ភ្នំពេញៈ អគ្គនាយកដ្ឋានគយ និងរដ្ឋាករកម្ពុជាបានសម្រេចអនុញ្ញាតឲ្យសាខាគយ និងរដ្ឋាករអាចបើកទូកុងតឺន័រភ្លាមៗចំពោះទំនិញដែលមានច្រើនម្ចាស់ (LCL) ដែលនេះជាវិធានការថ្មីមួយក្នុងការជួយសម្រួលដល់ការនាំចេញ និងនាំចូលទំនិញនៅកម្ពុជា។
លិខិតស្តីពី «ការកែសម្រួលនីតិវិធីនៃការគ្រប់គ្រងទំនិញក្នុងកុងតឺន័រ ដែលមានច្រើនម្ចាស់» និងត្រូវបានចុះហត្ថលេខាដោយលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាកាលពីថ្ងៃទី ២៩ មេសា បានឲ្យដឹងថា ការកែសម្រួលនីតិវិធីនេះគឺក្នុងគោលបំណងជំរុញកិច្ចសម្រួលពាណិជ្ជកម្មបន្ថែមទៀតដល់ធុរជននាំចេញ និងនាំចូលទំនិញដោយពុំតម្រូវឲ្យសាខាគយ និងរដ្ឋាករពាក់ព័ន្ធបំពេញបែបបទបញ្ចេញទំនិញស្នើសុំ ដើម្បីបានទទួលការអនុញ្ញាតពីអគ្គនាយកដ្ឋានគយទៀតទេ។
លិខិតបានបញ្ជាក់ថា៖ «ក្នុងន័យនេះប្រធានសាខាគយ និងរដ្ឋាករមានសមត្ថកិច្ចពាក់ព័ន្ធមានសិទ្ធិសម្រេចនៅនឹងកន្លែងដោយអនុញ្ញាតឲ្យកាត់សៀលរើទំនិញពីកុងតឺន័រនៃមុខទំនិញដែលមានច្រើនម្ចាស់ ដើម្បីបំពេញបែបបទបញ្ចេញទំនិញពីគយ និង/ឬសម្រាប់ការរក្សាទុកក្នុងឃ្លាំងតាមនីតិវិធី និងបទប្បញ្ញត្តិជាធរមាន»។
លោក ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) បានប្រាប់ភ្នំពេញប៉ុស្តិ៍ កាលពីថ្ងៃអាទិត្យថា ការកែសម្រួលនីតិវិធីនឹងជួយកាត់បន្ថយការកកស្ទះការបញ្ចេញទំនិញ និងកាត់បន្ថយភាពស្មុគស្មាញនៃនីតិវិធីបំពេញបែបបទបញ្ចេញទំនិញ។ លោកបន្តថា ការសម្រួលនេះក៏នឹងជួយជំរុញបន្ថែមទៀតដល់ការបញ្ចេញទំនិញដែលជាវត្ថុធាតុដើមបម្រើដល់រោងចក្រកាន់តែលឿនរហ័សជាងមុន។
លោកថ្លែងថា៖ «ការសម្រួលនេះជារឿងល្អកាលពីមុនមន្ត្រីនៅកំពង់ផែមិនអាចមានសិទ្ធិបើកកុងតឺន័ររើទំនិញភ្លាមៗទេ ទាល់តែមានលិខិតអនុញ្ញាតពីអគ្គនាយកដ្ឋានគយ និងរដ្ឋាករកម្ពុជា ប៉ុន្តែសព្វថ្ងៃនេះពួកគាត់អាចធ្វើការបើកទូកុងតឺន័រដើម្បីបញ្ចេញទំនិញជាបន្ទាន់បាន»។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា ការកែសម្រួលនីតិវិធីនៃការគ្រប់គ្រងទំនិញក្នុងកុងតឺន័រដែលមានច្រើនម្ចាស់នៅពេលនេះនឹងជួយកាត់បន្ថយពេលវេលា និងការចំណាយរបស់វិស័យឯកជនបានមួយផ្នែក។ លោកថ្លែងថា៖ «យើងជាវិស័យឯកជនគាំទ្រចំពោះវិធានការនេះ ការកែសម្រួលនេះជួយដល់ការងារនាំចេញទំនិញពីកុងតឺន័របានកាន់តែលឿនរហ័ស»។
របាយការណ៍ហិរញ្ញវត្ថុដែលមិនទាន់ធ្វើសវនកម្មរបស់កំពង់ផែស្វយ័តក្រុងភ្នំពេញ (PPAP) ផ្ញើទៅ CSX កាលពីខែមុនបង្ហាញថា ក្នុងត្រីមាសទី ១ នេះកំពង់ផែរកបានប្រាក់ចំណូល ៧,៦១ លានដុល្លារកើនឡើង ២៩,៦៤ ភាគរយ បើធៀបនឹងរយៈពេលដូចគ្នាកាលពីឆ្នាំមុនចំនួន ៥,៨៧ លានដុល្លារ។
តួលេខលម្អិតនៃលទ្ធផលអាជីវកម្ម និងសេវាកម្មនៅត្រីមាសទី ១ របស់កំពង់ផែនេះគឺបានមកពីការដឹកជញ្ជូនទំនិញ និងឧស្ម័នប្រេងឥន្ធនៈកើន ៣ ភាគរយ ការដឹកទំនិញកើនឡើង ១៤ ភាគរយ កុងតឺន័រកើនឡើង ២៦ ភាគរយ។ ប៉ុន្តែចំនួនអ្នកដំណើរតាមរយៈកំពង់ផែបានធ្លាក់ចុះ ២២ ភាគរយ និងចំនួនទូកដឹកអ្នកដំណើរក៏បានធ្លាក់ ៧ ភាគរយដែរ៕ LA