ក្រុងប៉េកាំងៈ ក្រសួងពាណិជ្ជកម្មចិនបានឲ្យដឹងកាលពីថ្ងៃព្រហស្បតិ៍ថា ចិននឹងបញ្ជូនអ្នកចរចាជាន់ខ្ពស់ទៅសហរដ្ឋអាមេរិកនៅចុងខែសីហានេះ ដើម្បីបន្តការចរចាពាណិជ្ជកម្មឡើងវិញ ដែលជាកិច្ចប្រជុំសាធារណៈលើកដំបូងក្នុងរយៈពេលជាច្រើនសប្ដាហ៍ទាក់ទងនឹងប្រធានបទនេះ ខណៈជម្លោះពាណិជ្ជកម្មមាន សភាពកាន់តែខ្លាំងឡើង។
ក្រសួងពាណិជ្ជកម្មឲ្យដឹងក្នុងសេចក្ដីប្រកាសព័ត៌មានមួយថាលោក Wang Shouwen អនុរដ្ឋមន្ដ្រីក្រសួងពាណិជ្ជកម្មដែលជាអនុអ្នកតំណាងទទួលបន្ទុកលើការចរចាពាណិជ្ជកម្មអន្តរជាតិនឹងជួបជាមួយលោក David Malpass មន្ដ្រីក្រសួងសេដ្ឋកិច្ចជាន់ខ្ពស់អាមេរិកតាមការអញ្ជើញរបស់អាមេរិក។
ក្រសួងបន្តថា៖ «ភាគីចិនបញ្ជាក់ម្ដងទៀតថា ខ្លួនជំទាស់នឹងការអនុវត្តជាឯកតោភាគី និងកិច្ចគាំពារនិយមពាណិជ្ជកម្ម និងក៏មិនទទួលយកវិធានការរឹតបន្តឹងពាណិជ្ជកម្មឯកតោភាគីណាមួយផងដែរ»។
ក្រសួងឲ្យដឹងទៀតថា៖ «ចិនស្វាគមន៍ការសន្ទនា និងទំនាក់ទំនងដោយឈរលើមូលដ្ឋានផ្ដល់អត្ថប្រយោជន៍ឲ្យគ្នាទៅវិញទៅមក សមភាព និងសុចរិតភាព»។
លោក Wilbur Ross រដ្ឋមន្ដ្រីក្រសួងពាណិជ្ជកម្មអាមេរិកបានជួបចរចាជាមួយលោក Liu He ឧបនាយករដ្ឋមន្ដ្រីចិននៅទីក្រុងប៉េកាំងកាលពីខែមិថុនា។
ប៉ុន្តែការពិភាក្សាបានបរាជ័យក្នុងការកាត់បន្ថយភាពតានតឹង ដោយសារតែអាមេរិកបានដកហូតពន្ធនាំចូលលើទំនិញរបស់ប្រទេសចិនក្នុងតម្លៃ ៣៤ ពាន់លានដុល្លារកាលពីដើមខែកក្កដាដែលជំរុញឲ្យមានការសងសឹកក្នុងតម្លៃដូចគ្នាភា្លមៗពីទីក្រុងប៉េកាំង។ ប្រទេសទាំង ២ គ្រោងចាប់ផ្ដើមដាក់ដំណើរវិធានការជុំថ្មីមួយនៃការដកហូតពន្ធនាំចូលសងសឹកទៅវិញទៅមកក្នុងតម្លៃ ១៦ ពាន់លានដុល្លារនៅថ្ងៃទី ២៣ ខែសីហា។
ទីក្រុងវ៉ាស៊ីនតោនក៏មានផែនការហូតពន្ធនាំចូលបន្ថែម ២០០ ពាន់លានដុល្លារទៀតលើទំនិញចិន ហើយលោក ត្រាំ ឲ្យដឹងថាលោកអាចដំឡើងអត្រាហូតពន្ធនាំចូលនេះដល់ ២៥ ភាគរយពី ១០ ភាគរយដែលកំណត់កាលពីមុន។
លោក Makoto Sengoku អ្នកវិភាគទីផ្សារនៅវិទ្យាស្ថានស្រាវជ្រាវ Tokai Tokyo បានថ្លែងថា៖ «វាពិបាកក្នុងការនិយាយថា ការចរចានឹងដំណើរការដូចម្តេច? ប៉ុន្តែវាជាសញ្ញាវិជ្ជមានមួយដែលប្រទេសទាំង ២ កំពុងស្វែងរកផែនការសម្រុះសម្រួលមួយចំនួន»៕ LA