.jpg)
កម្មករ កំពុងលីការុងអង្ករនៅហាងលក់អង្ករមួយកន្លែងនៅទីក្រុងភ្នំពេញកាលពីសប្តាហ៍មុន។ ហុង មិនា
ភ្នំពេញៈ ៤ ថ្ងៃបន្ទាប់ពីសហភាពអឺរ៉ុបបានសម្រេចយកពន្ធលើការនាំចូលអង្ករពីកម្ពុជា ដែលនឹងអាចធ្វើឲ្យបរិមាណនាំចេញរបស់កម្ពុជាធ្លាក់ចុះ ប្រទេស ចិន បានយល់ព្រមបង្កើនកូតានាំចូលអង្ករពីកម្ពុជាចំនួន ១០ ម៉ឺនតោនបន្ថែមទៀត ក្នុង ១ ឆ្នាំដល់ចំនួនកូតាសរុប ៤០ ម៉ឺនតោននៅឆ្នាំ ២០១៩ នេះ។
តាមរយៈកូតាថ្មីនេះ ប្រសិនបើកម្ពុជាអាចនាំចេញបានពេញលេញតាមបរិមាណដែលបានព្រមព្រៀង នោះមានន័យថា គ្រាន់តែទីផ្សារចិនមួយបានស្រូបយកអង្ករកម្ពុជារហូតដល់ទៅ ៦៣ ភាគរយទៅហើយនៃការនាំចេញសរុបរបស់កម្ពុជាកាលពីឆ្នាំ ២០១៨។ កាលពីឆ្នាំមុនប្រទេស កម្ពុជា បាននាំចេញអង្ករសរុបជាង ៦២ ម៉ឺនតោន។
លោកនាយករដ្ឋមន្រ្តី ហ៊ុន សែន បានជួបជាមួយលោកប្រធានាធិបតីចិន ស៊ី ជីនភីង ក្នុងដំណើរការទស្សនកិច្ចនៅប្រទេស ចិន រយៈពេល ៤ ថ្ងៃ ដែលចាប់ផ្តើមនៅថ្ងៃចន្ទ។ លោកនាយករដ្ឋមន្រ្តី បានលើកឡើងនៅក្នុងហ្វេសប៊ុកផ្លូវការរបស់លោកថា លោកប្រធានាធិបតី ស៊ី ជីនភីង បានយល់ព្រមក្នុងការនាំចូលអង្ករពីកម្ពុជាឲ្យដល់ ៤០ ម៉ឺនតោននៅឆ្នាំ ២០១៩ នេះ ពីចំនួនកូតា ៣០ ម៉ឺនតោនក្នុង ១ ឆ្នាំកាលពីឆ្នាំមុន។ ភាគីទាំង ២ ក៏បញ្ជាក់ពីកិច្ចខិតខំប្រឹងប្រែងបង្កើនទំហំពាណិជ្ជកម្មទ្វេភាគីឲ្យដល់ ១០ ពាន់លានដុល្លារនៅឆ្នាំ ២០២៣។
លោកនាយករដ្ឋមន្រ្តីបានលើកឡើងដោយស្រង់សម្តីលោកស៊ី ជីនភីងថា៖ «បច្ចុប្បន្ននេះ បើទោះបីជាទំនាក់ទំនងអន្តរជាតិមានការប្រែប្រួលក៏ពិតមែន ប៉ុន្តែទំនាក់ទំនងរវាងចិន និងកម្ពុជា គឺពិតជាបានផ្តល់នូវអត្ថប្រយោជន៍ជាច្រើនពីគ្នាទៅវិញទៅមក»។
លោកបន្តថា ប្រទេសទំាង ២ បានយល់ព្រមពង្រឹងកិច្ចសហការជំរុញទំនាក់ទំនងក្នុងវិស័យនយោបាយ សន្តិសុខ និងសេដ្ឋកិច្ច។ យ៉ាងណាក៏ដោយ លោកមិនបានបញ្ជាក់លម្អិតពីលក្ខខណ្ឌនៃការផ្តល់កូតានាំចេញអង្ករពីកម្ពុជាទៅចិននៅឡើយទេ។
លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជាបានលើកឡើងកាលពីម្សិលមិញថា ការយល់ព្រមផ្តល់កូតាមានន័យថា រដ្ឋាភិបាលចិនបានអនុញ្ញាតឲ្យអ្នកបញ្ជាទិញនៅចិននាំចូលអង្ករទៅចិនដោយរួចពន្ធ តែក្នុងបរិមាណមិនលើស ៤០ ម៉ឺនតោន ក្នុងតម្លៃដែលមានការព្រមព្រៀងរវាងអ្នកលក់ និងអ្នកទិញ។ លោកបញ្ជាក់ថា ប្រសិនបើមិនមានការផ្តល់កូតាទេ អង្ករដែលនាំចេញទៅចិនត្រូវបង់ពន្ធក្នុងអត្រាដ៏ខ្ពស់មួយ។
