.jpg)
លោក Hu និងលោក Hammond ក្នុងសន្និសីទរួមគ្នានៅទីក្រុងឡុងដ៍។ រូបថត AFP
ក្រុងឡុងដ៍ៈ ប្រទេស ចិន និងចក្រភពអង់គ្លេស បានរៀបចំជុំថ្មីមួយនៃកិច្ចសន្ទនាសេដ្ឋកិច្ច និងហិរញ្ញវត្ថុនៅទីក្រុងឡុងដ៍កាលពីថ្ងៃចន្ទ ដោយប្តេជ្ញាថានឹងពង្រឹងកិច្ចសហប្រតិបត្តិការលើគំនិតផ្ដួចផ្ដើមខ្សែក្រវាត់ និងផ្លូវ (BRI) និងគាំទ្រប្រព័ន្ធពាណិជ្ជកម្មអន្តរជាតិ។
លោក Hu Chunhua ឧបនាយករដ្ឋមន្ដ្រីរបស់ប្រទេស ចិន និងលោក Philip Hammond រដ្ឋមន្ដ្រីក្រសួងហិរញ្ញវត្ថុចក្រភពអង់គ្លេស បានធ្វើជាសហប្រធាននៃកិច្ចសន្ទនាស្តីពីសេដ្ឋកិច្ច និងហិរញ្ញវត្ថុរវាងប្រទេស ចិន និងអង់គ្លេសនេះ ដោយមានការពិភាក្សាដ៏ទូលំទូលាយរាប់ចាប់ពីម៉ាក្រូសេដ្ឋកិច្ច និងអភិបាលកិច្ចសេដ្ឋកិច្ចពិភពលោក ពាណិជ្ជកម្ម និងការវិនិយោគ ភាពជាដៃគូគម្រោងធំៗ រហូតដល់កំណែទម្រង់ហិរញ្ញវត្ថុ និងការអភិវឌ្ឍទីផ្សារហិរញ្ញវត្ថុ និងកិច្ចសហប្រតិបត្តិការលើវិស័យថ្មីៗ។
ភាគីទាំង ២ បានបង្កើតលទ្ធផលជាប្រយោជន៍ទៅវិញទៅមកចំនួន ៦៩ និងបានចុះហត្ថលេខាលើឯកសារកិច្ចសហប្រតិបត្តិការស្តីពីកិច្ចសហប្រតិបត្តិការទីផ្សារភាគីទី៣ សេវាហិរញ្ញវត្ថុ និងវិស័យជាច្រើនផ្សេងទៀត។
លោក Hu បានអំពាវនាវឲ្យប្រទេសទាំង ២ ត្រូវអនុវត្តតាមអ្វីដែលបានយល់ព្រមដែលសម្រេចបានរវាងមេដឹកនាំរបស់ប្រទេសទាំង ២ ធ្វើការងារជាមួយគ្នាទៅវិញទៅមកឲ្យបានកាន់តែច្រើនលើគំនិតផ្តួចផ្តើម BRI សម្របសម្រួលយ៉ាងជិតស្និទ្ធដល់គោលនយោបាយម៉ាក្រូសេដ្ឋកិច្ចរបស់ប្រទេសទាំង ២ និងពង្រីកភាពជាដៃគូពាណិជ្ជកម្ម និងការវិនិយោគ។
លោក Hu ថ្លែងថា៖ «ប្រទេស ចិន និងចក្រភពអង់គ្លេសគួរតែជំរុញឲ្យមានសកម្មភាពថ្មីៗខាងផ្នែកសហប្រតិបត្តិការហិរញ្ញវត្ថុ និងកែលម្អអភិបាលកិច្ចសេដ្ឋកិច្ចពិភពលោក ដើម្បីបន្ថែមភាពសំខាន់ដល់ទំនាក់ទំនងទ្វេភាគីរបស់យើង»។
ដោយស្វាគមន៍ដល់កិច្ចសហប្រតិបត្តិការប្រកបដោយផ្លែផ្កានេះ ចាប់តាំងពីការសន្ទនាផ្នែកសេដ្ឋកិច្ច និងហិរញ្ញវត្ថុដំបូង លោក Hammond បានឲ្យដឹងថា ចក្រភពអង់គ្លេសមានអត្ថប្រយោជន៍នានាក្នុងការចូលរួមនៅក្នុងគំនិតផ្តួចផ្តើម BRI នេះ ហើយនឹងត្រៀមខ្លួនរួចរាល់ក្នុងការបង្កើនកិច្ចសហប្រតិបត្តិការផ្នែកពាណិជ្ជកម្ម ការវិនិយោគ ហិរញ្ញវត្ថុ និងថាមពលជាមួយចិន។
លោក Hammond បានបញ្ជាក់ថា ចក្រភពអង់គ្លេសនឹងធ្វើការងារជាមួយប្រទេស ចិន ដើម្បីការពារប្រព័ន្ធពាណិជ្ជកម្មទ្វេភាគី និងអន្តរជាតិ៕ People''s Daily/LA
