ភ្នំពេញៈ គ្រឹះស្ថានហិរញ្ញវត្ថុកម្ពុជា កំពុងចាប់ផ្ដើមចូលរួមពង្រឹងហិរញ្ញប្បទានប្រកបដោយដោយចីរភាព និងការទទួលខុសត្រូវដើម្បីគាំទ្រការសម្រេចបានទិសដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ (SDG) និងការអភិវឌ្ឍសេដ្ឋកិច្ចរួម។ នេះបើតាមអង្គការ Oxfam។
ការពិភាក្សាជុំវិញហិរញ្ញវត្ថុប្រកបដោយចីរភាពនៅក្នុងប្រទេស កម្ពុជា ត្រូវបានធ្វើឡើងកាលពីម្សិលមិញ នៅទីក្រុងភ្នំពេញ ដែលមានការចូលរួមដោយតំណាងគ្រឹះស្ថានហិរញ្ញវត្ថុជាង ២០ នៅកម្ពុជា។
កិច្ចពិភាក្សាដែលត្រូវបានរៀបចំឡើងដោយអង្គការ Oxfam នៅកម្ពុជា និង CSR Asia ជាផ្នែកមួយនៃគំនិតផ្តួចផ្ដើមអាស៊ីហិរញ្ញវត្ថុដោយស្មើភាព ដោយអង្គការ Oxfam ផ្ដោតលើការបង្កើនការយល់ដឹងពីបញ្ហាប្រឈមទាក់ទងនឹងបរិយាកាសសង្គម និងអភិបាលកិច្ច និងតួនាទីដែលវិស័យហិរញ្ញវត្ថុអាចដើរតួនៅក្នុងការសម្រេចបានការអភិវឌ្ឍប្រកបដោយចីរភាព។
សេចក្ដីប្រកាសព័ត៌មានឲ្យដឹងថា៖ «មានភាពចាំបាច់សម្រាប់គ្រឹះស្ថានហិរញ្ញវត្ថុ ក្នុងការបង្កើនសមត្ថភាពរបស់ពួកគេលើការអនុវត្តបរិស្ថាន សង្គម និងអភិបាលកិច្ច (ESG)»។
លោក Richard Welford ប្រធាន CSR Asia បានឲ្យដឹងថា គ្រឹះស្ថានហិរញ្ញវត្ថុដើរតួនាទីដ៏សំខាន់នៅក្នុងការសម្រេចបាន SDG ដែលផ្ដល់ក្របខ័ណ្ឌល្អបំផុតសម្រាប់ស្ថាប័នហិរញ្ញវត្ថុ ដើម្បីរាយការណ៍ពីផលប៉ះពាល់ និងការរួមចំណែកដល់សង្គម។
លោកថ្លែងថា៖ «ការចូលរួមដ៏ច្រើននៅក្នុងព្រឹត្តិការណ៍នេះ បង្ហាញថា ធនាគារនៅកម្ពុជាកំពុងយកចិត្តទុកដាក់យ៉ាងខ្លាំងរួចហើយលើហិរញ្ញវត្ថុប្រកបដោយចីរភាពហើយយើងសង្ឃឹមថា នេះក្លាយជាអាទិភាពទាន់ពេលវេលានៅពេលខាងមុខ»។
របាយការណ៍ Bloomberg បង្ហាញថា មូលបត្របំណុល បៃតងមានតម្លៃជាង ៦០០ ពាន់លានដុល្លារអាមេរិក ត្រូវបានចេញទូទាំងពិភពលោកនៅក្នុងទសវត្សរ៍ចុងក្រោយនេះ។
លោកស្រី Solinn Lim នាយិកាប្រចាំប្រទេសរបស់ Oxfam Cambodia បានឲ្យដឹងថា គ្រឹះស្ថានហិរញ្ញវត្ថុចាំបាច់ត្រូវចាត់វិធានការយ៉ាងរឹងមាំឆ្ពោះទៅរកការសម្រេចបានលក្ខខណ្ឌ ESG នៅក្នុងសេចក្ដីសម្រេចចិត្តលើពាណិជ្ជកម្មស្នូលរបស់ពួកគេ។ លោកស្រីថ្លែងថា៖ «យើង ដែលជាគំនិតផ្តួចផ្ដើមហិរញ្ញវត្ថុដោយស្មើភាពនៅក្នុងប្រទេស កម្ពុជា ចង់ពង្រីកការគាំទ្ររបស់យើងដល់គ្រឹះស្ថានហិរញ្ញវត្ថុ និងភាគីពាក់ព័ន្ធសាធារណៈ និងឯកជនផ្សេងទៀត»។
លោកស្រីបានបន្តថា៖ «ព្រឹត្តិការណ៍នេះ គឺជាជំហានដំបូងឆ្ពោះទៅរកការសហការ ហើយនៅពេលនេះ យើងគួរតែបង្កើតយុទ្ធសាស្ដ្រស្ដីពីការបន្តចូលរួមឆ្ពោះទៅរកការកសាងប្រទេស កម្ពុជា ឲ្យកាន់តែមានស្ថិរភាព»។
សមាគមធនាគារកម្ពុជា (ABC) កាលពីសប្ដាហ៍មុន ក៏បានចុះហត្ថលេខាលើអនុស្សរណៈនៃការយោគយល់គ្នាចំនួន ២ ស្ដីពី «កិច្ចសហប្រតិបត្តិការហិរញ្ញវត្ថុប្រកបដោយ ដោយចីរភាព» ជាមួយក្រសួងបរិស្ថាន និងធនាគារជាតិនៃកម្ពុជា និងជាមួយអង្គការ USAID ដើម្បីពង្រឹង និងការអភិវឌ្ឍកិច្ចសហប្រតិបត្តិការហិរញ្ញវត្ថុប្រកបដោយស្ថិរភាពនៅក្នុងវិស័យធនាគារ និងគាំទ្រ ការការពារបរិស្ថាន ការគ្រប់គ្រងធនធានធម្មជាតិ និងការប្រែប្រួលអាកាសធាតុនៅកម្ពុជា។
លោក អ៊ិន ចាន់នី ប្រធាន ABC បានឲ្យដឹងនៅក្នុងពិធីដាក់ឲ្យដំណើរការគោលនយោបាយ ហិរញ្ញវត្ថុប្រកបដោយស្ថិរភាពរបស់កម្ពុជា និងការអនុវត្តគោលការណ៍ណែនាំរបស់ខ្លួនកាលពីខែ មីនា ឆ្នាំ ២០១៩ ថា វិស័យធនាគារកិច្ចអាចរួមចំណែកយ៉ាងសំខាន់ដល់និរន្តរភាព និងវិបុលសុខរបស់កម្ពុជាតាមរយៈការលើកកម្ពស់ការយល់ដឹងរបស់ប្រជាពលរដ្ឋ និងការដឹកនាំជាគំរូ។
លោកថ្លែងថា៖ «តាមរយៈគោលការណ៍ហិរញ្ញវត្ថុប្រកបដោយចីរភាពរបស់កម្ពុជា យើងខិតខំបង្កើតជាគំរូជោគជ័យមួយនៅអាស៊ីអាគ្នេយ៍ ក្នុងខណៈពេលជាមួយគ្នានោះពង្រឹងទំនុកចិត្តរបស់ទីផ្សារខាងក្រៅ និងវិនិយោគិន ដោយប្រកាន់ខ្ជាប់នូវឧត្តមានុភាពអន្តរជាតិ»៕LA