លោកបន្តថា៖ «ការបន្ថែមកូតាជាសញ្ញាល្អ ហើយវាបើកឱកាសសម្រាប់យើងបន្ថែមទៀត តែកម្ពុជាត្រូវព្យាយាមដោះស្រាយបញ្ហាទាក់ទងនឹងថ្លៃ។ អ្វីដែលយើងប្រឈមកន្លងមកគឺការប្រកួតប្រជែងទាក់ទងនឹងថ្លៃនេះ»។
លោកបញ្ជាក់ថា៖ «ពេលយើងនាំចេញជាក់ស្តែង ថាតើជោគជ័យកម្រិតណាដែលយើងអាចសម្រេចបាន គឺវាអាស្រ័យលើការមានយុទ្ធសាស្រ្តល្អ ហើយយើងត្រូវពិភាក្សាជាមួយភាគីពាក់ព័ន្ធបន្ថែមទៀត»។
ប្រទេស ចិន បានផ្តល់កូតាអង្ករកម្ពុជាដំបូងនៅឆ្នាំ ២០១៥ ដោយមានចំនួន ១០ ម៉ឺនតោន។ បរិមាណនេះបានបង្កើនជាបន្តបន្ទាប់ រហូតដល់ ៣០ ម៉ឺនតោនកាលពីឆ្នាំ ២០១៨។ ចិនជាទីផ្សារធំជាងគេសម្រាប់អង្ករកម្ពុជា បើគិតពីទីផ្សារប្រទេស មួយៗ ហើយក៏ជាទីផ្សារធំទី ២ បន្ទាប់ពីសហភាពអឺរ៉ុប។ កាលពីឆ្នាំមុន ចិនបាននាំចូលអង្ករពីកម្ពុជាសរុប ១៧ ម៉ឺនតោន គឺស្មើប្រមាណ ៥៦ ភាគរយនៃចំនួនកូតាឆ្នាំ ២០១៨។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ បានថ្លែងថា ការផ្តល់កូតាអង្ករបន្ថែមដល់កម្ពុជាពីចិនគឺជាការល្អសម្រាប់ឧស្សាហកម្មនេះ តែលោកបញ្ជាក់ថា កន្លងមកអ្នកទិញនៅចិន អាចទិញអង្ករពី វៀតណាម និងថៃ ក្នុងតម្លៃប្រកួតប្រជែងជាង ហើយមិនទាន់ដែលបានទិញអង្ករពីកម្ពុជាឲ្យបានស្មើបរិមាណដែលរដ្ឋាភិបាលបានផ្តល់កូតានៅឡើយ។
លោកបន្តថា៖ «កម្ពុជាគួរតែស្វែងរកវិធីសាស្រ្តក្នុងការបង្កើនភាពប្រកួតប្រជែងវិស័យស្រូវអង្ករបន្ថែមទៀត»។
អង្កររបស់កម្ពុជាបានបាត់បង់សិទិ្ធទទួលការលើកលែងពន្ធពីទីផ្សារអឺរ៉ុបចាប់ពីថ្ងៃសុក្រសប្តាហ៍មុន ជាអ្វីដែលអ្នកនៅក្នុងឧស្សាហកម្មនេះព្យាករថានឹងអាចធ្វើឲ្យការនាំចេញអង្កររបស់កម្ពុជាធ្លាក់ចុះ។ ការសម្រេចដែលមានប្រសិទ្ធភាពអនុវត្តចាប់ពីថ្ងៃសុក្រ ទី ១៨ ខែមករានេះទៅ តម្រូវឲ្យអង្ករនាំចូលពីប្រទេស កម្ពុជា និងត្រូវបង់ពន្ធរយៈពេល ៣ ឆ្នាំក្នុងអត្រា ១៧៥ អឺរ៉ូ (ប្រហែល ២០០ ដុល្លារ) ក្នុង ១ តោននៅឆ្នាំដំបូង និងថយចុះបន្តិចនៅឆ្នាំទី ២ និងទី ៣៕
