The Phnom Penh Post Search

Search form




Logo of Phnom Penh Post newspaper Phnom Penh Post - ចរន្ត​ថេបភ្លីត​កំពុង​វាយលុក​ទីផ្សារ​កុំព្យូទ័រ​យួរដៃ

ចរន្ត​ថេបភ្លីត​កំពុង​វាយលុក​ទីផ្សារ​កុំព្យូទ័រ​យួរដៃ

ចរន្ត​ថេបភ្លីត​កំពុង​វាយលុក​ទីផ្សារ​កុំព្យូទ័រ​យួរដៃ

130722_11
អតិថិជនកំពុងសាកល្បង Note របស់សាំស៊ុងដែលជាថេបភ្លីតកំពុងទទួលបានការពេញនិយមមួយនៅកម្ពុជា ម៉េង គឹមឡុង

ភ្នំពេញៈ ខណៈ​អ្នកស្រី​Damaityma Kao ដាក់​ទូរស័ព្ទ​មួយ​ចុះ​ក្នុង​ចំណោម​ទូរស័ព្ទ​ស្មាតហ្វូន​៣​គ្រឿង​របស់​គាត់​អ្នកស្រី​ក៏​បាន​និយាយ​ថា​តម្រូវការ​ទូរស័ព្ទ​ស្មាតហ្វូន​កំពុង​កើនឡើង​យ៉ាង​ឆាប់​រហ័ស​នៅ​កម្ពុជា​។

អ្នកស្រី​និយាយ​ថា​មាន​តម្រូវការ​ខ្ពស់​ស្នើ​គ្នា​គឺ​iPad និង​iPad mini​ហើយ​នៅ​កម្ពុជា​មាន​មនុស្ស​ប្រើ​ទូរស័ព្ទ​ស្មាតហ្វូន​និង​ថេបភ្លីត ច្រើន​ជាង​កុំព្យូទ័រ​យួរដៃ​និង​កុំព្យូទ័រ​លើ​តុ។

ការ​អង្កេត​មួយ​នៃ​ការ​លក់​ទូរស័ព្ទ​ស្មាតហ្វូន​ធ្វើ​ឡើង​ដោយ​ក្រុមហ៊ុន​ Gfk Asia​ បង្ហាញ​ថា ក្នុង​ទីផ្សារ​អាស៊ីអាគ្នេយ៍​ទូរស័ព្ទ​ស្មាតហ្វូន​ចំនួន​៤២,២​លាន​គ្រឿង​ត្រូវ​បាន​លក់​ក្នុង​អំឡុងពេល​ ១២​ ខែ​គិត​ដល់​ខែ​ឧសភា​ដែល​កើនឡើង​៨​ភាគរយ​ធៀប​នឹង​រយៈពេល​ដូច​គ្នា​កាល​ពី​ឆ្នាំ​មុន​។

ក្រុមហ៊ុន​ស្រាវជ្រាវ​ផ្សេង​ទៀត​ឈ្មោះ​Gartner បង្ហាញ​ថា​ការ​លក់​កុំព្យូទ័រ​នៅក្នុង​ទីផ្សារ​អាស៊ី​មាន​ចំនួន​ ២៦,៨ ​លាន​គ្រឿង​ធ្លាក់​ចុះ ​១១,៥ ​ភាគរយ​។

នៅក្នុង​រយៈពេល​ពីរ​ឆ្នាំ​ក្នុង​ឋានៈ​ជា​អ្នក​គ្រប់គ្រង​ទីផ្សារ​នៅ​ក្រុមហ៊ុន ​iOne ​លោកស្រី​ Damaityma Kao បាន​ឃើញ​តម្រូវការ​សម្រាប់​កុំព្យូទ័រ iMacs ធ្លាក់​ចុះ​ហើយ ​MacBook កើនឡើង​ប៉ុន្តែ​ការ​លក់​ iPad កើនឡើង​។

