The Phnom Penh Post Search

Search form




Logo of Phnom Penh Post newspaper Phnom Penh Post - គម្រោង​វិនិយោគ​បាន​កើន​ឡើង ២០០%

គម្រោង​វិនិយោគ​បាន​កើន​ឡើង ២០០%

គម្រោង​វិនិយោគ​បាន​កើន​ឡើង ២០០%

131001_11
សកម្មភាពនៃការសាងសង់អគារផ្សារទំនើប អុីអន ដែលមានទីតាំងនៅតាមបណ្តោយវិថីសុធារស ក្បែរស្ថានទូតរុស្ស៊ី ហុង មិនា

ភ្នំពេញៈ គម្រោង​វិនិយោគ​ដែល​ត្រូវ​បាន​អនុម័ត​នៅ​ឆមាស ទី១ ឆ្នាំ​នេះ​បាន​កើន​ឡើង​ជាង ២០០ ភាគរយ​បើ​ធៀប​រយៈ​ពេល​ដូច​គ្នា​កាល​ពី​ឆ្នាំ ២០១២។

ទិន្នន័យ​ផ្លូវ​ការ​បាន​ពី​ក្រសួង សេដ្ឋកិច្ច និង​ហិរញ្ញវត្ថុ​បង្ហាញ​ថា វិនិយោគ​បាន​កើន​ឡើង​ពី ៦៩២ លាន​ដុល្លារ​រហូត​ដល់​ជាង ២,៣១ ពាន់​លាន​ដុល្លារ។ ទិន្នន័យ​ដដែល​បង្ហាញ​ថា រដ្ឋាភិបាល​បាន​យល់​ព្រម​លើ​គម្រោង​វិនិយោគ ៦៨ ក្នុង​នោះ​វិស័យ កាត់ដេរ​និង​វាយនភ័ណ្ឌ​មាន ៣៦ គម្រោង​មាន​តម្លៃ​ជាង ២០០ លាន ដុល្លារ និង​វិស័យ​ឧស្សាហកម្ម​ផ្សេង​ទៀត​មាន ៣២ គម្រោង ដែល​ក្នុង​នោះ​គម្រោង​វិនិយោគ​លើ​វិស័យ​សំណង់​បាន​កើន​ឡើង​ជិត ២ ពាន់​លាន​ដុល្លារ។

លោក Hiroshi Suzuki អគ្គ​នាយក​និង​ជា​ប្រធាន​សេដ្ឋវិទូ​នៅ​វិទ្យាស្ថាន ស្រាវជ្រាវ​ពាណិជ្ជកម្ម​កម្ពុជា​បាន​ឲ្យ​ដឹង​ថា មាន​ការ​ផ្លាស់​ប្តូរ​និន្នាការ​ពី​ការ​វិនិយោគ​ធុន​តូច​ទៅ​ធុន​ធំ ក្នុង​អំឡុង​ពេល​ដែល​មាន​ការ​កើន​ឡើង​ខ្លាំង​នេះ។

លោក​បន្ថែម​ថា ស្ថិរភាព​សេដ្ឋកិច្ច​នៅ​អាមេរិក និង​សហភាព​អឺរ៉ុប​ដែល​ជា​ទីផ្សារ​សម្រាប់​ឧស្សាហកម្ម​នាំ​ចេញ​ដូចជា​វិស័យ​កាត់ដេរ​គឺ​កំពុង​ទទួល​បាន​ការ​កើន​ឡើង។

លោក​លើក​ឡើង​ថា ៖ «ដូច​ដែល​អ្នក​បាន​ឃើញ ចំនួន​គម្រោង​ដែល​បាន​អនុម័ត​អាច​មាន​ការ​ប្រែ​ប្រួល​តិចតួច។ ខ្ញុំ​គិត​ថា វិស័យ​ឧស្សាហកម្ម​វិស័យ​សំណង់​អាច​ត្រូវ​បាន​ដាក់​បញ្ចូល។ យើង​អាច​ស្វែង​រក​គម្រោង​សាង​សង់​ធំៗ​មួយ​ចំនួន​ដូចជា គម្រោង Landmark គម្រោង Parkson និង​គម្រោង Booyong ជាដើម​»។

