The Phnom Penh Post Search

Search form

Logo of Phnom Penh Post newspaper Phnom Penh Post - គ្រឹះ​ស្ថាន MFI បី គ្រោង​ច្របាច់​បញ្ចូល​គ្នា




គ្រឹះ​ស្ថាន MFI បី គ្រោង​ច្របាច់​បញ្ចូល​គ្នា

គ្រឹះ​ស្ថាន MFI បី គ្រោង​ច្របាច់​បញ្ចូល​គ្នា

121225_11
លោក Lim Hua Min (ឆ្វេង) នាយកប្រតិបត្តិក្រុមហ៊ុន PhillipCapital កំពុងថ្លែងក្នុងសន្និសីទកាលពីថ្ងៃសុក្រសប្តាហ៍មុន ហេង ជីវ័ន

ក្រុង ភ្នំពេញៈ ក្រុមហ៊ុន PhillipCapital ដែល​ជា​អ្នក​ផ្តល់​សេវា​ហិរញ្ញ​វត្ថុ​មាន​មូលដ្ឋាន​នៅ​សិង្ហបុរី និង​ជា​ម្ចាស់​ភាគហ៊ុន​ធំ​មួយ​នៅ​ក្នុង​គ្រឹះស្ថាន​មីក្រូ​ហិរញ្ញវត្ថុ​(MFI)​ចំនួន​បី​នៅ​ប្រទេស​កម្ពុជា​មាន​ផែន​ការ​ច្របាច់​MFI ទាំង​បី​នោះ​បញ្ចូល​គ្នា​ដើម្បី​ប្រែ​ក្លាយ​ទៅ​ជា​ធនាគារ​ពាណិជ្ជ។

លោក​នាយក​ប្រតិបត្តិ​Lim Hua Min បាន​ថ្លែង​ក្នុង​អំឡុង​សន្និសីទ​សារ​ព័ត៌មាន​កាល​ពី​ថ្ងៃ​សុក្រ​ថា វិស័យ MFI នៅ​កម្ពុជា​កំពុង​ស្ថិត​ក្នុង​ដំណាក់​កាល​រីក​ចម្រើន​ស្រប​តាម​សន្ទុះ​សកម្មភាព​សេដ្ឋកិច្ច។ ការ​សម្រេច​ចិត្ត​របស់​ក្រុមហ៊ុន​ក្នុង​ការ​វិនិយោគ​លើ​វិស័យ​MFI នៅ​កម្ពុជា ក៏​ជា​ការ​ចូល​រួម​ចំណែក​មួយ​ទៀត​សម្រាប់​កំណើន​សេដ្ឋកិច្ច​ផង​ដែរ​។

បច្ចុប្បន្ន​នេះ ក្រុមហ៊ុន PhillipCapital កំពុង​ធ្វើ​ការ​ជាមួយ​MFI ក្នុង​ស្រុក​ចំនួន​បី​មាន​ដូចជា គ្រឹះស្ថាន KREDIT គ្រឹះស្ថាន CBIRD និង​គ្រឹះស្ថាន First Finance​។ លោក​បាន​មាន​ប្រសាសន៍​ថា៖ ​«​យើង​អាច​នឹង​ពិចារណា​ពី​លទ្ធភាព​នេះ​ព្រោះ​យើង​បើក​ចំហ​ដើម្បី​បង្កើន​ប្រតិបត្តិការ​របស់​យើង ឬ​តាម​រយៈ​ការ​ទិញ​និង​ការ​ច្របាច់​បញ្ចូល​គ្នា​។ ទោះ​ជា​បច្ចុប្បន្ន​នេះ វា​មិន​ទាន់​ជា​របៀប​វារៈ​របស់​យើង​ក្តី ក៏​យើង បើក​ចំហ​ដើម្បី​ធ្វើ​ការ​ជាមួយ​ដៃ​គូ​MFI ផ្សេង​ទៀត ដើម្បី​ក្លាយ​ជា​ក្រុមហ៊ុន​ធំ​ជាង​មុន ដែល​នឹង​អាច​បង្កើន​ឥទ្ធិពល​ថែម​ទៀត​ក្នុង​សហគមន៍​នៅ​កម្ពុជា​»​។

