.jpg)
សកម្មភាពកម្មករសណ្ដោងចេកនៅកសិដ្ឋានចេក ឡង ម៉េត នៅស្រុកឈូក ខេត្តកំពត កាលពីថ្ងៃសៅរ៍។ ហេង ជីវ័ន
កំពតៈ ចិនកំពុងបន្តពិនិត្យលើសំណើក្នុងការនាំចូលផលិតផលកសិកម្មរបស់កម្ពុជាបន្ថែមទៀត បន្ទាប់ពីផ្លែស្វាយ និងផ្លែចេកអំបូងលឿង។ នេះបើយោងតាម លោក លី ជៀនហ្វី (Li Jianwei) ប្រធាននាយកដ្ឋានកិច្ចការនាំចូលកសិផលពីបរទេសនៃក្រសួងគយចិន។
ប្រទេស ចិន បានចុះកិច្ចព្រមព្រៀងក្នុងការនាំចូលផ្លែស្វាយពីកម្ពុជា កាលពីថ្ងៃទី ១៣ ខែមិថុនា ជាមួយក្រសួងកសិកម្មកម្ពុជា ខណៈកាលពីឆ្នាំទៅបានអនុញ្ញាតឲ្យកម្ពុជានាំចេកទៅទីផ្សារចិន។ ក្នុងដំណើរទស្សនកិច្ចទៅកាន់កសិដ្ឋានដាំចេក ឡង ម៉េត (Long Mate Banana Farming) នៅស្រុកឈូក ខេត្តកំពត កាលពីថ្ងៃសៅរ៍ ដើម្បីពិនិត្យមើលបច្ចេកទេស និងស្តង់ដារភូតគាមអនាម័យ លោក លី ជៀនហ្វី បាននិយាយថា គ្រប់កាលៈទេសៈទាំងអស់ រដ្ឋាភិបាលចិនតែងគាំទ្រ និងលើកទឹកចិត្តចំពោះកិច្ចខិតខំប្រឹងប្រែងរបស់រដ្ឋាភិបាលកម្ពុជា ក្នុងការអភិវឌ្ឍប្រទេស លើកកម្ពស់ជីវភាពរស់នៅរបស់ប្រជាជន។
លោក លី ថ្លែងថា៖ «នៅពេលនេះ យើងបានគាំទ្រ និងអនុញ្ញាតឲ្យភាគីកម្ពុជា នាំយកកសិផលចំនួន ២ មុខ គឺចេកអំបូងលឿង និងផ្លែស្វាយ ចូលទៅក្នុងទីផ្សារ [ប្រទេស ចិន] របស់យើងដោយផ្ទាល់»។
លោកបានបន្តថា៖ «យើងនឹងបន្តពិនិត្យមើលបន្ថែមទៀតនូវសំណើរបស់ភាគីកម្ពុជា ស្ដីពីការនាំយកកសិផលមួយចំនួនបន្ថែមទៀតចូលមកក្នុងទីផ្សាររបស់យើង»។
តាមលោក លី កសិផលដែលភាគីកម្ពុជាបានស្នើសុំនោះរួមមាន ម្រេច មៀនប៉ៃលិន ម្នាស់ទឹកឃ្មុំ ដូងក្រអូប និងសម្បុកត្រចៀកកាំ»។
បើតាមលោក លី ប្រទេស ចិន បាននាំចូលកសិផលគ្រប់ប្រភេទប្រមាណជាង ១០ លានតោនក្នុង ១ ឆ្នាំៗ ពីបណ្ដាប្រទេសមួយចំនួនក្នុងពិភពលោក ដែលក្នុងនោះក៏មានប្រទេស កម្ពុជា ផងដែរ សម្រាប់ផ្គត់ផ្គង់ដល់ប្រជាជនចិន។
លោក ហ៊ុន ឡាក់ នាយកក្រុមហ៊ុន Longmate Agriculture Co.,Ltd ដែលបច្ចុប្បន្នកំពុងដាំចេកនៅលើផ្ទៃដីជាង ៤០០ ហិកតា នៃផ្ទៃដីដាំដុះសរុប១ ០០០ ហិកតា បានឲ្យដឹងថា ក្រុមហ៊ុននឹងពង្រីកការដាំដុះឲ្យបាន ១០០ ភាគរយ នៃផ្ទៃដីដាំដុះរបស់ខ្លួននៅដំណាច់ឆ្នាំ ២០២០។
លោកថ្លែងថា៖ «ក្នុងត្រីមាសទី១ ដើមឆ្នាំនេះ ក្រុមហ៊ុនរបស់យើងបាននាំចេញចេកទៅក្នុងទីផ្សារប្រទេស ចិន បានជាង ១០០ តោន ហើយយើងរំពឹងថា ការនាំចេញរបស់យើងពេញមួយឆ្នាំ ២០១៩ នេះ អាចនឹងកើនដល់ជាង ២ ០០០ តោន»។
លោក ឡាក់ បានឲ្យដឹងថា ក្រុមហ៊ុនមានបុគ្គលិក និងកម្មករសរុបជាង ៩០០ នាក់កំពុងបម្រើការងារលើការដាំដុះដំណាំចេកនេះ ក្នុងនោះកម្មករជំនាញជាង ៣០ នាក់ ត្រូវបានបញ្ជូនទៅសិក្សាពីលក្ខណៈបច្ចេកទេសនៃការដាំដុះ ប្រមូលផល និងវេចខ្ចប់ នៅឯប្រទេស ចិន។
លោកបានបន្ថែមថា៖ «ការនាំចេញកសិផលទៅលើទីផ្សារអន្តរជាតិធំៗដូចជាប្រទេស ចិន គឺយើងមិនពឹងផ្អែកតែលើបរិមាណ និងគុណភាពនៃទំនិញកសិផលរបស់យើងនោះទេ តែវាទាមទារឲ្យមានការរៀបចំវេចខ្ចប់ឲ្យបានល្អត្រឹមត្រូវស្របតាមស្ដង់ដារបច្ចេកទេសផងដែរ»។
លោកបន្តថា៖ «មិនតែប៉ុណ្ណោះគឺយើងត្រូវមានរោងចក្រសម្រាប់កែច្នៃ និងវេចខ្ចប់ ព្រមទាំងមានស្តង់សម្រាប់ស្តុក និងលក់ដូរនៅក្នុងទីផ្សាររបស់គេឲ្យបានត្រឹមត្រូវថែមទៀត»៕ LA
