.jpg)
ឡូហ្គោរបស់ Facebook និង Google នៅលើទូរស័ព្ទ ។ រូបថត AFP
ក្រុងសានហ្វ្រានស៊ីស្កូៈ អង្គការលើកលែងទោសអន្តរជាតិ (Amnesty International) បានឲ្យដឹងនៅក្នុងរបាយការណ៍មួយកាលពីថ្ងៃពុធថា គំរូអាជីវកម្មប្រមូលទិន្នន័យរបស់ក្រុមហ៊ុន Facebook និងក្រុមហ៊ុន Google បង្ហាញពីការគំរាមកំហែងមួយដល់សិទ្ធិមនុស្សជុំវិញពិភពលោក។
អង្គការ Amnesty International បានលើកឡើងថា ការផ្ដល់ជូនមនុស្សនូវសេវាអនឡាញដោយមិនគិតប្រាក់ ហើយបន្ទាប់មកប្រើប្រាស់ព័ត៌មានរបស់ពួកគេ ដើម្បីកំណត់ការផ្សព្វផ្សាយពាណិជ្ជកម្មដែលរកប្រាក់ ធ្វើឲ្យប៉ះពាល់ដល់សិទ្ធិគ្រប់បែបយ៉ាងដែលរួមទាំងសេរីភាពនៃការបញ្ចេញគំនិត និងមតិផងដែរ។
អង្គការនេះបានឲ្យដឹងនៅក្នុងរបាយការណ៍ «Surveillance Giants » របស់ខ្លួនថា៖ «ទោះបីជាសេវាដែលពួកគេផ្ដល់មានតម្លៃពិតប្រាកដក៏ដោយ ក៏គេហទំព័ររបស់ក្រុមហ៊ុន Google និងក្រុមហ៊ុន Facebook ធ្វើឡើងក្នុងគ្រាដែលមានការខាតបង់ជាប្រព័ន្ធ»។
របាយការណ៍នេះបានបន្តថា៖ «គំរូអាជីវកម្មដែលមានមូលដ្ឋានលើការឃ្លាំមើលរបស់ក្រុមហ៊ុនទាំង ២ នេះបង្ខំឲ្យអតិថិជនលះបង់អ្វីគ្រប់យ៉ាង ដើម្បីរីករាយនឹងសិទ្ធិមនុស្សអនឡាញតាមរយៈការចុះឈ្មោះទៅកាន់ប្រព័ន្ធមួយដែលរំលោភសិទ្ធិមនុស្ស»។
ជាមួយនឹងការឃ្លាំមើលគ្រប់ទីកន្លែង ក្រុមហ៊ុនអនឡាញឈានមុខគេទាំង ២ នេះអាចប្រមូលចំនួនទិន្នន័យជាច្រើន ដែលអាចត្រូវបានប្រើប្រាស់ប្រឆាំងនឹងអតិថិជនរបស់ពួកគេ។ នេះបើយោងតាមអង្គការសិទ្ធិមនុស្សដែលមានមូលដ្ឋាននៅទីក្រុងឡុងដ៍មួយនេះ។
អង្គការ Amnesty International បានបញ្ជាក់ថា គំរូអាជីវកម្មនេះ «គឺមិនត្រូវគ្នាជាមួយសិទ្ធិឯកជននោះទេ»។
របាយការណ៍នេះបានបញ្ជាក់ថា ក្រុមហ៊ុននៅតំបន់បច្ចេកវិទ្យា Silicon Valley ទាំង ២ នេះបានបង្កើតឡើង «ភាពលើសលប់លើស្ទើរតែទាំងស្រុងទៅលើបណ្ដាញសំខាន់ៗតាមរយៈ អតិថិជនដែលភ្ជាប់ខ្លួន និងចូលរួមជាមួយពិភពលោកអនឡាញ» ដែលផ្ដល់ជូនពួកគេនូវអំណាចដែលមិនធ្លាប់មានជុំវិញជីវិតរបស់អតិថិជន។
លោក Kumi Naidoo អគ្គលេខាធិការរបស់អង្គការលើកលែងទោសអន្តរជាតិបានថ្លែងថា៖ «ក្រុមហ៊ុន Google និងក្រុមហ៊ុន Facebook គ្របដណ្ដប់លើជីវិតដ៏ទំនើបរបស់ពួកយើង ដែលប្រមូលអំណាចដែលមិនស្របគ្នា ជុំវិញពិភពឌីជីថលតាមរយៈការប្រមូល និងការរកប្រាក់ពីទិន្នន័យផ្ទាល់ខ្លួនរបស់អតិថិជនរាប់ពាន់លាននាក់»។
លោកបន្តថា៖ «ការគ្រប់គ្រងដោយកលល្បិចរបស់ពួកគេនៃជីវិតឌីជីថលរបស់យើងធ្វើឲ្យប៉ះពាល់ដល់ខ្លឹមសារនៃសិទ្ធិឯកជន និងជាបញ្ហាប្រឈមមួយក្នុងចំណោមបញ្ហាប្រឈមសិទ្ធិមនុស្សដែលកំណត់ជាច្រើននៃយុគសម័យរបស់យើង»។
របាយការណ៍នេះបានអំពាវនាវឲ្យរដ្ឋាភិបាលនានាអនុវត្តគោលនយោបាយដែលធានាបានលទ្ធភាពទទួលបានសេវាអនឡាញ ខណៈការពារសិទ្ធិឯកជនអ្នកប្រើប្រាស់។
អង្គការនេះបញ្ជាក់ថា៖ «រដ្ឋាភិបាលមានកាតព្វកិច្ចមួយក្នុងការការពារប្រជាជនមិនឲ្យមានការរំលោភសិទ្ធិមនុស្សដោយក្រុមហ៊ុន»៕ LA
