ភ្នំពេញៈ អគ្គនាយកដ្ឋានគយ និងរដ្ឋាករ (GDCE) បានដាក់ចេញនូវវិធានការចាំបាច់មួយចំនួន ដើម្បីឆ្លើយតបជាបន្ទាន់ចំពោះការខ្វះខាតវត្ថុធាតុដើមនៅក្នុងឧស្សាហកម្មកាត់ដេរ និងស្បែកជើងនៅកម្ពុជាដែលរំខានដោយវីរុស ខូវិដ-១៩។ នេះបើតាមសេចក្ដីប្រកាសព័ត៌មានកាលពីថ្ងៃសុក្រ។
វិធានការនេះធ្វើឡើងបន្ទាប់ពីលោកនាយករដ្ឋមន្ដ្រី ហ៊ុន សែន បានបង្ហាញគោលនយោបាយដើម្បីគាំទ្រវិស័យកាត់ដេរ និងទេសចរណ៍ដែលនឹងរងផលប៉ះពាល់ដោយការដកមួយផ្នែកនៃប្រព័ន្ធអនុគ្រោះពន្ធ EBA របស់សហភាពអឺរ៉ុប និងការរីករាលដាលនៃវីរុសខូវិដ-១៩។
វិធានការដែលបានដាក់ចេញនោះមានដូចជា អនុញ្ញាតឲ្យក្រុមហ៊ុនដែលមានលក្ខណសម្បត្តិគ្រប់គ្រាន់អនុវត្តនីតិវិធី បែបបទគយនៅមុនទំនិញមកដល់ ដោយមិនតម្រូវឲ្យបំពេញលក្ខខណ្ឌនានាដែលមានចែងក្នុងចំណុច ៣ របស់គយឡើយ ការផ្តល់អាទិភាពដល់ទំនិញបម្រើឲ្យឧស្សាហកម្មកាត់ដេរ និងការសម្រួលឲ្យបានឆាប់ជាអតិបរមាក្នុងការចេញលិខិតអនុញ្ញាតគយ និងនីតិវិធីដឹកជញ្ជូនទំនិញមកតំបន់សេដ្ឋកិច្ចពិសេស។ សេចក្តីប្រកាសព័ត៌មានបានឲ្យដឹងថា ត្រូវរាយការណ៍បន្ទាន់នូវរាល់បញ្ហាដែលនាំឲ្យមានភាពយឺតយ៉ាវ និងកកស្ទះជាយថាហេតុនៃការបញ្ជូនទំនិញ។
សេចក្ដីប្រកាសនេះបន្តថា៖ «យើងចង់ជូនដំណឹងដល់មន្ដ្រីគយ និងរដ្ឋាករទាំងអស់ថា ដើម្បីធ្វើឲ្យមានប្រសិទ្ធភាពក្នុងការអនុវត្ត និងការជួយសម្រួលលើនីតិវិធីក្រដាសស្នាមជាមួយគយលើការនាំចូលវត្ថុធាតុដើម ដើម្បីផ្គត់ផ្គង់ការផលិតរបស់រោងចក្រកាត់ដេរដែលបានរំខានដោយខូវិដ-១៩ មន្ដ្រីគយ និងរដ្ឋាករទាំងអស់ត្រូវតែចាត់វិធានការបន្ទាន់»។
ស្ថានទូតចិនប្រចាំប្រទេសកម្ពុជាបានឲ្យដឹងថា កម្ពុជាបាននាំចូល ៦០ ភាគរយ នៃវត្ថុធាតុដើមពីប្រទេសចិន ដើម្បីផ្គត់ផ្គង់ឧស្សាហកម្មកាត់ដេរ និងស្បែកជើងរបស់ខ្លួន។
ការរាលដាលវីរុសខូវិដ-១៩ នៅក្នុងប្រទេស ចិន នឹងធ្វើឲ្យកម្ពុជាប្រឈមកង្វះវត្ថុធាតុដើម ហើយរដ្ឋាភិបាលប្រទេសចិនបានសន្យាស្វែងរកដំណោះស្រាយនេះ។ នេះបើយោងតាមស្ថានទូតចិន។
ថ្លែងក្នុងសន្និសីទព័ត៌មាននៅទីស្ដីការគណៈរដ្ឋមន្ដ្រីកាលពីសប្តាហ៍មុនលោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា រោងចក្រចំនួន ១០ បានអស់វត្ថុធាតុដើម ដោយសារមិនមានការផ្គត់ផ្គង់ពីប្រទេសចិន។ ប៉ុន្តែលោកអះអាងថា ភាពអាក្រក់ខ្លាំងបំផុតមិនទាន់កើតឡើងនោះទេ។
លោក ហេង សួរ បានថ្លែងថា៖ «នៅក្នុងខែមីនាយើងអាចមើលឃើញរោងចក្រ និងសហគ្រាសចំនួន ២០០ អស់វត្ថុធាតុដើម។ សេណារីយោដ៏អាក្រក់បំផុតនេះគឺថា កម្មករប្រហែល ១៦០ ០០០ នាក់ នឹងត្រូវទទួលរងផលប៉ះពាល់»។
លោកបញ្ជាក់ថា ការផ្អាកការផលិតនៅប្រទេសចិនកំពុងធ្វើឲ្យប៉ះពាល់ដល់ចង្វាក់ផ្គត់ផ្គង់ជុំវិញពិភពលោក ពិសេសនៅអាស៊ី។ លោកចង្អុលបង្ហាញថា រោងចក្រជាច្រើននៅប្រទេសកូរ៉េខាងត្បូងត្រូវបានផ្អាកប្រតិបត្តិការ ដោយសារតែកង្វះវត្ថុធាតុដើម។
សមាគមរោងចក្រកាត់ដេរនៅកម្ពុជា (GMAC) កាលពីសប្ដាហ៍មុនបានសាទរនូវការដាក់ឲ្យចេញនូវវិធានការបន្ទាន់ដែលបានធ្វើឡើងដោយរដ្ឋាភិបាល ជាការឆ្លើយតបនឹងបញ្ហាប្រឈមរបស់ឧស្សាហកម្មកាត់ដេរ។
GMAC បានឲ្យដឹងថាសេចក្ដីប្រកាសជាផ្លូវការរបស់លោកនាយករដ្ឋមន្ដ្រី បានធ្វើឲ្យមានភាពធូរស្រាលដល់ការបារម្ភ ហើយ GMAC បង្ហាញការដឹងគុណសម្រាប់វិធានការលម្អិត និងទាន់ពេលវេលាដែលបានដាក់ចេញដោយរាជរដ្ឋាភិបាល ដើម្បីកាត់បន្ថយផលប៉ះពាល់ជាអតិបរមាដែលបានបង្កឡើងដោយការរីករាលដាលវីរុសខូវិដ-១៩ និងការដកមួយផ្នែកនៃ EBA។
GMAC បានសរសេរថា៖ «យើងនឹងបន្តចូលរួមក្នុងការពិគ្រោះយោបល់ជាមួយក្រសួង និងស្ថាប័នជាប់ពាក់ព័ន្ធលើការអនុវត្តគោលនយោបាយនេះដែលនឹងដោះស្រាយបញ្ហាប្រឈមរបស់ឧស្សាហកម្មនេះ ហើយច្បាស់ណាស់នឹងធ្វើវិនិយោគិនមានអារម្មណ៍ធូរស្រាល»៕LA
វីដេអូ៖