.jpg)
និមិត្តសញ្ញារូបិយប័ណ្ណឌីជីថល Bitcoin ដែលដំណើរការមានមូលដ្ឋានលើបច្ចេកវិទ្យា Blockchain។ AFP
ក្រុងប៉េកាំងៈ ប្រទេស ចិន បានចាប់ផ្ដើមកិច្ចខិតខំប្រឹងប្រែងប្រកបដោយមហិច្ឆតាមួយ ដើម្បីប្រកួតប្រជែងនឹងឥទ្ធិពលអាមេរិកផ្នែកបច្ចេកវិទ្យា blockchain ដែលអាចប្រើប្រាស់សម្រាប់អ្វីៗគ្រប់យ៉ាងចាប់ពីការចេញផ្សាយប្រាក់ឌីជីថលរហូតដល់ការធ្វើឲ្យប្រសើរឡើងសេវាមួយចំនួនរដ្ឋាភិបាល និងតាមដានភាពស្មោះត្រង់របស់សមាជិកបក្សកុម្មុយនីស្ដផងដែរ។
បច្ចេកវិទ្យានេះទទួលបានការឯកភាពដ៏សំខាន់ពីលោកប្រធានាធិបតី ស៊ី ជីនភីង កាលពីសប្ដាហ៍មុនជាសញ្ញាមួយដែលរដ្ឋាភិបាលចិនមើលឃើញ blockchain ថាជាផ្នែកមួយដ៏សំខាន់នៃផែនការរបស់ប្រទេសនេះក្នុងការក្លាយជាមហាអំណាចបច្ចេកវិទ្យាទំនើប។
ទីក្រុងប៉េកាំង គឺជាប្រទេសចុងក្រោយបំផុតមួយក្នុងបណ្ដាប្រទេសមួយចំនួនដែលបានអនុម័តច្បាប់ដែលគ្រប់គ្រងយ៉ាងតឹងរ៉ឹងលើការបំប្លែងកូដទិន្នន័យ (encryption of data) ជាពិសេសបច្ចេកវិទ្យា blockchain ដែលអាចឲ្យមានការស្ដុក និងការផ្លាស់ប្តូរទិន្នន័យដោយផ្ទាល់ដោយមិនឆ្លងកាត់អន្តរការី។
ដោយល្បីឈ្មោះដោយសារមិនអាចមានការក្លែងបន្លំបានបច្ចេកវិទ្យា blockchain គឺជាមូលដ្ឋានទិន្នន័យមួយដែលត្រូវបានចែករំលែកនៅទូទាំងបណ្ដាញកុំព្យូទ័រ។ នៅពេលកត់ត្រាមួយត្រូវបានធ្វើឡើងទៅក្នុងបច្ចេកវិទ្យា blockchain វាស្ទើរតែមិនអាចធ្វើការផ្លាស់ប្តូរបាន។
វាប្រហែលជាត្រូវបានគេស្គាល់ខ្លាំងបំផុតដោយសារការគាំទ្ររបស់បច្ចេកវិទ្យានេះដល់ប្រតិបត្តិការរបស់រូបិយប័ណ្ណឌីជីថល (cryptocurrencies) ដូចជា bitcoin ដែលទីក្រុងប៉េកាំងអាចព្យាយាមចម្លងតាម ខណៈដែលប្រទេសមហាអំណាចមួយនេះជំរុញទៅមុខជាមួយនឹងផែនការរបស់ខ្លួនសម្រាប់ការចេញផ្សាយរូបិយប័ណ្ណឌីជីថលដែលដំណើរការដោយរដ្ឋាភិបាលនាំមុខគេក្នុងពិភពលោក។
