.jpg)
លោក អ៊ិន ចាន់នី (ឆ្វេង) ចុះ MoU ជាមួយលោក Allen Tan។ សហការី
ភ្នំពេញៈ សមាគមធនាគារនៅកម្ពុជា (ABC) តំណាងដោយលោក អ៊ិន ចាន់នី និងសភាពាណិជ្ជកម្មអាមេរិកប្រចាំកម្ពុជា (AmCham) តំណាងដោយលោក Allen Tan កាលពីថ្ងៃព្រហស្បតិ៍កន្លងទៅនេះ បានចុះអនុស្សរណៈនៃការយោគយល់ (MoU) ផ្តោតលើការអនុវត្តគោលការណ៍ហិរញ្ញវត្ថុប្រកបដោយស្ថិរភាពនៅក្នុងសហគមន៍អាជីវកម្មកម្ពុជា។
លោក ហេង កយ អ្នកគ្រប់គ្រងទូទៅនៃសមាគមធនាគារនៅកម្ពុជា (ABC) បាននិយាយថា ចាប់តាំងពីសមាជិកទាំងអស់របស់ ABC អនុវត្តគោលការណ៍ហិរញ្ញវត្ថុប្រកបដោយស្ថិរភាពបានធ្វើឲ្យ AmCham មានការចាប់អារម្មណ៍ចង់អនុវត្តជាមួយសមាជិករបស់ពួកគេដែរ។
លោកថ្លែងថា៖ «AmCham ពិតជាគាំទ្រដល់ការអនុវត្តហិរញ្ញវត្ថុប្រកបដោយស្ថិរភាពរបស់យើងក្នុងចំណោមសមាជិករបស់យើង ដូច្នេះជាមួយនឹង MoU នេះ ពួកគេនឹងអនុវត្តវាជាមួយសមាជិកទាំងអស់របស់ពួកគេ។ ជាមួយគ្នានេះដែរ សមាគមទាំង ២ ក៏នឹងរៀបចំសិក្ខាសាលារួមគ្នាក្នុងការផ្សព្វផ្សាយហិរញ្ញវត្ថុប្រកបដោយស្ថិរភាពតាមបណ្តាខេត្តនានាដើម្បីបង្កើនការយល់ដឹង»។
លោក Allen Tan បានប្រាប់ភ្នំពេញប៉ុស្ដិ៍ថា MoU នេះនឹងលើកកម្ពស់កិច្ចសហប្រតិបត្តិការរវាងសមាគមទាំង ២ ដើម្បីធ្វើឲ្យវិស័យហិរញ្ញវត្ថុដំណើរការប្រកបដោយស្ថិរភាព។
លោកបន្ថែមថា កត្តានិរន្តរភាពបានក្លាយជាវិមាត្ររបស់ក្រុមហ៊ុនដ៏សំខាន់ខ្លាំងបំផុតទូទាំងពិភពលោក ជាពិសេសក្រុមហ៊ុនអាមេរិក។
លោកថ្លែងថា៖ «ស្ថិតក្រោម MoU នេះយើងនឹងធ្វើការងាររួមគ្នាជាមួយ ABC និងសមាជិករបស់យើងក្នុងការដំណើរការព្រឹត្តិការណ៍នានា ដូចជាសិក្ខាសាលា ដើម្បីជួយក្រុមហ៊ុនយល់ដឹងពីរបៀបក្នុងការដាក់បញ្ចូលហិរញ្ញវត្ថុប្រកបដោយនិរន្តរភាពទៅក្នុងគំរូអាជីវកម្មរបស់ពួកគេ»។
លោក Allen បន្ថែមថា៖ «យើងមានក្រុមហ៊ុនជាច្រើននៅក្នុងវិស័យធនាគារ ប៉ុន្តែមិនទាន់ក្លាយជាធនាគារអាមេរិកពេញលេញនោះទេ។ ពិតហើយ យើងចង់មើលឃើញតំណាងដ៏ពេញលេញរបស់ធនាគារអាមេរិក ហើយខ្ញុំគិតថា វាអាស្រ័យលើកត្តាវេលា។ ក្រុមហ៊ុនអាមេរិកភាគច្រើនប្រតិបត្តិការនៅក្នុងប្រទេសកម្ពុជាបានបង្ហាញភាពពេញចិត្តជាមួយនឹងសេវារបស់វិស័យធនាគារនេះ»។
របាយការណ៍ NBC ឆ្នាំ ២០១៩ បង្ហាញថា ប្រទេសកម្ពុជាមានធនាគារពាណិជ្ជ ៤៦ ធនាគារឯកទេស ១៥ និងគ្រឹះស្ថានមីក្រូហិរញ្ញវត្ថុ (MFIs) ៨២ ព្រមជាមួយប្រតិបត្តិករឥណទានជនបទ ២៤៨ ក្រុមហ៊ុនភតិសន្យា ១៥ និងក្រុមហ៊ុនផ្ដល់សេវាទូទាត់ ២០។
ផលបត្រកម្ចីរបស់ធនាគារបានកើនឡើងដល់ ២៤,៥ ពាន់លានដុល្លារ រីឯប្រាក់បញ្ញើមាន ២៥,៥ ពាន់លានដុល្លារក្នុងឆ្នាំ ២០១៩៕LA