លោក​បញ្ជាក់​ថា៖ «កម្ពុជា​មាន​សក្ដានុពល​ដ៏​ល្អ​ក្នុង​ការ​ទាក់​ទាញ​ឧស្សាហកម្ម ប្រើ​ប្រាស់​កម្លាំង​ពលកម្ម​ច្រើន​មិន​គ្រាន់​តែ​វិស័យ​កាត់ដេរ និង​ស្បែក​ជើង​ប៉ុណ្ណោះ​ទេ ប៉ុន្តែ​ថែម​ទាំង​ផលិតផល​គ្រឿង​បន្លាស់​ផង​ដែរ។ ការ​កើន​ឡើង​មនុស្ស​ថ្នាក់​កណ្ដាល​នៅ​កម្ពុជា​កំពុង​ទាក់ទាញ​វិស័យ​សេវាកម្ម​ក្រុមហ៊ុន​លក់​ទំនិញ​រាយ និង​វិស័យ​គ្រឿង​សម្អាង»។

លោក ងួន ម៉េងតិច អគ្គ​នាយក​សភា​ពាណិជ្ជកម្ម​កម្ពុជា​និយាយ​ថា កម្ពុជា​នៅ​តែ​ទទួល​បាន​លំហូរ វិនិយោគ​ទាំង​ក្នុង​និង​ក្រៅ​ប្រទេស​យ៉ាង​ច្រើន ទោះ​បី​មាន​ការ​បោះឆ្នោត​នៅ​ក្នុង​ឆ្នាំ​នេះ​ក៏​ដោយ​។

លោក​បន្ត​ថា៖ «ពិត​ហើយ​ខ្ញុំ​បាន​កត់​សម្គាល់​ថា​យើង​មាន​សក្ដានុពល​ដ៏​ធំ​ក្នុង​ការ ទាក់​ទាញ​ការ​វិនិយោគ​កាន់​តែ​ច្រើន មុន​ពេល​ការ​បោះឆ្នោត ជា​ពិសេស​លើ​វិស័យ​កាត់ដេរ វិស័យ​សំណង់ និង​វិស័យ​កសិកម្ម»។ ប៉ុន្តែ​លោក​អះអាង​ថា រាល់​ការ​វិនិយោគ​ដែល​ត្រូវ​បាន​អនុម័ត​គ្រាន់​តែ​គម្រោង​ដែល​អាច​កើន​ឡើង និង​មិន​អាច​កើន​ឡើង៖ «ជាមួយ​នឹង​ការ​យល់​ព្រម​នេះ យើង​មិន​មាន​ការ​ជឿជាក់​ថា​តើ​វា​នឹង​អាច​សម្រេច​បាន​ឬ​អត់​ទេ ខណៈ​ស្ថានការណ៍​នយោបាយ​នៅ​មិន​ល្អ»។

កាល ពី​ខែ​មុន​ក្រុមហ៊ុន Hong Kong Land បាន​ចាប់​ផ្តើម​សាង​សង់​អគារ​មាន​កម្ពស់ ២០ ជាន់​មាន​តម្លៃ ១០០ លាន ដុល្លារ ហើយ​ក្រុមហ៊ុន Booyoung Group មាន​មូលដ្ឋាន​នៅ​កូរ៉េ​ខាង​ត្បូង​បាន​ចាប់​ផ្ដើម​សាង​សង់​ទីក្រុង ថ្មី​មួយ​មាន​តម្លៃ​ជាង ១,១ ពាន់​លាន​ដុល្លារ​នៅ​តាម​មហាវិថី សហព័ន្ធ រុស្ស៊ី ខាង​លិច​ស្ពាន​អាកាស ៧ មករា ពី​ខែ មេសា។

តាម​ការ​ព្យាករ​របស់​រដ្ឋាភិបាល​ផលិតផល​ក្នុង​ស្រុក​សរុប​សម្រាប់​មនុស្ស​ម្នាក់ៗ​របស់​កម្ពុជា​ត្រូវ​បាន​ព្យាករ​ថា​នឹង​កើន​ឡើង​ដល់ ១០៣៦ ដុល្លារ​នៅ​ឆ្នាំ ២០១៣ ដែល​កើន​ឡើង​ពី​ជិត ១០០០ ដុល្លារ​ពី​ឆ្នាំ​មុន។ សេដ្ឋកិច្ច​ត្រូវ​បាន​រំពឹង​ថា​នឹង​កើន​ឡើង ៧,៦ ភាគរយ​ឬ ១៥,១៩ ពាន់​លាន​ដុល្លារ​នៅ​ឆ្នាំ​នេះ៕PB

អត្ថបទគួរចាប់អារម្មណ៍