លោក Stanislas Pogorzelski ការីនិពន្ធនៅគេហទំព័រឯកទេស Cryptonaute.fr បានប្រាប់ទីភ្នាក់ងារព័ត៌មាន AFP ថា ទោះបីជាច្បាប់ថ្មីសម្រាប់គ្រប់គ្រង blockchain «នៅតែមិនច្បាស់លាស់» ក្តីក៏ច្បាស់ណាស់ចិនគឺជាប្រទេសមួយដែលសកម្មបំផុតទាក់ទងនឹងបទប្បញ្ញត្តិ។
លោក Pogorzelski បានថ្លែងថា៖ «ប្រទេស ចិន មានការយល់ដឹងយ៉ាងច្បាស់ថា ដើម្បីនៅរក្សាបានជាប្រទេសមហាអំណាចមួយ អ្នកត្រូវតែស្ថិតក្នុងជួរមុខគេខាងផ្នែកបច្ចេកវិទ្យាថ្មីៗ»។
បច្ចេកវិទ្យា Blockchain នឹងដើរតួនាទីដ៏សំខាន់នៅក្នុងវិស័យជាច្រើននៅពេលអនាគត ដែលរួមមានហិរញ្ញវត្ថុឌីជីថល សង្គមអ៊ីនធឺណិត (internet of things) បច្ចេកវិទ្យាបញ្ញាសិប្បនិម្មិត និងប្រព័ន្ធ 5G ។
ការអន្តរាគមន៍របស់មនុស្សកាន់តែតិច
បច្ចេកវិទ្យា Blockchain ក៏អាចបម្រើសម្រាប់ការធ្វើឲ្យប្រព័ន្ធការិយាធិបតេយ្យដ៏ធំរបស់ប្រទេសចិនកាន់តែមានប្រសិទ្ធភាពផងដែរ។
ទីភ្នាក់ងារព័ត៌មានស៊ីនហួបានឲ្យដឹងថា ប្រព័ន្ធដែលមានមូលដ្ឋានលើ blockchain ត្រូវបានប្រើប្រាស់ជាលើកដំបូងក្នុងការបង្កើត និងការដាក់ពាក្យបណ្ដឹងប្រតិបត្តិដោយស្វ័យប្រវត្តិនៅក្នុងតុលាការចិនប្រឆាំងនឹងភាគីមួយដែលបានបរាជ័យក្នុងការសងការខូចខាតនៅក្នុងកិច្ចព្រមព្រៀងសម្របសម្រួលណាមួយ។
ទីភ្នាក់ងារនេះបានឲ្យដឹងថា ជាមួយនឹងការធ្វើអន្តរាគមន៍ដោយមនុស្សកាន់តែតិច ប្រព័ន្ធបែបនោះអាចធ្វើឲ្យការអនុវត្តច្បាប់តុលាការនៅក្នុងប្រទេសចិន «កាន់តែមានភាពវៃឆ្លាត និងតម្លាភាព»។
លោកប្រធានាធិបតី ស៊ី ថ្លែងថា៖ «បច្ចេកវិទ្យា Blockchain គួរតែដើរតួនាទីកាន់តែធំក្នុងការពង្រឹងអំណាចរបស់ប្រទេសចិនផ្នែកអ៊ីនធឺណិតដែលអភិវឌ្ឍសេដ្ឋកិច្ចឌីជីថល និងការលើកកម្ពស់ការអភិវឌ្ឍសេដ្ឋកិច្ចសង្គម»។
លោក Anthony Pompliano ដែលសរសេរព្រឹត្តិប័ត្រព័ត៌មានប្រចាំថ្ងៃអំពីរូបិយប័ណ្ណឌីជីថលបានថ្លែងថា៖ «អារម្មណ៍ជាទូទៅនៃការអត្ថាធិប្បាយរបស់លោក ស៊ី មានសភាពធម្មតា»។ លោក Pompliano បានមានប្រសាសន៍ថា៖ «បច្ចេកវិទ្យា Blockchain ពិតជាសំខាន់សម្រាប់អនាគត ហើយប្រទេសចិនរៀបចំផែនការដើម្បីក្លាយជាប្រទេសនាំមុខគេលើពិភពលោក»៕ AFP/LA
