The Phnom Penh Post Search

Search form




Logo of Phnom Penh Post newspaper Phnom Penh Post - ចិន​ស្នើឲ្យ​រដ្ឋាភិបាល​កម្ពុជា​ជួយ​ដោះស្រាយ​បញ្ហា​ជម្លោះ

ចិន​ស្នើឲ្យ​រដ្ឋាភិបាល​កម្ពុជា​ជួយ​ដោះស្រាយ​បញ្ហា​ជម្លោះ

ចិន​ស្នើឲ្យ​រដ្ឋាភិបាល​កម្ពុជា​ជួយ​ដោះស្រាយ​បញ្ហា​ជម្លោះ

140127_11
សណ្ឋាគារ Golden Stadium ដែលកំពុងតែមានជម្លោះ ម៉ៃ វីរៈ

ភ្នំពេញ: សា្ថនទូត​សាធារណរដ្ឋ​ប្រជាមានិត​ចិន​ប្រចាំ​នៅ​កម្ពុជា​បាន​បង្ហាញ​ពី​ការ ព្រួយបារម្ភ​អំពី​ជម្លោះ​ពាណិជ្ជកម្ម​មួយ​រវាង​វិនិយោគិន​សណ្ឋាគារ Wenzhou របស់​ខ្លួន និង​វិនិយោគិន​ក្នុង​ស្រុក​ដែល​កំពុង​រំលោភ​លើ​កិច្ចសន្យា ដោយ​អំពាវនាវ​ឲ្យ​រដ្ឋាភិបាល​ជួយ​ដោះស្រាយ​បញ្ហា​ដើម្បី​រក្សា​ទំនុក ចិត្ត​ពាណិជ្ជកម្ម​ជនជាតិ​ចិន​ចំពោះ​កម្ពុជា​។

ស្ថានទូត​បាន​ផ្ញើ លិខិត​មួយ​កាលពី​ថ្ងៃ​ពី​២៣​ទៅ​ក្រសួង​យុត្តិធម៌ និង​ក្រសួង​ការបរទេស​ស្ដីពី​ជម្លោះ​នេះ ក្រោយពី​ការ​បិទ​សណ្ឋាគារ កាលពី​ថ្ងៃ​១៦​ខែ​មករា​ដោយ​តុលាការ​រាជធានី​ភ្នំពេញ។

លិខិត​នេះ​បញ្ជាក់​ថា សណ្ឋាគារ Wenhzou Business Hotel គឺ​ស្ថិត​នៅ​ក្រោម​ប្រតិបត្តិការ​ហ្គោលដិនស្តេឌាម​ដោយ​បាន​ចុះ ហត្ថលេខា​ដោយ​ក្រុមហ៊ុន Wenzhou Holding របស់​ខេត្ត Zhejiang ប្រទេស​ចិន និង​វិនិយោគិន​ក្នុង​ស្រុក លោក យូ សូណាឆុង ដែល​ជា​ម្ចាស់​អគារ សម្រាប់​កិច្ចសន្យា​ជួល​រយៈពេល​៥​ឆ្នាំ ចាប់ពី​ថ្ងៃ​ទី​១​ខែ​តុលា​ឆ្នាំ​២០១២ រហូត​ដល់​ថ្ងៃ​ទី​៣១​ខែ​តុលា​ឆ្នាំ​២០១៧​។

