹងជួយឲ្យមានកំណើនសេដ្ឋកិច្ចជាតិតាមរយៈការបង្កើតការងារ ការអភិវឌ្ឍតំបន់ទេសចរណ៍ក្នុងខេត្តព្រះសីហនុសម្រាប់ទាក់ទាញភ្ញៀវទេសចរ និងអ្នកវិនិយោគ»។
លោក ហេង ធូ អ្នកគ្រប់ការដ្ឋានសាងសង់របស់ក្រុមហ៊ុនអចលនទ្រព្យ ARE បានឲ្យដឹងថាបច្ចុប្បន្នគម្រោងនេះកំពុងដំណើរការសាងសង់សណ្ឋាគារលំដាប់ផ្កាយ ៥ ដែលមាន ៣០ បន្ទប់។ លោកថ្លែងថា៖ «នៅដំណាក់កាលដំបូងបានសាងសង់បានប្រមាណ ៣០ ភាគរយហើយ»។
លោកបន្តថាគម្រោងដំណាក់កាលទី ២ នឹងសាងសង់បាងហ្គាឡូ ខណៈដំណាក់កាលទី ៣ នឹងសាងសង់ក្លិប ភោជនីយដ្ឋាន កន្លែងជិះកង់ និងកន្លែងកម្សាន្តផ្សេងទៀត។
ទោះបីយ៉ាងណាក្តីលោកមិនអាចបញ្ជាក់ថាគម្រោងនេះនឹងសាងសង់រួចរាល់នៅពេលណានោះទេ។
បើតាមលោក ភារម្យ ក្នុងខេត្តព្រះសីហនុមានកោះសរុប ៣២ កោះក្នុងនោះកោះសង្សារ កោះក្របី និងកោះឫស្សី កំពុងដំណើរអាជីវកម្ម។
ក្រុមហ៊ុន Angela Real Estate Co., Ltd ត្រូវបានចុះបញ្ជីជាក្រុមហ៊ុនក្នុងស្រុកនៅក្រសួងពាណិជ្ជកម្មដែលបានដាក់ឈ្មោះ លី សុខ ជាប្រធាន។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បើទោះបីជាភ្ញៀវទេសចរទៅលេងកម្សាន្តនៅតាមតំបន់ឆ្នេរក្នុងខេត្តព្រះសីហនុមានការថយចុះដោយសារលំហូរចូលនៃជនជាតិចិន ប៉ុន្តែភ្ញៀវទេសចរទៅកម្សាន្តនៅតាមបណ្តាកោះនានានៅខេត្តព្រះសីហនុមានការកើនឡើង។
លោក ធួន ស៊ីណាន បានបន្តថា៖ «កន្លែងដែលទាក់ទាញភ្ញៀវខ្លាំងគឺមានតែតាមបណ្តាកោះនៅខេត្តព្រះសីហនុទេ ព្រោះភ្ញៀវភាគច្រើនចូលចិត្តលេងនៅសមុទ្រ»។
លោកបានឲ្យដឹងថា ការវិនិយោគនេះនឹងជួយឲ្យទាក់ទាញភ្ញៀវទេសចរបន្ថែមទៀតទៅកាន់ខេត្តព្រះសីហនុ។ លោកបានថ្លែងថា៖ «ការវិនិយោគនេះនឹងជួយបង្កើតការងារឲ្យប្រជាជននៅទីនោះ និងបានរួមចំណែកកសាងហេដ្ឋារចនាសម្ព័ន្ធក្នុងវិស័យទេសចរណ៍របស់កម្ពុជា»៕ AFP/LA
