ក្រុងប៉េកាំងៈ ទីក្រុងប៉េកាំងកាលពីថ្ងៃអង្គារបានចោទប្រកាន់លោកប្រធានាធិបតី ដូណាល់ ត្រាំ ថាកំពុង «គំរាមយកផលប្រយោជន៍» និងបានព្រមានថា ខ្លួននឹងសងសឹកក្នុងរបៀបដូចគ្នា បន្ទាប់ពីប្រធានាធិបតីអាមេរិកបានគំរាមដកហូតពន្ធថ្មីទៅលើទំនិញរបស់ប្រទេសចិន ដែលនេះជាការជំរុញឲ្យប្រទេសដែលសេដ្ឋកិច្ចដ៏ធំបំផុតទាំង ២ ក្នុងពិភពលោកនេះខិតជិតទៅរកសង្គ្រាមពាណិជ្ជកម្ម។
លោក ត្រាំ បានថ្លែងកាលពីថ្ងៃចន្ទថាលោកបានសូមឲ្យតំណាងពាណិជ្ជកម្មអាមេរិកកំណត់ទិសដៅទៅលើការនាំចូលដែលមានតម្លៃ ២០០ ពាន់លានដុល្លារពីចិន ដើម្បីដាក់ពន្ធ ១០ ភាគរយ។
លោកបានបន្ថែមថាលោកនឹងកំណត់អត្តសញ្ញាណទំនិញចំនួន ២០០ ពាន់លានដុល្លារបន្ថែមទៀតដែលសរុបទៅអាច ៤៥០ ពាន់លានដុល្លារ ឬជាការនាំចូលភាគច្រើនបំផុតរបស់ចិន «ប្រសិនបើចិនដំឡើងពន្ធគយរបស់ខ្លួនជាថ្មីម្តងទៀត»។
កាលពីសប្តាហ៍មុនលោកបានប្រកាសពន្ធគយ ២៥ ភាគរយទៅលើការនាំចូលរបស់ចិនចំនួន ៥០ ពាន់លានដុល្លារដែលនេះបានធ្វើឲ្យទីក្រុងប៉េកាំងសងសឹកជាមួយនឹងការដាក់ពន្ធគយទៅលើទំនិញរបស់អាមេរិកដូចគ្នា។
ក្រសួងពាណិជ្ជកម្មចិនបានឆ្លើយតបភ្លាមៗដោយនិយាយថា «ការអនុវត្តដាក់សម្ពាធយ៉ាងក្រៃលែង និងការគំរាមយកប្រាក់របស់អាមេរិកគឺមិនមានការព្រមព្រៀងពីភាគីទាំង ២ ក្នុងអំឡុងការចរចាជាច្រើនហើយក៏បានធ្វើឲ្យសង្គមអន្តរជាតិខកចិត្តយ៉ាងខ្លាំងផងដែរ»។ ក្រសួងបានឲ្យដឹងថា ប្រសិនបើអាមេរិកប្រព្រឹត្តឥរិយាបថមិនត្រឹមត្រូវ ចិនគ្មានជម្រើសអ្វីក្រៅពីការឆ្លើយតបយ៉ាងពេញទំហឹងវិញនូវចំនួន និងបរិមាណដូចគ្នានោះទេ៕ PS