.jpg)
កម្មករកំពុងធ្វើការនៅទីតាំងរ៉ែមួយកន្លែងក្នុង ប្រទេស ចិន។ AFP
ក្រុងប៉េកាំងៈ គណៈកម្មការអភិវឌ្ឍន៍ និងកែទម្រង់ជាតិ (NDRC) របស់ប្រទេស ចិន កាលពីថ្ងៃចន្ទ បានបង្ហាញការជំទាស់យ៉ាងខ្លាំងចំពោះការប៉ុនប៉ងក្នុងការប្រើប្រាស់ផលិតផលដែលផលិតជាមួយនឹងធនធានរ៉ែកម្ររបស់ប្រទេស ចិន ប្រឆាំងនឹងការអភិវឌ្ឍរបស់ប្រទេស ចិន។
លោកស្រី Meng Wei អ្នកនាំពាក្យ NDRC បានថ្លែងថា៖ «យើងជំទាស់យ៉ាងខ្លាំងរាល់ការប៉ុនប៉ងណាមួយ ក្នុងការប្រើប្រាស់ផលិតផលដែលផលិតជាមួយនឹងធនធានរ៉ែកម្ររបស់ប្រទេស ចិន ដើម្បីទប់ស្កាត់ និងបង្រ្កាបដល់ការអភិវឌ្ឍរបស់ប្រទេស»។
លោកស្រី Meng បានថ្លែងនៅក្នុងសន្និសីទព័ត៌មានមួយ នៅពេលស្នើសុំការអត្ថាធិប្បាយអំពីថា តើរ៉ែកម្រនឹងក្លាយជាវិធានការតបតរបស់ចិនវិញដែរ ឬយ៉ាងណា ក្នុងគ្រាដែលជម្លោះពាណិជ្ជកម្មកើនឡើងខ្លាំងជាមួយអាមេរិកដែរ។
លោកស្រីឲ្យដឹងថា ប្រទេស ចិន តែងតែគាំទ្រប្រព័ន្ធពាណិជ្ជកម្មពហុភាគី និងការធ្វើសកលភាវូបនីយកម្មសេដ្ឋកិច្ច និងលើកកម្ពស់ការអភិវឌ្ឍឧស្សាហកម្មរ៉ែកម្រដោយបើកចំហ សហការ និងវិធីសាស្ដ្ររួម។
ប្រទេស ចិន មានកំណប់រ៉ែកម្រឈានមុខគេ និងជាប្រទេសផលិតធនធានរ៉ែកម្រធំជាងគេលើពិភពលោក។
លោកស្រី Meng ឲ្យដឹងថា ប្រទេស ចិន មានបំណងឆ្លើយតបទៅនឹងតម្រូវការស្របច្បាប់របស់បណ្ដាប្រទេសផ្សេងទៀតសម្រាប់ការអភិវឌ្ឍ តាមរយៈការផ្ដល់ធនធាន និងផលិតផលរ៉ែកម្រ ប៉ុន្តែយើងជំទាស់យ៉ាងខ្លាំងទៅនឹងការអនុវត្តរបស់ប្រទេសមួយចំនួនដែលមិនអើពើច្បាប់ពាណិជ្ជកម្មពិភពលោក និងបំផ្លាញចង្វាក់ឧស្សាហកម្មរបស់ពិភពលោក។
ថ្មីៗនេះ NDRC បានរៀបចំកិច្ចពិភាក្សាចំនួន ៣ លើករួចហើយ ដើម្បីស្តាប់យោបល់ពីក្រុមអ្នកជំនាញឧស្សាហកម្ម សហគ្រាសធំៗ និងអាជ្ញាធរមូលដ្ឋាន៕ People''s Daily/LA