អ្នកស្រី​បាន​បន្ដ​ថា ការ​លក់​ថេបភ្លីត នៅ​ក្រុមហ៊ុន iOne​ដែល​ជា​ឈ្មួញ​ទទួល​បាន​សិទ្ធិ​លក់​ផលិតផល​ Apple នៅ​កម្ពុជា​កំពុង​កើនឡើង​យ៉ាង​រហ័ស​ដោយសារ​តែ​វា​ជា​ផលិតផល​ថ្មី​មួយ​ហើយ​មាន​ភាព​ប្លែក​ពី​គេ​។​អ្នកស្រី​បញ្ជាក់​ថា​៖​«​មនុស្ស​ជាច្រើន​ចង់​ទិញ​ផលិតផល​ទាំងនោះ​ភា្លម​ៗ​នៅ​ពេល​ការ​នាំ​ចូល​ថ្មី​ពី​ក្រុមហ៊ុន ​Apple ​»។

ប៉ុន្តែ​អ្នកស្រី​បាន​និយាយ​ថា ក្រុមហ៊ុន ​iOne​ មិន​មាន​ការ​បារម្ភ​អំពី​ការ​ធ្លាក់​ចុះ​នៃ​លក់​សម្រាប់​កុំព្យូទ័រ​យួរដៃ​និង​កុំព្យូទ័រ​លើ​តុ​នោះ​ទេ​។ អ្នកស្រី​បាន​បញ្ជាក់​ថា​៖ «​មាន​មុខងារ​ជាក់ស្ដែង​ដែល​មិន​អាច​ត្រូវ​បាន​ជំនួស​ដោយ​ថេបភ្លីត​បាន​នោះ​ទេ​»។

អ្នកស្រី​លើក​ឡើង​ថា​ទូរស័ព្ទ​ស្មាតហ្វូន​និង​ថេបភ្លីត​គឺជា​សេចក្ដី​ត្រូវការ​មួយ​សម្រាប់​មនុស្ស​គ្រប់​ៗ​គ្នា​និង​ការ​កម្សាន្ត​ផ្ទាល់​ខ្លួន​កុំព្យូទ័រ​យួរដៃ​និង​កុំព្យូទ័រ​លើ​តុ​ជា​សេចក្ដី​ត្រូវការ​សម្រាប់​ក្រុម​មនុស្ស​ជាក់លាក់​មួយ​សម្រាប់​ធ្វើ​ការងារ​។

ការ​ប្រើប្រាស់​កុំព្យូទ័រ​ហាក់​នៅ​ទ្រឹង​នៅ​តាម​គ្រួសារ​ជាច្រើន​នៅ​កម្ពុជា​ហើយ​លទ្ធភាព​នៃ​ការ​ផ្លាស់ប្តូរ​នៅ​មាន​កម្រិត​ទាប​។ ​គ្រួសារ​មាន​សមាជិក​ច្រើន​អាច​ប្រើ​កុំព្យូទ័រ​យួរដៃ​ឬ​កុំព្យូទ័រ​លើ​តុ​រួម​គ្នា​បាន​តែ​ពួកគេ​ទំនង​ជា​មិន​ចង់​ប្រើ​ថេបភ្លីត​រួម​គ្នា​នោះ​ទេ​ដែល​អ្នកស្រី​បាន​បញ្ជាក់​ថា គឺជា​ធម្មតា​ «​មាន​ការ​បន្ថែម​កុំព្យូទ័រ​យួរដៃ​និង​កុំព្យូរទ័រ​លើ​តុ​»​។

អ្នកស្រី​ថ្លែង​ថា វា​ជា​ស្ថានការណ៍​ដូច​គ្នា​នៅក្នុង​គ្រួសារ​របស់​អ្នកស្រី​។​រវាង​ខ្លួន​អ្នកស្រី​បងប្អូន​ប្រុស​របស់​អ្នកស្រី​និង​ឪពុក​ពួកគេ​មាន​ MacBook ពីរ​គ្រឿង​និង iPad ៣​ គ្រឿង​។​អ្នកស្រី​បន្ត​ថា​ឪពុក​អ្នកស្រី​មិន​ត្រូវការ​មាន​អ្វី​ៗ ​នៅ​លើ​កុំព្យូទ័រ​យួរដៃ​ទេ​មាន iPad  មួយ​គ្រឿង​គឺ​គ្រប់គ្រាន់​ក្នុង​ការ​កម្សាន្ត​សម្រាប់​គាត់​ហើយ​។

