.jpg)
វ៉ាស៊ីនតោនៈ លោក Larry Kudlow ទីប្រឹក្សាសេដ្ឋកិច្ចនៅសេតវិមាន បាននិយាយសម្រាលរបាយការណ៍នៃការសម្រេចបាននៅក្នុងការចរចាពាណិជ្ជកម្មរបស់អាមេរិក និងចិន ប៉ុន្តែលោកបានឲ្យដឹងថា ការរីកចម្រើនក្នុងការដំណើរការនេះត្រូវបានធ្វើឡើង។
លោក Larry Kudlow នាយកក្រុមប្រឹក្សាសេដ្ឋកិច្ចជាតិ បានប្រាប់ទីភ្នាក់ងារព័ត៌មាន Fox Business ថា៖ «យើងបានធ្វើឲ្យមានការរីកចម្រើនមួយចំនួនជាមួយប្រទេស ចិន នៅក្នុងកិច្ចប្រជុំរបស់តំណាងពាណិជ្ជកម្មនៅទីក្រុងប៉េកាំង»។
ប៉ុន្តែលោកបន្ថែមថា៖ «មិនមានអ្វីត្រូវបានដោះស្រាយនោះទេ មិនមានអ្វីនៅលើក្រដាសនោះទេ មិនមានកិច្ចព្រមព្រៀងទេ»។
លោកបញ្ជាក់ថា សេចក្ដីរាយការណ៍ព័ត៌មានថ្មីៗនេះ អំពីកិច្ចព្រមព្រៀងមួយដែលជិតសម្រេចនេះ បានមិនច្បាស់លាស់ទេ។
ទីភ្នាក់ងារ Bloomberg បានរាយការណ៍កាលពីព្រឹកថ្ងៃសុក្រថា ទីក្រុងប៉េកាំង បានស្នើសុំលុបចោលអតិរេកពាណិជ្ជកម្មដែលកើនឡើងជាមួយអាមេរិករយៈពេល ៥ ឆ្នាំ។
អាមេរិក បានបញ្ជូនគណៈប្រតិភូមួយក្រុមដែលដឹកនាំដោយ លោក Jeffrey Gerrish តំណាងពាណិជ្ជកម្មអាមេរិក ទៅទីក្រុងប៉េកាំង កាលពីដើមខែនេះ ជាកន្លែងដែលពួកគេបានរៀបចំការចរចាជាមួយក្រសួងការបរទេសរបស់ចិនដើម្បីស្វែងរកមធ្យោបាយ ក្នុងការបញ្ចប់សង្គ្រាមពាណិជ្ជកម្មរបស់ពួកគេ។
លោក Liu He ឧបនាយករដ្ឋមន្ដ្រី ជាប្រធានអ្នកចរចារបស់ចិន ស្ដីពីជម្លោះពាណិជ្ជកម្ម ជាមួយអាមេរិក គ្រោងនឹងធ្វើដំណើរទៅទីក្រុងវ៉ាស៊ីនតោន នៅថ្ងៃទី ៣០ និង ៣១ ខែមករា សម្រាប់ការចរចាជុំបន្ទាប់។
កាលពីខែធ្នូ លោកប្រធានាធិបតី ត្រាំ និងលោក ស៊ី ជីនភីង មេដឹកនាំរបស់ប្រទេស ចិន បានយល់ព្រមក្នុងការបញ្ឈប់សង្គ្រាមពាណិជ្ជកម្មរបស់ពួកគេរយៈពេល ៣ ខែ។
ទីក្រុងវ៉ាស៊ីនតោនបានផ្អាកផែនការបង្កើនពន្ធនាំចូលលើទំនិញរបស់ចិន ដើម្បីផ្ដល់ឱកាសដល់អ្នកចរចា ក្នុងការស្វែងរកដំណោះស្រាយមួយចំពោះជម្លោះនេះ៕ AFP/LA
