.jpg)
ឡូហ្គោសមាគមធនាគារនៅកម្ពុជា។ រូបថត ABC
ភ្នំពេញ៖ សមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA) បានសម្រេចលើកលែងការបង់ការប្រាក់រយៈពេល ២ ខែដល់អតិថិជនខ្លួនដែលរងផលប៉ះពាល់ពីការរីករាលដាលនៃជំងឺកូវីដ ១៩ ដែលជាការឆ្លើយតបទៅនឹងការស្នើសុំរបស់លោកនាយករដ្ឋមន្ត្រី ហ៊ុន សែន ដែលបានស្នើសុំកាលពីពេលថ្មីៗនេះ។
កាលពីថ្ងៃទី ១០ ខែមេសានេះ ក្នុងឱកាសថ្លែងសារពិសេសអំពីស្ថានភាពកូវីដ ១៩ លោកនាយករដ្ឋមន្ត្រី ហ៊ុន សែន បានថ្លែងអំណរគុណដល់គ្រឹះស្ថានហិរញ្ញវត្ថុនៅកម្ពុជាដែលបានចេញនូវវិធានការ ៦ ចំណុច ដើម្បីសម្រួលដល់អតិថិជនរបស់ខ្លួនដែលរងផលប៉ះពាល់ពីព្រឹត្តិការណ៍ ២០ កុម្ភះ ប៉ុន្តែលោកនាយករដ្ឋមន្ត្រីក៏បានស្នើសុំឲ្យមានការពន្យារពេលនៃការសងត្រឡប់បន្ថែមទៀត ដើម្បីទុកពេលវេលាសមស្របដល់អតិថិជនដែលរងគ្រោះ។
យោងតាមសេចក្តីថ្លែងការណ៍រួមគ្នារបស់សមាគមទាំង ២ ខាងលើចេញផ្សាយនៅថ្ងៃចន្ទនេះថា តបទៅនឹងអនុសាសន៍របស់លោកនាយករដ្ឋមន្ត្រី ហ៊ុន សែន សមាគមទាំង ២ សូមទទួលយក និងអនុវត្តតាម ដោយធ្វើបច្ចុប្បន្នភាពកែសម្រួលបន្ថែមនូវគោលការណ៍ដែលបានចេញផ្សាយកាលពីថ្ងៃទី ៧ ខែ មេសា ឆ្នាំ ២០២១ ដល់អតិថិជនដែលឆ្លងជំងឺកូវីដ ១៩ ដោយបានលើកលែងការបង់ការប្រាក់រយៈពេល ២ ខែ ហើយសម្រាប់អតិថិជនដែលជាប់ធ្វើចត្តាឡីស័កនឹងផ្តល់ការរៀបចំឥណទានឡើងវិញដោយស្វ័យប្រវត្តិ (ប្រសិនបើអតិថិជនយល់ព្រម) រួមទាំងពន្យារការបង់ទាំងប្រាក់ដើមរយៈពេល ៣ ខែ។ ដោយឡែកក្នុងករណីចាំបាច់នានាដែលជាតម្រូវការរបស់អតិថិជនដែលរងផលប៉ះពាល់ដោយជំងឺកូវីដ ១៩ សូមធ្វើការពិភាក្សាដោយផ្ទាល់ជាមួយគ្រឹះស្ថានធនាគារ និងមីក្រូហិរញ្ញវត្ថុ។
«សមាគមសូមបញ្ជាក់ជំហរជាថ្មីថា ក្នុងរយៈពេលដ៏លំបាកនេះ នឹងមិនមានការផាកពិន័យចំពោះ អតិថិជនដែលរងផលប៉ះពាល់ដោយជំងឺកូវីដ ១៩» នេះបើយោងតាមសេចក្តីថ្លែងការណ៍៕