លោក​កុយ សូណាក់​មាន​គំនិត​ស្រដៀង​គ្នា​អំពី​អនាគត​នៃ​ការ​ប្រើប្រាស់​កុំព្យូទ័រ​លើ​តុ​នៅ​កម្ពុជា​។

លោក​កុយ សូណាក់​ដែល​ជា​អ្នក​គ្រប់គ្រង​ទូទៅ​នៅ​ក្រុមហ៊ុន​អាណាណា​កុំព្យូទ័រ​និយាយ​ថា​តម្រូវការ​សម្រាប់​កុំព្យូទ័រ​លើ​តុ​កំពុង​ធ្លាក់​ចុះ​ដោយសារ​តែ​«​មនុស្ស​ជាច្រើន​ចូលចិត្ត​កុំព្យូទ័រ​ចល័ត​»។​

លោក​បន្ត​ថា ការ​លក់​កុំព្យូទ័រ​លើ​តុ​មិន​ទទួលរង​ផលប៉ះពាល់​ដោយសារ​តែ​ការ​កើនឡើង​ការ​លក់​ថេបភ្លីត​ទេ វា​ដូចជា​ការ​ចូលចិត្ត​របស់​អ្នក​ប្រើប្រាស់​ដែល​កំពុង​លម្អៀង​ទៅ​រក​ការ​ប្រើប្រាស់​កុំព្យូទ័រ​យួរដៃ​ដែល​កំពុង​ប្រកួតប្រជែង​ជាមួយ​នឹង​ការ​ប្រើប្រាស់​កុំព្យូទ័រ​លើ​តុ​អ៊ីចឹង។

ការ​លក់​កុំព្យូទ័រ​លើ​តុ​នៅ​ក្រុមហ៊ុន​អាណាណា​បាន​កើនឡើង​១៥​ភាគរយ​ក្នុង​ឆ្នាំ​កន្លង​មក​ចំណែក​ការ​លក់​កុំព្យូទ័រ​យួរដៃ​បាន​កើនឡើង​២៥​ភាគរយ​។

លោក​លើក​ឡើង​ថា កម្ពុជា​មាន​កង្វះ​អគ្គិសនី​នៅ​តាម​ផ្ទះ​។ ក្នុង​ពេល​ដាច់​ចរន្តអគ្គិសនី​កុំព្យូទ័រ​លើ​តុ​អាច​បិទ​ភ្លាម​ៗ​ប៉ុន្តែ​កុំព្យូទ័រ​យួរដៃ​នឹង​បន្ត​ដំណើរការ​ដោយសារ​មាន​ថ្ម​។

លោក​បញ្ជាក់​ថា​៖​«​កុំព្យូទ័រ​លើ​តុ​គឺ​ច្បាស់​ណាស់​កំពុង​ធ្លាក់​ចុះ​សម្រាប់​អ្នក​ប្រើប្រាស់​ជា​ទូទៅ​កុំព្យូទ័រ​យួរដៃ​គឺ​កំពុង​កើនឡើង​ព្រម​ទាំង​ស្មាតហ្វូន​ផង​ដែរ​។ ​ខ្ញុំ​គិត​ថា​ថេបភ្លីត​កំពុង​កើនឡើង​ប៉ុន្តែ​មិន​ច្រើន​ដូច​ស្មាតហ្វូន​នោះ​ទេ​។

ដោយសារ​វា​ជា​ឧបករណ៍​កូនកាត់​រវាង​ស្មាតហ្វូន​និង​កុំព្យូទ័រ​យួរដៃ​ថេបភ្លីត​ជា​ការ​លើក​ទឹកចិត្ត​មួយ​ប៉ុន្តែ​លោក​មិន​គិត​ថា​អ្នក​ប្រើប្រាស់​ជាច្រើន​យល់​ថា​ទំនិញ​ទាំងនោះ​មាន​តម្លៃ​នោះ​ទេ​។