ប្រភព​នេះ​ឲ្យ​ដឹង​ថា​៖ «​វិនិយោគិន​ជនជាតិ​ចិន​បាន​វិនិយោគ​ក្នុង​ការ​បំពាក់​ឧបករណ៍ ការ​តុបតែង​សណ្ឋាគារ ។ល។ ជាមួយ​នឹង​ទឹកប្រាក់​វិនិយោគ​ជាង​១​លាន​ដុល្លារ​អាមេរិក​។ ដោយសារ​តែ​ការ​បិទ​ទ្វារ​សណ្ឋាគារ​នេះ វិនិយោគិន​ជនជាតិ​ចិន​បាន​ទទួលរង​ការ​ខាតបង់​ផ្នែក​សេដ្ឋកិច្ច​យ៉ាង ច្រើន​បំផុត​។ ប្រសិន​បើ​ផលប្រយោជន៍​ស្រប​ច្បាប់​របស់​វិនិយោគិន​នៅ​កម្ពុជា​មិន​អាច ត្រូវ​បាន​ការពារ​បាន​យ៉ាង​ល្អ​នោះ​ទេ ទំនុក​ចិត្ត​របស់​ពួកគេ​នៅក្នុង​បរិយាកាស​វិនិយោគ​របស់​កម្ពុជា​នឹង ត្រូវ​បាន​ខូចខាត​។

ប្រភព​នេះ​បន្ត​ថា​៖ «​សា្ថនទូត​ចិន​គោរព​ច្បាប់​កម្ពុជា​យ៉ាង​ពេញលេញ ហើយ​សង្ឃឹម​ថា បណ្ដា​ក្រសួង​និង​នាយកដ្ឋាន​របស់​រដ្ឋាភិបាល​ពាក់ព័ន្ធ​នឹង​អាច​យក​ចិត្ត ទុក​ដាក់​យ៉ាង​ដិតដល់​ចំពោះ​ករណី​នេះ សូម​គិត​ពិចារណា​ឲ្យ​បាន​ហ្នត់ចត់​ពី​សំណូមពរ​សមហេតុផល​ដែល​បាន​លើក ឡើង​ដោយ​វិនិយោគិន​ចិន និង​ការពារ​ផលប្រយោជន៍​ស្រប​ច្បាប់​របស់​ពួកគេ​ទៅ​តាម​ផ្លូវ​ច្បាប់​»។

លោក Guo Xing Xian មេការ​សណ្ឋាគារ ឲ្យ​ដឹង​ថា៖ ការ​បិទ​សណ្ឋាគារ​នេះ​ពុំ​មាន​ផ្តល់​ដំណឹង​ឲ្យ​ដឹង​មុន​ឡើយ។ ការណ៍​នេះ​ធ្វើឲ្យ​រូប​លោក​និង​បុគ្គលិក​បាត់បង់​របស់របរ និង​សម្ភារ​សំខាន់ៗ នៅក្នុង​សណ្ឋាគារ។

លោក​ថា៖ «បើ​តុលាការ​នៅ​តែ​បន្ត​បិទ​សណ្ឋាគារ​នោះ​សម្ភារ​និង​របស់របរ​មាន​តម្លៃ ជាង ១,៥ លាន​ដុល្លារ​នោះ​នឹង​ត្រូវ​អសារបង់​ជា​ពុំ​ខាន​ឡើយ»។ លោក​ថា៖ «ខ្ញុំ​សុំ​សំណូមពរ​ឲ្យ​តុលាការ​បើក​សណ្ឋាគារ​នេះ​ឡើង​វិញ»។

កាលពី​ថ្ងៃ អាទិត្យ​ភ្នំពេញ ប៉ុស្ដិ៍ មិនអាច​ទាក់ទង លោក យូ សូណាឆុង សុំ​ធ្វើ​អត្ថាធិប្បាយ​បាន​ទេ​។ ប៉ុន្តែ​លោក ធ្លាប់​ប្រាប់ អ្នក​កាសែត​ថា ការ​បិទ​ទ្ធារ​សណ្ឋាគារ ហ្គោលដិន ស្តេឌាម​នេះ គឺជា​ការ​រំលោភ​ច្បាប់​ព្រោះ​សំណុំ​រឿងក្តី​សណ្ឋាគារ​នេះ​នៅ​មិន​ទាន់ ដោះស្រាយ​តាម​ផ្លូវ​តុលាការ​ចប់​ទេ ឥឡូវ​កំពុង​ស្ថិត​ក្នុង​ចំណាត់ការ​របស់​តុលាការ​កំពូល​នៅ​ឡើយ។

