មជ្ឈមណ្ឌលពាណិជ្ជកម្មដែលគ្រោងរៀបចំពិព័រណ៍ នៅខេត្ត Shandong។ រូបថត Xinhua/China Daily
ភ្នំពេញៈ ក្រសួងពាណិជ្ជកម្មកម្ពុជាប្រកាសអញ្ជីញក្រុមហ៊ុនដែលមានបំណង ឬកំពុងធ្វើពាណិជ្ជកម្មនាំចេញទំនិញពីកម្ពុជាទៅប្រទេសចិនឱ្យទៅចូលរួមក្នុងព្រឹត្តិការណ៍ពាណិជ្ជកម្ម និងវិនិយោគអន្តរជាតិ «2021 SCO International Investment and Trade Expo» ដែលមានរយៈពេល ៣ ថ្ងៃនៅខេត្ត Shandong។
សេចក្តីជូនដំណឹងរបស់ក្រសួងពាណិជ្ជកម្មកម្ពុជាដែលផ្សព្វផ្សាយកាលពីថ្ងៃទី ១ ខែមីនា ឱ្យដឹងថា ក្រសួងសូមជូនដំណឹងដល់ម្ចាស់សហគ្រាស ផលិតករ សេវាករ ពាណិជ្ជករ និងសាធារណជនថា អង្គការសហប្រតិបត្តិការស៊ាងហៃ សហការជាមួយសភាពាណិជ្ជកម្មកម្ពុជាអន្តរជាតិនឹងរៀបចំពិព័រណ៍ «2021 SCO International Investment and Trade Expo» ដែលនឹងប្រព្រឹត្តទៅចាប់ពីថ្ងៃទី ២៧ ដល់ ២៩ ខែ មេសា ឆ្នាំ ២០២១ នៅមជ្ឈមណ្ឌល Fengyuan Sport Center ទីក្រុង Jiaozhou តំបន់ Qingdao នៃខេត្ត Shandong។
លិខិតសរសេរថា៖ «ពិព័រណ៍ពាណិជ្ជកម្មនេះរៀបចំឡើងក្នុងគោលបំណងដាក់តាំងបង្ហាញ និងផ្សព្វផ្សាយផលិតផលប្រើប្រាស់ទូទៅរួមទាំងវិស័យថាមពល ហិរញ្ញវត្ថុ ឡូជីស្ទិក អប់រំ ទេសចរណ៍ និងវិស័យពាក់ព័ន្ធ និងគម្រោងវិនិយោគរបស់ប្រទេសចិនជាមួយអន្តរជាតិ»។
បើយោងតាមក្រសួងពាណិជ្ជកម្ម សម្រាប់ក្រុមហ៊ុនចិនដែលនាំចូលផលិតផលពីកម្ពុជាទៅកាន់ទីផ្សារចិន ហើយមានបំណងចូលរួមក្នុងព្រឹត្តិការណ៍នេះអាចទៅរៀបចំដាក់តាំងបង្ហាញផលិតផលកម្ពុជានៅកន្លែងពិព័រណ៍ផ្ទាល់។ ចំណែកក្រុមហ៊ុន និងសហគ្រាសកម្ពុជាក៏អាចចូលរួមផ្សព្វផ្សាយផលិតផលរបស់ខ្លួនតាមប្រព័ន្ធ Online ដោយមិនបង់ថ្លៃផងដែរ។
លោក លឹម ហេង អនុប្រធានសភាពាណិជ្ជកម្មកម្ពុជាប្រាប់ ភ្នំពេញ ប៉ុស្តិ៍ថា គ្រប់ព្រឹត្តិការណ៍តាំងពិព័រណ៍សុទ្ធតែផ្តល់នូវភាពវិជ្ជមានសម្រាប់ទំនាក់ទំនងពាណិជ្ជកម្ម និងសេដ្ឋកិច្ចជាតិ។ លោកបន្តទៀតថា ការចូលរួមនឹងធ្វើឱ្យកម្ពុជាអាចទទួលបានការបញ្ជាទិញថ្មីៗ ការចូលមកបណ្តាក់ទុនវិនិយោគផ្ទាល់របស់ចិននៅកម្ពុជា និងកំណើនភ្ញៀវទេសចរ។
លោកថ្លែងថា៖ «តាមរយៈព្រឹត្តិការណ៍នេះក្រុមហ៊ុននៅកម្ពុជាដែលចូលរួមនឹងមានឱកាសយកផលិតផលថ្មីៗរបស់ខ្លួនទៅបង្ហាញអ្នកចូលរួមបានស្គាល់ និងអាចធ្វើការបញ្ជាទិញដោយផ្ទាល់តែម្តង»។
លោកបន្ថែមថា ទន្ទឹមនឹងការចូលរួមនៅប្រទេសចិន ការបង្កើតព្រឹត្តិការណ៍ក្នុងស្រុកក៏ជាយុទ្ធសាស្ត្រសំខាន់មួយក្នុងការទាក់ទាញចំណាប់អារម្មណ៍វិនិយោគិនបរទេសឱ្យចូលមកវិនិយោគផ្ទាល់នៅកម្ពុជា។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) បានប្រាប់ថា ប្រទេសចិនតែងរៀបចំព្រឹត្តិការណ៍តាំងពិព័រណ៍ជាញឹកញាប់ និងរៀងរាល់ឆ្នាំ (លើកលែងឆ្នាំ ២០២០)។ ការរៀបចំព្រឹត្តិការណ៍តាំងពិព័រណ៍អាចនិយាយថាជាឱកាសមួយសម្រាប់កម្ពុជាក្នុងការយកផលិតផលរបស់ខ្លួនទៅដាក់បង្ហាញឱ្យគេមើលឃើញ។
លោកនិយាយថា៖ «ព្រឹត្តិការណ៍បែបនេះគឺពិតជាសំខាន់ណាស់ ដែលវានឹងផ្តល់ប្រយោជន៍ច្រើនសម្រាប់ពាណិជ្ជករទាំងកម្ពុជា និងចិន»។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ថា នេះជាលើកទី១ ហើយដែលកម្ពុជាបានទទួលការអញ្ជើញចូលរួមក្នុងព្រឹត្តិការណ៍នេះ។ ជាគោលការណ៍របស់អ្នករៀបចំ គឺផ្តល់អាទិភាពភាគច្រើនដល់ក្រុមហ៊ុន ចិនស៊ាងហៃ (ក្រុមហ៊ុនស៊ាងហៃ) និងក្រុមហ៊ុនចិនស៊ាងហៃដែលចេញទៅធ្វើជំនួញ និងវិនិយោគនៅបរទេសឱ្យចូលរួម។
លោកបានប្រាប់ទៀតថា៖ «ដោយសារក្រសួងទើបបានប្រកាសផ្សាយ ហេតុនេះក្រសួងនៅមិនទទួលបានព័ត៌មានពីអ្នកដែលចាប់អារម្មណ៍ចូលរួមនោះទេ»៕ LA