លោក​បាន​ថ្លែង​បន្ត​ថា​៖ «​បើ​និយាយ​អំពី​ការ​បង្កើន​ឥទ្ធិពល​ក្នុង​សង្គម​របស់​យើង​ក្នុង​សហគមន៍​នៅ​កម្ពុជា ពិត​ជា​ត្រូវ​តែ​ច្របាច់​បញ្ចូល​MFI ទាំង​បី​របស់​យើង ដែល​យើង​បាន​វិនិយោគ​។ ក្នុង​រយៈ​ពេល​យូរ​អង្វែង យើង​អាច​នឹង​ពិចារណា​រួម​បញ្ចូល​MFI របស់​យើង​ហើយ​ជាង​នេះ​ទៅ​ទៀត​ប្រហែល​ជា​ក្លាយ​ជា​ធនាគារ​ពាណិជ្ជ​មួយ​នៅ​ពេល​ណា​មួយ​សម​ស្រប​ប៉ុន្តែ​យើង នឹង​នៅ​តែ​ផ្តោត​ការ​យក​ចិត្ត​ទុក​ដាក់​ខ្លាំង​លើ​អ្នក​ក្រ​»​។

នាយក​ប្រតិបត្តិ​គ្រឹះស្ថាន KREDIT លោក​ចាន់ ម៉ាច បាន​ប្រាប់​កាសែត​ភ្នំពេញ​ប៉ុស្តិ៍​កាល​ពី​ថ្ងៃ​ចន្ទ​ថា ក្រុមហ៊ុន PhillipCapital បាន​ក្លាយ​ជា​ម្ចាស់​ភាគ​ហ៊ុន​ធំ​មួយ​របស់​ក្រុមហ៊ុន​របស់​លោក​ចាប់​តាំង​ពី​ដើម​ឆ្នាំ​មក​ម៉្លេះ​ដែល​មាន​ន័យ​ថា PhillipCapital មាន​ភាគ​ហ៊ុន​ច្រើន​រហូត​ដល់​ប្រមាណ​៦៨​ភាគ​រយ​។ យើង​ទទួល​បាន​ការ​រីក​ចម្រើន​ច្រើន​នៅ​ពេល​ដែល​ក្រុមហ៊ុន​នេះ​ក្លាយ​ជា​ដៃ​គូ​របស់​យើង ព្រោះ​ពួក​គេ​នាំ​អ្នក​ជំនាញ​និង​បច្ចេក​វិទ្យា​ច្រើន​សម្រាប់​យើង​។

លោក Kevin Lim នាយក​ប្រតិបត្តិ​របស់​គ្រឹះស្ថាន​មីក្រូ​ហិរញ្ញវត្ថុ​First Finance មិន​បាន​លើក​ពី​ក្តី​បារម្ភ​ជុំវិញ​ការ​ច្របាច់​បញ្ចូល​គ្នា​នេះ​ទេ​។​លោក​បាន​ថ្លែង​ថា​៖ «​ប្រសិន​បើ​ពួក​គេ​ចង់​បញ្ចូល​MFI ទាំង​នេះ​មែន ពួក​គេ​ត្រូវ​ពិភាក្សា​ជាមួយ​ម្ចាស់​ភាគ​ហ៊ុន​ទាំង​នេះ​។ ប៉ុន្តែ​ឥឡូវ​នេះ យើង​មិន​មាន​ព័ត៌មាន​ណា​មួយ​ពី​ពួក​គេ​ទេ​។ វា​មិន​មែន​ជា​បញ្ហា​សម្រាប់​យើង​ទេ​»​។

លោក​បាន​ថ្លែង​បន្ត​ថា ក្រុមហ៊ុន PhillipCapital ក្លាយ​ជា​ម្ចាស់​ភាគ​ហ៊ុន​របស់​ស្ថាប័ន​របស់​លោក​ចាប់​តាំង​ពី​ឆ្នាំ​២០១១​មក​ម៉្លេះ ដោយ​ក្រុមហ៊ុន​នេះ កាន់​កាប់​ភាគ​ហ៊ុន​៤០​ភាគ​រយ​។

