.jpg)
សកម្មភាពកសិករកំពុងដឹកដំឡូងមីទៅលក់ឲ្យឈ្មួញនាពេលកន្លងមក។ ហេង ជីវ័ន
ភ្នំពេញ: រដ្ឋាភិបាលសម្រេចអនុម័តសេចក្តីព្រាងច្បាប់ស្តីពីគោលនយោបាយជាតិដំឡូងមី ២០២០-២០២៥ ក្នុងគោលបំណងដើម្បីជំរុញការផលិតកែច្នៃសម្រាប់នាំចេញទៅកាន់ទីផ្សារអន្តរជាតិ។ នេះបើតាមសេចក្តីប្រកាសព័ត៌មានស្តីពីលទ្ធផលនៃសម័យប្រជុំពេញអង្គគណៈរដ្ឋមន្ត្រីដែលដឹកនាំដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ១៤ ខែសីហា ។
សេចក្តីប្រកាសព័ត៌មានបានឲ្យដឹងថា សេចក្តីព្រាងច្បាប់នេះមានគោលបំណងដើម្បីប្រែក្លាយប្រទេសកម្ពុជាជាទីតាំងផលិត កែច្នៃ និងអ្នកផ្គត់ផ្គង់ផលិតផលដំឡូងមីប្រកបដោយនិរន្តរភាពសម្រាប់ទីផ្សារក្នុងតំបន់ និងពិភពលោក។
សេចក្តីប្រកាសព័ត៌មានបានបន្តថា គោលនយោបាយជាតិដំឡូងមី បានកំណត់គោលដៅសំខាន់ៗចំនួន ៣ ដែលរួមមាន ទី១ ការផ្លាស់ប្តូរពីផលិតកម្មដំឡូងមីបែបប្រពៃណី ឬគ្រួសារឲ្យទៅជាផលិតកម្មដំឡូងមីបែបពាណិជ្ជកម្ម និងការអនុវត្តតាមគោលការណ៍បច្ចេកទេសកសិកម្មដែលកសិករអាចទទួលបានប្រាក់ចំណូលខ្ពស់ ការប្រើប្រាស់ដីប្រកបដោយចីរភាព និងកសិកម្មវៃឆ្លាតដែលធន់នឹងការប្រែប្រួលអាកាសធាតុ ទី២ គាំទ្រដល់អ្នកកែច្នៃផលិតផលដំឡូងមីឲ្យមានប្រសិទ្ធភាពខ្ពស់ ដើម្បីកែច្នែផលិតផលដំឡូងមីដែលមានតម្លៃបន្ថែមសម្រាប់ផ្គត់ផ្គង់ក្នុងទីផ្សារក៏ដូចជាទាក់ទាញការវិនិយោគបន្ថែមក្នុងវិស័យដំឡូងមី និងទី៣ ការលើកកម្ពស់ភាពប្រកួតប្រជែងពាណិជ្ជកម្មតាមរយៈការជ្រៀតចូល និងចាប់យកចំណែកទីផ្សារ ព្រមទាំងកែលម្អកិច្ចសម្រួលពាណិជ្ជកម្ម កាត់បន្ថយចំណាយដែលមិនចាំបាច់ និងសម្របសម្រួលជាមួយអន្តរវិស័យដែលពាក់ព័ន្ធការនាំចេញ។
សេចក្តីប្រកាសព័ត៌មានបញ្ជាក់ថា៖ «ក្នុងស្ថានភាពបច្ចុប្បន្ន និងអនាគត ដំណាំដំឡូងមីដែលជាដំណាំធំទី២ បន្ទាប់ពីស្រូវនឹងមានការគាំទ្រពិសេសដើម្បីទាញយកផលប្រយោជន៍ឲ្យបានជាអតិបរមា និងការអភិវឌ្ឍដំណាំនេះឲ្យក្លាយជាកម្លាំងចលករដ៏ខ្លាំងក្លាមួយក្នុងការធ្វើបដិវត្តន៍ឧស្សាហកម្មនៅកម្ពុជាឆ្នាំ ២០១៥-២០២៥»។
