ភ្នំពេញៈ លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករ (GDCE) បានអំពាវនាវវិស័យឯកជនត្រូវធ្វើការងារយ៉ាងជិតស្និទ្ធជាមួយនាយកដ្ឋានគយ ដើម្បីស្វែងរកវិធានការអនុវត្តប្រកបដោយប្រសិទ្ធភាព និងទូលំទូលាយក្នុងការកាត់បន្ថយតម្លៃសេវាដឹកជញ្ជូនចំពេលការរីករាលដាលនៃវីរុសកូវីដ ១៩ និងការព្យួរមួយផ្នែកនៃ EBA។
ការស្នើសុំនេះបានធ្វើឡើងកាលពីសប្ដាហ៍មុនក្នុងអំឡុងកិច្ចប្រជុំមួយជាមួយក្រុមហ៊ុនដឹកជញ្ជូនឯកជន និងក្រុមហ៊ុនផែស្ងួតទាំងអស់នៅកម្ពុជា។ លោកថ្លែងថា៖ «ប្រតិបត្តិករទាំងអស់ដែលរួមមានសមាគមភ្នាក់ងារបញ្ជូនទំនិញកម្ពុជាសមាគមរថយន្តដឹកទំនិញកម្ពុជា និងកំពង់ផែស្ងួតត្រូវរួមកម្លាំងជាមួយ GDCE ក្នុងការស្វែងរកវិធានការអនុវត្តប្រកបដោយប្រសិទ្ធភាព និងទូលំទូលាយដើម្បីកាត់បន្ថយតម្លៃដឹកជញ្ជូននៅកម្ពុជា»។
បន្ទុកតម្លៃលើកដាក់ទំនិញនៅចំណតនៅកំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញត្រូវបានកាត់បន្ថយតម្លៃ ៥ ដុល្លារក្នុង ១ កុងតឺន័រទំហំ ២០ ហ្វីត (TEU) ខណៈតម្លៃធៀបមិនសមតុល្យរវាងកុងតឺន័រចេញ និងចូល ត្រូវបានកាត់បន្ថយ ១២ ដុល្លារក្នុង ១ កុងតឺន័រទំហំ ២០ ហ្វីត និង ៤០ ដុល្លារសម្រាប់កុងតឺន័រទំហំ ៤០ ហ្វីត។ នេះបើយោងតាមរបាយការណ៍ប្រចាំឆ្នាំបានមកពីក្រសួងសាធារណការ និងដឹកជញ្ជូន។
ទោះបីយ៉ាងណាលោក ស៊ិន ចន្ធី ប្រធានសមាគមបញ្ជូនទំនិញកម្ពុជា (CAMFFA) បានឲ្យដឹងថា បន្ទុកតម្លៃលើកដាក់ទំនិញនៅចំណត និងតម្លៃធៀបមិនសមតុល្យ នៅតែមានតម្លៃខ្ពស់បើធៀបបណ្ដាប្រទេសជិតខាងថៃ និងវៀតណាម។
លោក ស៊ិន ចន្ធី បានបន្តថា បច្ចុប្បន្នបន្ទុកតម្លៃលើកដាក់ទំនិញនៅចំណត មានតម្លៃ ១៨០ ដុល្លារ សម្រាប់កុងតឺន័រទំហំ ២០ ហ្វីត និង ២៤០ ដុល្លារសម្រាប់កុងតឺន័រទំហំ ៤០ ហ្វីត។ លើសពីនេះតម្លៃធៀបមិនសមតុល្យរវាងកុងតឺន័រចេញ និងចូលមានតម្លៃ ២០០ ដុល្លារសម្រាប់កុងតឺន័រ ២០ ហ្វីត និង ៣០០ ដុល្លារ សម្រាប់កុងតឺន័រ ៤០ ហ្វីត។
លោក ស៊ិន ចន្ធីថ្លែងថា៖ «យើងបានបញ្ជូនសំណើនេះទៅរដ្ឋាភិបាល ហើយយើងមិនទាន់ទទួលការឆ្លើយតបពីរដ្ឋាភិបាលនៅឡើយទេ រហូតមកដល់ពេលនេះ ប៉ុន្តែយើងសង្ឃឹមថា រដ្ឋាភិបាលនឹងទទួលយកសំណើនេះ។ តម្លៃខ្ពស់នៃសេវាដឹកជញ្ជូននឹងប៉ះពាល់ដល់សមត្ថភាពប្រកួតប្រជែងរបស់យើង»។
លោក ឃុត សារឿង អគ្គនាយកក្រុមហ៊ុន SHA Transport Express បានប្រាប់ភ្នំពេញប៉ុស្ដិ៍កាលពីថ្ងៃចន្ទថា ក្រុមហ៊ុនរបស់លោកជិត ៩០ ភាគរយ ត្រូវបានកក់សម្រាប់ការដឹកជញ្ជូនទំនិញពី SAP បន្ទាប់ពី GDCE បានចេញវិធានការនានា ដើម្បីជួយដល់វិស័យដឹកជញ្ជូន និងវិស័យកាត់ដេរ ដែលមានការពិបាក ដោយសារការផ្គត់ផ្គង់វត្ថុធាតុដើមមកពីប្រទេសចិន។ លោកបន្តថា៖ «ក្រុមហ៊ុនរបស់ខ្ញុំបានចូលរួមជាកម្លាំងរួចហើយជាមួយរដ្ឋាភិបាល»។
កាលពីឆ្នាំមុនកំពង់ផែស្វយ័តក្រុងព្រះសីហនុបានទទួលទំនិញ ៦,៥ លានតោនកើនឡើង ២២,៦ ភាគរយ។ ការចរាចរកុងតឺន័របានកើនឡើង ១៧ ភាគរយដល់ ៦៣៣ ០៩៩ TEUs៕LA