The Phnom Penh Post Search

Search form




Logo of Phnom Penh Post newspaper Phnom Penh Post - ចរាចរណ៍​ទំនិញ​តាម​កំពង់ផែ​កើន ​១៦ ​ភាគរយ

ចរាចរណ៍​ទំនិញ​តាម​កំពង់ផែ​កើន ​១៦ ​ភាគរយ

ចរាចរណ៍​ទំនិញ​តាម​កំពង់ផែ​កើន ​១៦ ​ភាគរយ

131028_11
ទិដ្ឋភាពនៅកំពង់ផែស្វយ័តក្រុងព្រះសីហនុនាពេលកន្លងមក ភ្នំពេញ ប៉ុស្តិ៍

ខេត្ត​ព្រះសីហនុៈ ចរាចរណ៍​ទំនិញ​ឆ្លងកាត់​តាម​កំពង់ផែ​ស្វយ័ត​ ក្រុង​ព្រះសីហនុ ​(SAP) ​ដែល​ជា​កំពង់ផែ​សមុទ្រ​ទឹក​ជ្រៅ​នៅ​កម្ពុជា​កើនឡើង​ជាង​ ១៦ ​ភាគរយ ​ក្នុង​រយៈពេល ​៩ ​ខែ ឆ្នាំ​នេះ ​បើ​ធៀប​នឹង​រយៈពេល​ដូចគ្នា​កាលពី​ឆ្នាំ​ទៅ។ ​នេះ​បើ​តាម ​ទិន្នន័យ​ផ្លូវការ​របស់​កំពង់ផែ​បាន​ចេញ​ផ្សាយ​ កាលពី​ថ្ងៃ​សុក្រ។

ទិន្នន័យ​នេះ​បាន​បង្ហាញ​ថា​ទំនិញ​ប្រហែល​ ២ ២៧១ ១៧៧ ​តោន​ត្រូវ​បាន​ដឹកជញ្ជូន​តាម​កំពង់ផែ​ក្នុង​រយៈពេល​នេះ​ធៀប​នឹង​ទំនិញ​ ១ ៩៥៣ ០០១ ​តោន ​ក្នុង​រយៈពេល​ដូចគ្នា​កាលពី​ឆ្នាំ​មុន​គឺ​កើន ​១៦,២៩ ​ភាគរយ។

នៅក្នុង​នោះ​ចំនួន​នៃ​ការ​នាំ​ចេញ​សរុប​បាន​កើនឡើង​ជិត ​១៥០ ​ភាគរយ ​រហូត​ដល់ ​៥៩៤ ៤២៤ តោន​ធៀប​នឹង ៤០៧ ៥​៧៨ ​តោន ​ខណៈ​ចំនួន​នៃ​ការ​នាំ​ចូល​សរុប​បាន​កើនឡើង​ ១០៨,៥​ ភាគរយ ​ដល់ ​១ ៦៧៦ ​៧៥​៣ ​តោន​ធៀប​នឹង ​១ ៥៤៥ ​៤២៣ ​តោន ​នៅក្នុង​រយៈពេល​ដូច​គ្នា ​កាលពី​ឆ្នាំ​មុន។

លោក​ ជា​ សម្បត្តិ ប្រធាន​នាយកដ្ឋាន ​ផែនការ ​និង​ទីផ្សារ ​របស់​កំពង់ផែ​ស្វយ័ត​ក្រុង ​ព្រះសីហនុ​ បាន​ប្រាប់​ ភ្នំពេញ​ ប៉ុស្ដិ៍ ​នៅ​ថ្ងៃ ​អាទិត្យ ​ថា កំណើន​នៃ​ការ​នាំ​ចេញ​ទំនិញ​កំពុង​បញ្ជាក់​ពី​ស្ថិរភាព​កំណើន​សេដ្ឋកិច្ច​របស់​ប្រទេស​នេះ ​ទោះ​បី​ជា ​មាន​វិបត្តិ​នយោបាយ​ក៏​ដោយ។