លោក Li Bonning ប្រធាន​សមាគម​អភិវឌ្ឍន៍​ពាណិជ្ជកម្ម​ខេត្ត​ហូណាន​នៅ​កម្ពុជា ក៏​បាន​ស្នើសុំ​ឲ្យ​រដ្ឋាភិបាល​ដោះស្រាយ​បញ្ហា​នេះ ដោយ​លើក​ឡើង​ថា​វា​នឹង​មាន​ផលប៉ះពាល់​ដល់​ទំនុកចិត្ត​របស់​វិនិយោគិន​នៅ​ប្រទេស​កម្ពុជា​។

លោក បាន​បញ្ជាក់​ថា​៖ «​យើង​សង្ឃឹម​ថា បញ្ហា​នេះ​អាច​ត្រូវ​បាន​ដោះស្រាយ​បាន​ឆាប់​រហ័ស​តាម​ដែល​អាច​ធ្វើ​ទៅ​បាន ក្នុង​នាម​ជា​វិនិយោគិន​បរទេស​ដើម្បី​ចាប់ផ្ដើម​ធ្វើ​ពាណិជ្ជកម្ម ហើយ​យើង​មាន​ទំនុក​ចិត្ត​។ ប្រសិន​បើ​បញ្ហា​នេះ​មិន​អាច​ដោះស្រាយ​ឲ្យ​បាន​ត្រឹមត្រូវ​ទេ​នោះ ខ្ញុំ​គិតថា វិនិយោគិន​ជនជាតិ​ចិន​នឹង​មាន​ការ​ភ័យខ្លាច​ក្នុង​ការ​វិនិយោគ​នៅ​ទី​នេះ​»។

លោក បន្ថែម​ថា​៖ «​យើង​មិន​សង្ឃឹម​ថា បញ្ហា​នេះ​នឹង​កើតឡើង​ម្ដង​ទៀត​នោះ​ទេ ហើយ​បញ្ហា​នេះ​នឹង​ត្រូវ​បាន​ដោះស្រាយ ជា​បន្ទាន់​។ ប្រសិន​បើ​បញ្ហា​នេះ​មិន​អាច​ដោះស្រាយ​បាន វិនិយោគិន​ទាំងអស់​នឹង​បាត់បង់​ទំនុក​ចិត្ត​សម្រាប់​ការ​វិនិយោគ​នៅ កម្ពុជា ជា​មិនខាន​»។

លោក កុយ គួង អ្នក​នាំពាក្យ​ក្រសួង​ការបរទេស និង​លោក សំ ប្រជាមានិត្យ នាយក​ខុទ្ទកាល័យ​ក្រសួង​យុត្តិធម៌​ពុំ​អាច​ទាក់ទង​សុំ​ការ​បំភ្លឺ​បាន​ទេ​កាលពី​ម្សិលមិញ។

តាម​របាយការណ៍​ពី ក្រុម​ប្រឹក្សា​អភិវឌ្ឍន៍​កម្ពុជា​(CDC) កម្ពុជា​ទទួល​បាន​ទឹកប្រាក់​វិនិយោគ​ពី​ចិន​ប្រហែល ៩,៦​ពាន់​លាន​ដុល្លារ​អាមេរិក​ចាប់ពី​ឆ្នាំ​១៩៩៤ ដល់ ២០១៣​។ ពាណិជ្ជកម្ម​ទ្វេភាគី​រវាង​ប្រទេស​ទាំង​ពីរ​បាន​កើនឡើង​២,៨៣ ពាន់​លាន​ដុល្លារ​នៅ​រយៈពេល​៩​ខែ​ដំបូង​ឆ្នាំ​២០១៣ ធៀប​នឹង​រយៈពេល​ដូច​គ្នា​កាលពី​ឆ្នាំ​២០១២៕ B.P

អត្ថបទគួរចាប់អារម្មណ៍