.jpg)
វិភាគដោយ៖ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល។
តម្លៃគូរូបិយប័ណ្ណដុល្លារអាមេរិក និងដុល្លារកាណាដា (USD/CAD) បាននិងកំពុងប្រែប្រួលក្នុងទំនោរធ្លាក់ចុះ និងអាចបន្ដធ្លាក់ក្នុងសប្ដាហ៍ខាងមុខទៀត ខណៈពេលដែលតម្លៃប្រាក់ដុល្លារកាណាដាមានសម្ទុះខ្លាំងជាង។ ទំនោរនេះ បណ្ដាលមកពីទំនាក់ទំនងទ្វេភាគីលើផលិតផលប្រេង និងសេដ្ឋកិច្ចនៃប្រទេសទាំង ២ ដោយកាណាដា គឺជាអ្នកផ្គត់ផ្គង់ប្រេងដ៏ធំមួយរបស់សហរដ្ឋអាមេរិក ដែលកំពុងដំណើរការសកម្មភាពសេដ្ឋកិច្ចរបស់ខ្លួនឡើងវិញ ដែលជាហេតុជំរុញឱ្យមានតម្រូវការប្រេងច្រើនជាងមុន។
ការនាំចេញប្រេងយ៉ាងច្រើនទៅសហរដ្ឋអាមេរិកនាពេលបច្ចុប្បន្ននេះ ធ្វើឱ្យតម្លៃប្រាក់ដុល្លារកាណាដាមានភាពវិជ្ជមាន ហើយវិនិយោគិនក៏មានភាពងាយស្រួលក្នុងការវិភាគទិសដៅ និងចាប់យកឱកាសជួញដូរដែលអាចទទួលបានផលចំណេញខ្ពស់។
យោងតាមបញ្ជីប្រទេសផលិតប្រេងដែលរៀបរៀងដោយ International Energy Agency កាណាដា គឺជាប្រទេសមួយដែលមានសេដ្ឋកិច្ចពឹងផ្អែកលើការផលិត និងនាំចេញប្រេងទៅក្រៅប្រទេស រួមទាំងការនាំចេញប្រេងចំនួន ១ ៧៩៨ ១០១ បារ៉ែល ក្នុង ១ ថ្ងៃ ទៅកាន់សហរដ្ឋអាមេរិកដោយមិនមានការកាត់ពន្ធ។
ចាប់តាំងពីឆ្នាំ ១៩៩៤ មក កាណាដា និងសហរដ្ឋអាមេរិក មានកិច្ចព្រមព្រៀងយោគយល់ និងអនុគ្រោះលើពន្ធនាំចេញនាំចូលដែលគេហៅថា កិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA)។ លោក Joe Biden ប្រធានាធិបតីសហរដ្ឋអាមេរិកថ្មី ក៏បានបង្ហាញពីគោលបំណងក្នុងការរក្សាទំនាក់ទំនងលើការអនុវត្តកិច្ចព្រមព្រៀងមួយនេះឱ្យបានល្អប្រសើរនៅក្នុងអាណត្តិរបស់ខ្លួនផងដែរ។
ទន្ទឹមនឹងនេះ ប្រទេសទាំង ២ មានគោលនយោបាយអត្រាការប្រាក់ប្រហាក់ប្រហែលគ្នា ហើយបច្ចុប្បន្នមានអត្រាការប្រាក់នៅក្បែរសូន្យដូចគ្នា។ កត្ដាទាំងនេះ បានដើរតួយ៉ាងសំខាន់ក្នុងការរក្សាគម្លាត USD/CAD មិនឱ្យប្រែប្រួលខ្លាំងជាមួយនឹងហានិភ័យទាបក្នុងការជួញដូរ។ សម្រាប់ការវិភាគលើការជួញដូរក្នុងសប្ដាហ៍នេះ វិនិយោគិនអាចជួញដូរ USD/CAD ដោយលក់នៅតម្លៃ ១,២៦០០ កំណត់មុខងារការពារហានិភ័យនៅតម្លៃ ១,២៦៥០ និងកំណត់មុខងារកាត់យកប្រាក់ចំណេញនៅតម្លៃ ១,២៤៥០៕
