ភ្នំពេញៈ គម្រោង Naga 3 ដែលមានទីតាំងនៅអតីតអគារ ប៊ុលឌីង គ្រោងនឹងចាប់ផ្ដើមការសាងសង់នៅចុងខែកញ្ញា ឬដើមខែតុលាឆ្នាំ ២០១៩។ នេះបើយោងតាមលោក Tim McNally ដែលបានប្រាប់គេហទំព័រ Inside Asian Gaming។
យោងតាមគេហទំព័រនេះលោក Tim McNally ប្រធានក្រុមហ៊ុន Naga Corp បានឲ្យដឹងថា ក្រុមហ៊ុនបានធ្វើបច្ចុប្បន្នភាពស្ដីពីពេលវេលាក្នុងការចាប់ផ្ដើមការសាងសង់នៅចុងខែកញ្ញាដោយរង់ចាំការអនុម័តចុងក្រោយនៅក្នុងកិច្ចប្រជុំវិសាមញ្ញ។ លោកថ្លែងថា៖ «យើងមានកិច្ចប្រជុំកាលពីថ្ងៃទី ៨ ខែសីហាក្នុងការសង្ខេប និងការទទួលការយល់ព្រមពីភាគទុនិកភាគតិចរបស់យើង ចាប់ពីនោះមកយើងសង្ឃឹមថា នឹងចាប់ផ្ដើមការសាងសង់នៅចុងខែកញ្ញា ឬដើមខែតុលា»។
លោក McNally បានប្រាប់ថា ក្រុមហ៊ុនបានគ្រោងបង្កើនការចំណាយ ៣,៥ ពាន់លានដុល្លារ សម្រាប់ការធ្វើសមាហរណកម្ម Naga នៅកម្ពុជា និងការបង្កើតស្ដង់ដារបស់ខ្លួន ដើម្បីប្រកួតប្រជែងជាមួយម៉ាកាវ។
លោកបានប្រាប់ Inside Asian Gaming ថា គំរូមូលនិធិដែលស្នើឡើងដែលក្នុងនោះ ៥០ ភាគរយផ្សេងទៀត នឹងត្រូវបានរួមចំណែក NagaCorp ដោយខ្លួនឯងត្រូវបានចាត់ទុកជាជម្រើសល្អបំផុតក្នុងការបម្រើភាគទុនិកទាំងអស់។
លោកថ្លែងថា៖ «យើងគិតថា នោះគឺល្អបំផុតដោយមិនកាត់បន្ថយអត្ថប្រយោជន៍របស់ភាគទុនិកភាគតិចរបស់យើង ដូច្នេះយើងអាចបន្តការអនុវត្តភាគលាភរបស់យើង និងគោលនយោបាយ ហើយក៏កាត់បន្ថយហានិភ័យរបស់យើងផងដែរ»។
ក្រុមហ៊ុន Naga Corp Ltd ដែលគ្រប់គ្រង NagaWorld ជាកាស៊ីណូមានអាជ្ញាប័ណ្ណតែមួយគត់នៅទីក្រុងភ្នំពេញបានប្រកាសទឹកប្រាក់ ៣,៥ ពាន់លានដុល្លារ ទៅ ៤ ពាន់លានដុល្លារ សម្រាប់គម្រោង Naga 3 នៅទីតាំងអតីត «អគារប៊ុលង» នៅក្នុងសង្កាត់ទន្លេបាសាក់កាលពីខែមេសា។
ក្រុមហ៊ុននេះបានទទួលបានអនុម័តជាគោលការណ៍ពីរដ្ឋាភិបាលក្នុងការសាងសង់អគារចំនួន ៥ ប្លុកដែលមានកម្ពស់ ៦៦ ជាន់ លើផ្ទៃដីសរុប ១៦ ៨៣៧ ម៉ែត្រការ៉េ រួមមានកន្លែងកម្សាន្ត សណ្ឋាគារ ដែលមានចំនួន ៤ ៧២០ បន្ទប់ និងអាផាតមិនផងដែរ។
លោក ម៉ី វ៉ាន់ អគ្គនាយកនៃអគ្គនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុបានប្រាប់ភ្នំពេញ ប៉ុស្តិ៍ពីថ្ងៃអាទិត្យថា៖ «Naga 3 ទទួលបានការឯកភាពពីរដ្ឋាភិបាលហើយឥឡូវគាត់ទទួលបានអាជ្ញាប័ណ្ណសាងសង់ ដូច្នេះអាជ្ញាប័ណ្ណប្រតិបត្តិការនឹងផ្តល់ជូននៅពេលការសាងសង់រួចរាល់ហើយដាក់ដំណើរការសម្រាប់កាស៊ីណូ»។
កាស៊ីណូ NagaWorld បានបង្ហាញកំណើនប្រាក់ចំណូលលេងហ្គេមដុល (GGR) ចំនួន ២២ ភាគរយរហូតដល់ ៨៧២,៤ លានដុល្លារអាមេរិក ក្នុងអំឡុងពេល ៦ ខែដំបូងឆ្នាំនេះ ជាមួយនឹងកំណើនប្រាក់ចំណេញ ៣៦ ភាគរយ ដល់ ២៤៥,១ លានដុល្លារ ក្នុងអំឡុងពេលនេះ។ នេះបើយោងតាមសេចក្ដីប្រកាសព័ត៌មានរបស់ក្រុមហ៊ុន។
ជាមួយនឹងការព្យាករនាពេលថ្មីៗនេះរបស់ក្រសួងទេសចរណ៍ថា កម្ពុជាពិតជាត្រូវការបន្ទប់សណ្ឋាគារចំនួន ១០០ ០០០ បន្ថែមទៀត ដើម្បីតាមឲ្យទាន់កំណើនទេសចរ និងតម្រូវការ។ លោក McNally បានឲ្យដឹងថា ការរួមចំណែកពីក្រុមហ៊ុននេះនឹងមានសារៈសំខាន់។
លោកថ្លែងថា៖ «យើងមានអាជ្ញាប័ណ្ណផ្ដាច់មុខរហូតដល់ឆ្នាំ ២០៣៥ ហើយយើងចង់ពន្យារពេលអាជ្ញាប័ណ្ណនោះឲ្យកាន់តែយូរ។ យើងមានទំនុកចិត្តច្រើន»៕LA