ក្រុងប៉េកាំងៈ ប្រទេស ចិន កាលពីថ្ងៃសុក្របានបង្កើនសង្គ្រាមពាក្យសម្តីជាមួយអាមេរិកជុំវិញបញ្ហាក្រុមហ៊ុន Huawei ដោយចោទប្រកាន់ទីក្រុងវ៉ាស៊ីនតោនថា បានសាបព្រោះ «ការកុហក» អំពីការរុញច្រានក្រុមហ៊ុនទូរគមនាគមន៍ឈានមុខគេមួយនេះឲ្យចូលទៅក្នុងចំណុចកណ្ដាលនៃសង្គ្រាមពាណិជ្ជកម្មរបស់ប្រទេសទាំង ២។
ការឆ្លើយតបយ៉ាងខ្លាំងនេះ បានធ្វើឡើងរយៈពេលប៉ុន្មានម៉ោង បន្ទាប់ពីលោក Mike Pompeo រដ្ឋមន្ដ្រីក្រសួងការបរទេសអាមេរិក បានច្រានចោលការបដិសេធរបស់ក្រុមហ៊ុន Huawei ថា ក្រុមហ៊ុនរបស់ប្រទេស ចិន មួយនេះធ្វើការងារជាមួយរដ្ឋាភិបាលកុម្មុយនីស្ដចិន។
រដ្ឋបាលលោក ត្រាំ បានធ្វើឲ្យទីក្រុងប៉េកាំងខឹងសម្បា តាមរយៈការដាក់ក្រុមហ៊ុនស្មាតហ្វូន និងទូរគមនាគមន៍មួយនេះចូលក្នុងបញ្ជីខ្មៅ ដោយសារការបារម្ភថា ប្រទេស ចិន ប្រើប្រាស់ក្រុមហ៊ុននេះជាឧបករណ៍ស៊ើបការណ៍ និងការចោទប្រកាន់ពីបទមិនគោរពការដាក់ទណ្ឌកម្មអ៊ីរ៉ង់។
ក្រុមហ៊ុន Huawei បានបដិសេធម្ដងហើយម្ដងទៀតថា ក្រុមហ៊ុនរបស់ខ្លួនមិនបានធ្វើការងារជាមួយរដ្ឋាភិបាលកុម្មុយនីស្ដចិននោះទេ។
លោក Pompeo បានប្រាប់ទូរទស្សន៍ CNBC កាលពីថ្ងៃព្រហស្បតិ៍ថា៖ «ការនិយាយថា ពួកគេមិនធ្វើការងារជាមួយរដ្ឋាភិបាលចិន គឺជាការនិយាយមិនពិត»។ លោកបន្ថែមថា ក្រុមហ៊ុន Huawei មាន «ទំនាក់ទំនងយ៉ាងខ្លាំង» ជាមួយបក្សកុម្មុយនីស្ដចិន។
លោក Lu Kang អ្នកនាំពាក្យក្រសួងការបរទេសរបស់ប្រទេស ចិន បានឲ្យដឹងថា ក្រុមអ្នកនយោបាយអាមេរិកបានសាបព្រោះពាក្យចចាមអារ៉ាមអំពីក្រុមហ៊ុន Huawei ដោយមិនផ្ដល់ភ័ស្ដុតាង។
លោក Lu បានឲ្យដឹងក្នុងសន្និសីទព័ត៌មានខ្លីជាប្រចាំមួយថា៖ «ក្រុមអ្នកនយោបាយអាមេរិកទាំងនេះ បន្តប្រឌិតគំនិតផ្សេងៗ ពាក្យកុហកស្មានៗ ក្នុងគោលបំណងធ្វើឲ្យពលរដ្ឋអាមេរិកយល់ខុសហើយនៅពេលនេះ ពួកគេកំពុងព្យាយាមអុជអាលឲ្យមានការប្រឆាំងផ្នែកមនោគមន៍វិជ្ជា»។
លោក ត្រាំ កាលពីថ្ងៃព្រហស្បតិ៍ជាថ្មីម្ដងទៀតបានឲ្យដឹងថា ក្រុមហ៊ុន Huawei បានបង្កការគំរាមកំហែងដល់សន្ដិសុខជាតិ។
លោកបានប្រាប់ក្រុមអ្នកយកព័ត៌មាននៅសេតវិមានថា៖ «អ្នកសម្លឹងមើលអ្វីដែលពួកគេបានធ្វើពីចំនួនសន្ដិសុខ ជាទស្សនៈផ្នែកយោធា។ គ្រោះថ្នាក់ខ្លាំងណាស់»។
វោហារស័ព្ទដែលឡើងកម្តៅនេះកើតមានឡើង ខណៈការចរចាពាណិជ្ជកម្មបានជាប់គាំង ដោយភាគីទាំង ២ មិនបានប្រកាសកាលបរិច្ឆេទថ្មីណាមួយក្នុងការបន្តការចរចាជាថ្មីនោះទេ បន្ទាប់ពីពួកគេបានបង្កើនពន្ធនាំចូលទៅវិញទៅមកកាលពីដើមខែនេះ៕ AFP/LA