កែវ​ពុទ្ធី​អ្នក​បម្រើ​ម្នាក់​មាន​វ័យ​២០​ឆ្នាំ​យល់ស្រប​គំនិត​នេះ។​បច្ចុប្បន្ន​ស្ត្រី​រូប​នេះ​ប្រើ​ទូរស័ព្ទ​ស្មាតហ្វូន​សូនី​។​ពុទ្ធី​និយាយ​ថា​បើ​គាត់​ត្រូវ​ទិញ​មួយ​ទៀត​គាត់​គិតថា​កុំព្យូទ័រ​យួរដៃ​អាច​មាន​ប្រយោជន៍​ច្រើន​ជាង​កុំព្យូទ័រ​លើ​តុ​ឬ​ថេបភ្លីត​។

លោក​ហុក ឡងឌី​មាន​អាយុ​២២​ឆ្នាំ​កំពុង​សិក្សា​ទីផ្សារ​នៅ​សាកលវិទ្យាល័យ​អន្តរជាតិ​ភ្នំពេញ​គឺជា​និស្សិត​ម្នាក់​ដូចជា​និស្សិត​ដទៃ​ទៀត។​លោក​មិន​មាន​កុំ​ព្យូទ័រ​យួរដៃ​ឬ​កុំព្យូទ័រ​លើ​តុ​ទេ​។​លោក​បាន​និយាយ​ថា​វា​មាន​តម្លៃ​ថ្លៃ​ណាស់​សម្រាប់​លោក​ប៉ុន្តែ​លោក​ថា​លោក​និង​ជ្រើសរើស​យក MacBook ឬ​ iMac។

និស្សិត​រូប​នេះ​មាន​ទាំង iPhone និង ​iPad ​ហើយ​ថា​៖ «​កម្មវិធី​ដែល​ខ្ញុំ​ប្រើ​គឺ​ដូច​នឹង​កម្មវិធី​របស់ ​MacBook និង ​iPad វា​គឺ​គ្រប់គ្រាន់​ហើយ​សម្រាប់​ពេល​នេះ​»​។

តាម​ការ​ស្រាវជ្រាវ​របស់ Gfk​ទំហំ​នៃ​ការ​លក់​សរុប​នៅ​អាស៊ីអាគ្នេយ៍​(​សិង្ហបុរី​ម៉ាឡេស៊ី​ថៃ​វៀតណាម​ឥណ្ឌូនេស៊ី​ហ្វីលីពីន​និង​កម្ពុជា​) មាន​ចំនួន​លើស ១១​ ពាន់​លាន​ដុល្លារ​អាមេរិក​ដែល​កើនឡើង ​១៤ ​ភាគរយ​។​ ការ​លក់​ទូរស័ព្ទ​ស្មាតហ្វូន​មាន ​៣,៤ ​ពាន់​លាន​ដុល្លារ​និង​១៦​លាន​គ្រឿង​ក្នុង​អំឡុង​រយៈពេល​នេះ​ច្រើន​ជាង​កាល​ពី​ឆ្នាំ​មុន​។

តាម​តួលេខ​សកល​ក្នុង​ការ​អង្កេត​មួយ​ធ្វើ​ឡើង​ដោយ​ក្រុមហ៊ុន​ស្រាវជ្រាវ Gartner បង្ហាញ​ថា​ការ​លក់​កុំព្យូទ័រ​បាន​ធ្លាក់​ចុះ​រហូត​ដល់​៧៦​លាន​គ្រឿង​ទាប​ជាង​ត្រីមាស​ទី​២ ១០,៩ ភាគរយ បើ​ធៀប​នឹង​រយៈពេល​ដូចគ្នា​កាលពី​ឆ្នាំ​ទៅ​។​ នៅ​លើ​ទីផ្សារ​អាស៊ី​កុំព្យូទ័រ​ចំនួន​ ២៦,៨​ លាន​គ្រឿង​ ត្រូវ​បាន​លក់​ចេញ​ ក្នុង​អំឡុងពេល​ ១២ ​ខែ ​គិត​មក​ត្រឹម​ខែ​ឧសភា​ធ្លាក់​ចុះ​ ១១,៥ ​ភាគរយ​៕ PB

អត្ថបទគួរចាប់អារម្មណ៍