.jpg)
ការប្រមូលផលស្រូវដោយប្រើគ្រឿងចក្ររបស់កសិករនៅខេត្តបាត់ដំបង នាពេលកន្លងមក។ ហេង ជីវ័ន
ភ្នំពេញៈ ឃ្លាំងស្តុក និងឡសម្ងួតស្រូវតម្លៃ ១៥ លានដុល្លារនៅខេត្តបាត់ដំបង បានប្រកាសដាក់ឲ្យដំណើរការជាផ្លូវការកាលពីម្សិលមិញ ខណៈឃ្លាំងស្ដុក ៣ ផ្សេងទៀតនឹងបើកដំណើរការនៅសប្ដាហ៍នេះ។ នេះបើយោងតាមអ្នកនៅក្នុងឧស្សាហកម្មនេះ។
ឃ្លាំងស្ដុកស្រូវ និងឡសម្ងួតដែលប្រតិបត្តិការដោយធនាគារស្រូវកម្ពុជា របស់លោក ភូ ពុយ បានទទួលមូលនិធិពីធនាគារអភិវឌ្ឍន៍ជនបទ (RDB) គ្រប់គ្រងដោយរដ្ឋចំនួន ១៥ លានដុល្លារកាលពីដើមឆ្នាំ ២០១៦។
ឃ្លាំងស្ដុកនេះមានសមត្ថភាពស្ដុកស្រូវសើម ២០០- ០០០ តោន និងសម្ងួតស្រូវ ៣ ០០០ តោនប្រចាំថ្ងៃ។
លោក ភូ ពុយ ប្រធានធនាគារស្រូវបានថ្លែងថាជាមួយនឹងវត្តមានឃ្លាំងស្ដុកដ៏ធំនេះកសិករនឹងធានាបាននូវតម្លៃស្រូវក្នុងស្រុក។ លោកថ្លែងថា៖ «ចាប់ពីពេលនេះតទៅយើងមានសមត្ថភាពគ្រប់គ្រាន់ក្នុងការប្រមូលស្រូវពីកសិករ និងធានាគុណភាពអង្ករសម្រាប់អ្នកទិញ កសិកររបស់យើងលែងបារម្ភអំពីទីផ្សារ និងតម្លៃទៀតហើយ»។
RDB បានផ្ដល់កម្ចីផ្សេងទៀតសរុប ១៥ លានដុល្លារឲ្យក្រុមហ៊ុនរោងម៉ាស៊ីនកិនស្រូវ ២ ផ្សេងទៀតគឺក្រុមហ៊ុនខ្មែរហ្វូត និង ក្រុមហ៊ុនអេមរុ រ៉ាយស៍ សម្រាប់ការសាងសង់ឃ្លាំងស្ដុកស្រូវនៅក្នុងខេត្តកំពង់ធំ ខេត្តព្រៃវែង និងខេត្តតាកែវ ផងដែរ។
ឃ្លាំងស្ដុកនីមួយៗមានសមត្ថភាពស្ដុកស្រូវសើម ៥០ ០០០ តោន និងសម្ងួតបាន ១ ៥០០ តោនប្រចាំថ្ងៃ។
ឃ្លាំងស្ដុកស្រូវ និងឡសម្ងួតនេះនឹងចូលរួមក្នុងការបង្កើនការនាំចេញអង្កររបស់ប្រទេសនេះព្រមទាំងរក្សាតម្លៃស្រូវក្នុងស្រុកផងដែរ។ នេះបើយោងតាមលោក សុង សារ៉ន អគ្គនាយកក្រុមហ៊ុននាំចេញអង្ករ អេមរុ រ៉ាយស៍។
ក្រុមហ៊ុន អេមរុ រ៉ាយស៍ ដែលទទួលកម្ចី ៥ លានដុល្លារកាលពីឆ្នាំមុន ដើម្បីសាងសង់ឃ្លាំងស្ដុកស្រូវនៅខេត្តកំពង់ធំ ពី RDB នឹងដំណើរការឃ្លាំងស្ដុកនេះនៅថ្ងៃនេះ ខណៈឃ្លាំងស្ដុក ២ ផ្សេងទៀតនៅខេត្តព្រៃវែង និងខេត្តតាកែវ ដែលគ្រប់គ្រងដោយរោងម៉ាស៊ីនកិនស្រូវ ខ្មែរហ្វូតនឹងបើកដំណើរការនៅថ្ងៃទី ៦ ខែកក្កដាខាងមុខ។
លោក សុង សារ៉ន បានថ្លែងថា៖ «ខ្ញុំមានទំនុកចិត្តថា យើងនឹងអាចកាត់បន្ថយលំហូរចេញស្រូវទៅប្រទេសជិតខាងសម្រាប់រដូវខាងមុខនេះ»។ លោកបន្តថា៖ «ឃ្លាំងស្ដុកស្រូវថ្មីរបស់យើងនឹងធានាគុណភាព និងស្ដង់ដារ និងអាចផ្គត់ផ្គង់ដល់អ្នកទិញក្នុងរយៈពេលកាន់តែវែងជាងមុន យើងនឹងជំរុញការនាំចេញអង្កររបស់យើងនៅឆ្នាំនេះ»។
ក្រសួងកសិកម្មកាលពីខែឧសភាបានដាក់ឲ្យដំណើរការឃ្លាំងស្ដុកស្រូវគាំទ្រដោយរដ្ឋាភិបាលកូរ៉េខាងត្បូងដែលមានតម្លៃ ២,៨ លានដុល្លារនៅក្នុងខេត្តកំពង់ចាម៕LA