គ្រឹះស្ថាន​មីក្រូ​ហិរញ្ញវត្ថុ​ប្រាសាក់ ដែល​ជា​គ្រឹះស្ថាន​នាំ​មុខ​មួយ​ក្នុង​ចំណោម​MFI ជា​ច្រើន​នៅ​កម្ពុជា ក៏​បាន​ប្រាប់​កាសែត​ភ្នំពេញ​ប៉ុស្តិ៍​ផង​ដែរ​ថា គ្រឹះស្ថាន​នេះ​ក៏​មាន​ផែន​ការ​ដើម្បី​ក្លាយ​ខ្លួន​ជា​ធនាគារ​ពាណិជ្ជ​នៅ​ត្រឹម​ឆ្នាំ​២០១៤​ដែរ​។

ទោះ​ជា​យ៉ាង​ណា​អគ្គនាយក​ធនាគារ​ជាតិ​នៃ​កម្ពុជា​លោកស្រី ងួន សុខា បាន​សរសើរ​ដល់ MFI ដែល​អាច​ធ្វើ​ទំនើប​កម្ម​ខ្លួន​ឯង​ដល់​កម្រិត​ខ្ពស់​ជាង​មុន​ដែល​លោកស្រី​បាន​បញ្ជាក់​ថា​ក្នុង​ចំណោម MFI ទាំង​នោះ ត្រូវ​តែ​អនុលោម​តាម​លក្ខខណ្ឌ​ដ៏​តឹងរ៉ឹង​របស់​ធនាគារ​ពាណិជ្ជ។

លោកស្រី​បាន​មាន​ប្រសាសន៍​បន្ត​ថា៖ «​យើង​មាន​លក្ខខណ្ឌ​ជា​ច្រើន​ស្តី​ពី​ការ​ប្រែ​ពី MFI ទៅ​ជា​ធនាគារ​ពាណិជ្ជ​។ លក្ខខណ្ឌ​ទាំង​នេះ គឺ​តឹង​រ៉ឹង​ណាស់​ចំពោះ MFI ព្រោះ​ទំហំ​នៃ​សេវា​ដែល​ផ្តល់​ដោយ MFI គឺ​តូច​ដូច្នេះ​កម្រិត​ហានិភ័យ​របស់​ពួក​គេ មិន​ខ្ពស់ ហើយ​អាច​គ្រប់​គ្រង​បាន​»​។

ទោះបី​ជា​ពួក​គេ អាច​បំពេញ​តាម​លក្ខខណ្ឌ​ទាំង​នេះ​ក្តី​ក៏​យើង​នៅ​តែ​ពិនិត្យ​មើល​ផែន​ការ​ពាណិជ្ជ​កម្ម​របស់​ពួក​គេ។ យើង​នឹង​លើក​ទឹក​ចិត្ត​ដល់​ពួក​គេ ប្រសិន​បើ​ពួក​គេ អាច​ផ្តល់​សេវា​ថ្មី​មួយ​ដែល​ធនាគារ​ផ្សេង​ទៀត​មិន​មាន»​។

យោង​តាម​ធនាគារ​ជាតិ​នៃ​កម្ពុជា បាន​ឲ្យ​ដឹង​ថា ដើម្បី​ក្លាយ​ជា​ធនាគារ​ពាណិជ្ជ គ្រឹះស្ថាន​មីក្រូ​ហិរញ្ញវត្ថុ​ទាំង​អស់ ត្រូវ​តែ​បង្កើន​ដើម​ទុន​រហូត​ដល់​ចំនួន​៣៧,៥​លាន​ដុល្លារ​។ គួរ​បញ្ជាក់​ដែរ​ថា បច្ចុប្បន្ន​នេះ ក្នុង​ប្រទេស​កម្ពុជា​ធនាគារ​ពាណិជ្ជ​មាន​ចំនួន​៣២ ហើយ​គ្រឹះ​ស្ថាន​MFI មាន​ចំនួន​៣៣​៕ NR

អត្ថបទគួរចាប់អារម្មណ៍