លោក​បន្ត​ថា​៖ «​ជា​ធម្មតា ​ការ​កើនឡើង​ចរាចរណ៍​ទំនិញ​នៅ​កំពង់ផែ​នេះ​ គឺជា​ ផ្នែក​មួយ​បង្ហាញ​ថា​ សេដ្ឋកិច្ច​របស់​យើង​ព្រម​ទាំង​សេដ្ឋកិច្ច​ក្នុង ​តំបន់ ​និង​សេដ្ឋកិច្ច ​ពិភពលោក​ កំពុង​ល្អ​ប្រសើរ​ឡើង។ លើសពី​នេះ ​កំណើន​នៃ​ការ​នាំ​ចូល​និង​នាំ​ចេញ​ទំនិញ​ កំពុង​ឆ្លុះ​បញ្ចាំង​ពី​កំណើន​សេដ្ឋកិច្ច​របស់​យើង​ ទោះបី​ជា​ មាន​បាតុកម្ម​មួយ​ចំនួន​ធ្វើ​ឡើង​ដោយ​គណបក្ស​ប្រឆាំង​ក៏​ដោយ​ ខ្ញុំ​នៅ​តែ​មើល​ឃើញ​ទំនិញ​ នាំ​ចូល ​នាំ​ចេញ ​នៅ​កំពង់ផែ​នេះ​ កំពុង​កើនឡើង​»។

កាលពី​ដើម​ខែ​នេះ ​មូលនិធិ​រូបិយវត្ថុ​អន្តរជាតិ ​(IMF) ​បាន​បង្កើន​ការ​ព្យាករ​កំណើន​សេដ្ឋកិច្ច​ឆ្នាំ ​២០១៣ ​នៅ​កម្រិត ​៧ ​ភាគរយ ​កើនឡើង​ពី​ការ​ព្យាករ ​កាលពី​ខែ​ មេសា​ ៦,៧ ​ភាគរយ។ ​នៅក្នុង​ការ​ធ្វើ​បច្ចុប្បន្ន​ភាព​ក្នុង​ពេល​ថ្មី​ៗ ​ធនាគារ​អភិវឌ្ឍន៍​អាស៊ី​ (ADB) ​បាន​រក្សា​ការ​ព្យាករ​កំណើន​ ៧,២ ​ភាគរយ​។ ​ទិន្នន័យ​បាន​បង្ហាញ​ថា ​ផលិតផល​នាំ​ចេញ​ភាគច្រើន ​គឺ​ សម្លៀកបំពាក់ ​និង ​ផលិតផល ​កសិកម្ម ​មួយ​ចំនួន​ដូចជា ​អាកាស្យា ​កែច្នៃ ​ដំឡូង​ ពិសេស ​អង្ករ និង ​ផលិតផល ​នាំ​ចូល ​ជា​វត្ថុ ធាតុ​ដើម ​ផ្នែក​ឧស្សាហកម្ម ​និង ​គ្រឿង​សំណង់ រថយន្ត ​និង ​ប្រេង ។ល។

លោក​ លឹម ប៊ុនហេង ​ប្រធាន​ក្រុមហ៊ុន ​ឡូរ៉ង់ ​ដែល​ជា​ក្រុមហ៊ុន​នាំ​ចេញ​ អង្ករ ​ឈាន​មុខ​មួយ​នៅ​ កម្ពុជា ​បាន​និយាយ​ថា ​កំពង់ផែ​ស្វយ័ត​ក្រុង​ ព្រះសីហនុ​ ជា​កំពង់ផែ​សម្រាប់​ការ​ដឹកជញ្ជូន​ផ្លូវ​ឆ្ងាយ​ដ៏​សំខាន់​នៅ​កម្ពុជា។

​លោក​បន្ត​ថា​៖ ​«​តាម​ភាគច្រើន​ខ្ញុំ​ប្រើ​កំពង់ផែ​នេះ​ ដើម្បី​នាំ​ចេញ​ អង្ករ ​ទៅ​ប្រទេស​នៅ​ អឺរ៉ុប ​អាមេរិក ​កាណាដា ខណៈ ​កំពង់ផែ​ស្វយ័ត ​ភ្នំពេញ ​ប្រើ​សម្រាប់​នាំ​ចេញ​នៅក្នុង​តំបន់​ ដូចជា ​សិង្ហបុរី ​ម៉ាឡេស៊ី​ និង ​ចិន​»។ ​ក្នុង​រយៈពេល​ ៩ ​ខែ ​ឆ្នាំ​នេះ​ ក្រុមហ៊ុន​លោក​នាំ​ចេញ​អង្ករ​ជាង ​២៦ ​០០០ ​តោន ​ក្នុង​នោះ​ ៥៥ ​ភាគរយ ​ទៅ ​អឺរ៉ុប។

លោក​ ជា ​សម្បត្តិ ​សង្ឃឹម​ថា ​កំណើន​ នឹង​បន្ត​កើន​ដល់​ចុង ​ឆ្នាំ​នេះ៕PB

អត្ថបទគួរចាប់អារម្មណ៍