ភ្នំពេញៈ រដ្ឋាភិបាលកម្ពុជាកំពុងព្រាងគោលនយោបាយស្តីពីសេដ្ឋកិច្ចឌីជីថល បន្ទាប់ពីបានបង្កើតក្រុមការងារបច្ចេកទេសមួយ ដោយគោលនយោបាយនេះមានមុខងារជាផែនទីបង្ហាញផ្លូវដើម្បីបង្កើនកំណើនសេដ្ឋកិច្ចរបស់កម្ពុជាដែលមានមូលដ្ឋានលើការអភិវឌ្ឍបច្ចេកវិទ្យាថ្មី។
ថ្លែងកាលពីថ្ងៃអង្គារនៅក្នុងវេទិកា សាធារណៈស្ដីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ ២០១៩ លោក វង្សី វិស្សុត រដ្ឋលេខាធិការអចិន្រៃ្តយ៍នៃក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា បន្ទាប់ពីបានបង្កើតក្រុមការងារនេះនៅក្នុងក្រុមប្រឹក្សាឧត្តមក្រុមប្រឹក្សាសេដ្ឋកិច្ចជាតិ រួចមក ក្រុមនេះនឹងត្រូវការពេលវេលា ១ ឬ ២ ឆ្នាំ ដើម្បីបញ្ចប់សេចក្ដីព្រាងគោលនយោបាយនេះ។ លោកបន្ថែមថា គោលនយោបាយនេះរំពឹងថា នឹងរួចរាល់សម្រាប់ការដាក់ឲ្យដំណើរការនៅដើមឆ្នាំ ២០២០។
លោកបន្ថែមថា កម្ពុជាបានរក្សាកំណើនសេដ្ឋកិច្ចក្នុងល្បឿនដ៏លឿនក្នុងរយៈពេល ២ ទសវត្សរ៍ ហើយប្រទេសនេះនឹងចាំបាច់ត្រូវសម្លឹងមើលបច្ចេកវិទ្យាថ្មីៗ និងការសម្របខ្លួនទទួលយកឌីជីថលកាន់តែច្រើននៅក្នុងវិស័យផ្សេងៗ ដើម្បីបន្តការទទួលបានការរីកចម្រើន។
លោកថ្លែងថា៖ «បើសិនយើងមានក្រុមនេះ ហើយដាក់គោលនយោបាយត្រូវ និងធ្វើបានល្បឿនកំណើនសេដ្ឋកិច្ចអាចនឹងលឿនជាងមុន ដូច្នេះឆ្នាំ ២០៣០ យើងនឹងអាចសម្រេចបានគោលដៅប្រែក្លាយកម្ពុជាទៅជាប្រទេសចំណូលមធ្យមកម្រិតខ្ពស់»។
លោក វិស្សុត បានឲ្យដឹងថា គោលនយោបាយនេះនឹងចាំបាច់ដោះស្រាយការងារជាច្រើនដូចជាការអភិវឌ្ឍហេដ្ឋារចនាសម្ព័ន្ធសំខាន់ៗ ឡូជីស្ទីក ការតភ្ជាប់ឌីជីថល និងមជ្ឈមណ្ឌលនវានុវត្តន៍សម្រាប់សហគ្រិនវ័យក្មេង។
លោកបន្ថែមថា ការលើកទឹកចិត្តរបស់រដ្ឋាភិបាល ដូចជាការលើកទឹកចិត្តផ្នែកពន្ធ នឹងដាក់បញ្ចូលនៅក្នុងគោលនយោបាយនេះ ដើម្បីជំរុញសហគ្រិនវ័យក្មេងឲ្យបង្កើនការបង្កើតក្រុមហ៊ុនបង្កើតថ្មីខាងបច្ចេកវិទ្យា។
ខណៈភាគច្រើននៃក្រុមហ៊ុនឈានមុខគេលើពិភពលោក កាលពី ៥០ ឆ្នាំកន្លងមកនេះ គឺជាក្រុមហ៊ុនប្រេងឥន្ធនៈ លោក វិស្សុត បានឲ្យដឹងថា និន្នាការនេះបានផ្លាស់ប្តូរ ហើយក្រុមហ៊ុនបច្ចេកវិទ្យាជាច្រើន បានរក្សាតួនាទីជាក្រុមហ៊ុនឈានមុខគេលើពិភពលោកជំនួសក្រុមហ៊ុនប្រេងឥន្ធនៈទាំងនោះវិញ។
លោក ធុល រិទ្ធី សហស្ថាបនិកគម្រោង «គម្ពីរ» ដែលស្វែងរកការផលិតឧបករណ៍អេឡិចត្រូនិកគុណភាពខ្ពស់ និងមានតម្លៃទាបនៅប្រទេស កម្ពុជា និងជាសំឡេងឈានមុខគេមួយរបស់ប្រទេស កម្ពុជា ខាងផ្នែកបច្ចេកវិទ្យា និងសហគ្រិនភាពនោះ បានឲ្យដឹងកាលពីម្សិលមិញថា ផែនការរបស់រដ្ឋាភិបាលសម្រាប់ការបង្កើតគោលនយោបាយឆ្ពោះទៅរកសេដ្ឋកិច្ចឌីជីថល គឺជាគំនិតផ្ដួចផ្ដើមដ៏ត្រឹមត្រូវ ដោយសារតែវាជានិន្នាការឌីជីថល ដែលបច្ចេកវិទ្យានឹងធ្វើឲ្យមានជីវិត សេដ្ឋកិច្ច និងផ្លាស់ប្តូរអ្វីៗគ្រប់យ៉ាង។
លោកមានប្រសាសន៍ថា៖ «វាគឺជានិន្នាការធម្មតា ដែលប្រទេសអភិវឌ្ឍន៍ និងប្រទេសកំពុងអភិវឌ្ឍន៍ ចាំបាច់ត្រូវកំណត់ទិសដៅឆ្ពោះទៅរកការអភិវឌ្ឍឌីជីថល។ ប្រសិនបើមិនធ្វើដូច្នេះទេ យើងបាត់បង់សមត្ថភាពប្រកួតប្រជែង ឬអាចមិនមានអ្វីសោះ»។
លោកបន្តថា៖ «យើងចង់ឲ្យគោលនយោបាយនេះដោះស្រាយបញ្ហារបស់យើងទាក់ទងនឹងការផ្ដល់មូលនិធិ និងកង្វះការបង្ហាត់បង្ហាញ និងផ្ដល់ការជួយសម្រួលទាក់ទងនឹងការចុះបញ្ជីក្រុមហ៊ុន និងការលើកទឹកចិត្តពន្ធ»៕ LA