សព្វថ្ងៃ ដំឡូងមី គឺជាដំណាំកសិឧស្សាហកម្មដែលបាននាំចេញដ៏សំខាន់របស់ប្រទេសកម្ពុជាដោយបានរួមចំណែកពី ៣ ទៅ ៤ ភាគរយ នៃផលិតផលសរុបក្នុងស្រុក។ នេះបើតាមសេចក្តីប្រកាសព័ត៌មាន។
បើយោងតាមការសិក្សាស្រាវជ្រាវរបស់អង្គការ UNDP ស្តីពីការរៀបចំករណីវិនិយោគសម្រាប់ដំឡូងមីដែលចេញផ្សាយកាលពីចុងឆ្នាំ ២០១៩ បង្ហាញថា ការវិនិយោគលើដំណាំដំឡូងមីអាចទទួលបានផលច្រើនជាងការវិនិយោគក្នុងវិស័យផលិតកម្មស្រូវ ចិញ្ចឹមសត្វ ស្បៀងអាហារ និងទេសចរណ៍។
ការសិក្សានេះបានឲ្យដឹងទៀតថា កំណើនចំណូលពីសារពើពន្ធផ្ទាល់សម្រាប់វិស័យដំឡូងមីទទួលបានប្រមាណ ១៣០ លានដុល្លារក្នុងរយៈពេល ១០ ឆ្នាំ ដែលប្រហាក់ប្រហែលនឹងចំណូលពីស្រូវ ការចិញ្ចឹមសត្វ និងស្បៀងអាហារ។ លើកលែងតែវិស័យទេសចរណ៍ដែលផ្តល់ផលចំណេញច្រើនជាងគេគឺ ១៥១ លានដុល្លារ។
ការអភិវឌ្ឍក្នុងវិស័យដំឡូងមីកម្ពុជាត្រូវការកញ្ចប់ថវិកាវិនិយោគសាធារណៈចំនួន ២៩៦ លានដុល្លារ ខណៈការអភិវឌ្ឍវិស័យនេះភាគច្រើនពុំទាន់យកចិត្តទុកដាក់ខ្ពស់លើការកែច្នៃក្នុងប្រទេសនោះទេ។ នេះបើតាមការសិក្សារបស់ UNDP។
មន្ត្រីមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង លោក ហេង សិទ្ធិ បានឲ្យដឹងថា ការដាំដុះដំណាំដំឡូងមីរបស់ប្រជាកសិករក្នុងខេត្តបាត់ដំបង បានរួចរាល់ហើយលើផ្ទៃដីប្រមាណ ១២ ម៉ឺនហិកតា។ ដំឡូងមីខេត្តបាត់ដំបង ភាគច្រើនត្រូវបាននាំចេញទៅប្រទេសថៃ និងវៀតណាម។ លោកបន្តថា កាលពីឆ្នាំមុនដំឡូងមីស្រស់ក្នុងខេត្តបាត់ដំបង មានតម្លៃចន្លោះពី ២០០ រៀល ទៅ ៣០០ រៀលប៉ុណ្ណោះក្នុង ១ គីឡូក្រាម។
លោកបានបញ្ជាក់ថា៖ «ខ្ញុំសង្ឃឹមថា គោលនយោបាយនេះនឹងជួយលើកកម្ពស់ទីផ្សារ និងតម្លៃដំឡូងមី ដើម្បីរួមចំណែកលើកកម្ពស់ជីវភាពរបស់ប្រជាពលរដ្ឋ»។
របាយការណ៍ក្រសួងកសិកម្មឲ្យដឹងថា កម្ពុជានាំចេញដំឡូងមីជាង ៣,២៩ លានតោន កាលពីឆ្នាំ ២០១៩ កើន ២៧ ភាគរយធៀបនឹងឆ្នាំ ២០១៨ ដែលមាន ២,៥៩ លានតោន៕LA
