ក្រុងណាននីងៈ ក្នុងពិព័រណ៍ពាណិជ្ជកម្ម ចិន-អាស៊ាន នៅឆ្នាំនេះ មន្ដ្រីប្រតិបត្តិ និងពាណិជ្ជករមកពីប្រទេស ចិន និងប្រទេសក្នុងតំបន់ អាស៊ីអាគ្នេយ៍ បានសម្ដែងការប្ដេជ្ញាចិត្តឥតងាករេរបស់ខ្លួន ដើម្បីការពាររបបពាណិជ្ជកម្មអន្តរជាតិ ព្រមទាំងជំទាស់នឹងវិធានការគាំពារនិយមឯកតោភាគី ដែលធ្វើឡើងដោយប្រទេសមួយចំនួន។
លោក Han Zheng ឧបនាយករដ្ឋមន្ដ្រី ចិន បានថ្លែងនៅក្នុងពិធីបើកដំណើរការពិព័រណ៍ដែលបានចាប់ផ្តើមពីថ្ងៃទី ១២ ដល់ថ្ងៃទី ១៥ ខែកញ្ញាថា៖ «ទំនាក់ទំនងរវាងប្រទេសចិន និងអាស៊ាន មានតាំងពីយូរមកហើយ ហើយបានក្លាយជាឧទាហរណ៍ដ៏ជោគជ័យ និងសកម្មភាពខ្លាំងបំផុតនៃកិច្ចសហប្រតិបត្តិការក្នុងតំបន់អាស៊ីប៉ាស៊ីហ្វិក»។
ប្រទេស ចិន គឺជាដៃគូពាណិជ្ជកម្មធំបំផុតរបស់អាស៊ាន ក្នុងរយៈពេល ៩ ឆ្នាំជាប់គ្នា ហើយអាស៊ានគឺជាដៃគូពាណិជ្ជកម្មឈានមុខគេទី ៣ របស់ប្រទេសចិនក្នុងរយៈពេល ៧ ឆ្នាំជាប់គ្នា។ នេះបើយោងតាមលោក Han។
លោក Han បានឲ្យដឹងថា ប្រទេសចិនមានបំណងប្រើប្រាស់ឲ្យបានពេញលេញនូវវេទិកានានា ដូចជាពិព័រណ៍នាំចូលអន្តរជាតិចិននៅពេលខាងមុខ និងពិព័រណ៍ពាណិជ្ជកម្ម ចិន-អាស៊ាន ដើម្បីពង្រីកការនាំចេញពីប្រទេសជាសមាជិកអាស៊ាន និងជំរុញការវិនិយោគទ្វេភាគី។
លោក Han បានបន្ថែមថា៖ «ប្រទេស ចិន មានបំណងលើកកម្ពស់ការអនុវត្តកិច្ចព្រមព្រៀងពាណិជ្ជកម្មសេរីចិន និងអាស៊ាន ដែលត្រូវបានធ្វើបច្ចុប្បន្នភាព និងបង្កើនល្បឿនការចរចាកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) ដោយឈរលើមូលដ្ឋានអត្ថប្រយោជន៍ទៅវិញទៅមក និងលទ្ធផលឈ្នះឈ្នះ»។
សំណើរបស់លោក Han ក្នុងការលើកកម្ពស់ពាណិជ្ជកម្ម និងការវិនិយោគត្រូវបានស្វាគមន៍ដោយមន្ដ្រីជាន់ខ្ពស់មកពីសមាជិកអាស៊ាន។
លោក Somdy Duangdy ឧបនាយករដ្ឋមន្ដ្រីរបស់ប្រទេស ឡាវ បានថ្លែងឲ្យដឹងថា៖ «ដោយសារគោលនយោបាយគាំពារនិយមរបស់ប្រទេសមួយចំនួន សេដ្ឋកិច្ចពិភពលោកកំពុងប្រឈមនឹងសម្ពាធបញ្ហាជាច្រើន ហើយការខ្វែងគំនិតគ្នាផ្នែកពាណិជ្ជកម្មបានកើនឡើង»។
លោក Somdy បន្តថា៖ «វាជាពេលវេលាដែលយើងត្រូវប្រឹងប្រែងបង្កើនអត្ថប្រយោជន៍នៃកិច្ចព្រមព្រៀងពាណិជ្ជកម្មសេរីចិន និងអាស៊ាន ដោយបន្ទាបឬលុបចោលពន្ធនាំចូល និងពង្រឹងកិច្ចសហប្រតិបត្តិការ ក្នុងគោលបំណងបង្កើតឱកាសថ្មីសម្រាប់ពាណិជ្ជកម្ម និងការវិនិយោគរវាងភាគីទាំង ២ នេះ»។
លោក Vuong Dinh Hue ឧបនាយករដ្ឋមន្ដ្រីវៀតណាមបានថ្លែងថា៖ «កិច្ចសហប្រតិបត្តិការរវាងប្រទេស ចិន និងបណ្ដាប្រទេស អាស៊ាន បន្តរីកចម្រើន ទោះបីជាភាពមិនច្បាស់លាស់ បញ្ហាប្រឈម និងហានិភ័យរបស់សេដ្ឋកិច្ចពិភពលោកក៏ដោយ»។
លោកបញ្ជាក់ថា៖ «កិច្ចសហប្រតិបត្តិការបែបនោះមិនមែនគ្រាន់តែផ្ដល់អត្ថប្រយោជន៍ ទៅវិញទៅមកនោះទេ វាជាការបញ្ជាក់ និងជាកម្លាំងជំរុញវិជ្ជមាននៃកំណើនសេដ្ឋកិច្ច ពាណិជ្ជកម្ម និងការវិនិយោគលើពិភពលោក»។
ពិព័រណ៍ពាណិជ្ជកម្មឆ្នាំនេះគឺជាលក្ខណពិសេសនូវការរៀបចំពិព័រណ៍វេទិកា និងកម្មវិធីផ្លាស់ប្តូរ គឺជាពិព័រណ៍វេទិកា និងកម្មវិធីដោះដូរដែលមានបំណងលើកកម្ពស់កិច្ចសហប្រតិបត្តិការមិត្តភាពរវាងប្រទេស ចិន និងអាស៊ាន ឲ្យដល់កម្រិតថ្មីមួយ។
ក្រុមហ៊ុនពិព័រណ៍ ចិន និងបរទេស បានបង្ហាញចំណាប់អារម្មណ៍លើព្រឹត្តិការណ៍រយៈពេល ៤ ថ្ងៃនេះ។ ក្រុមហ៊ុនជាង ២ ៧០០ ដែលរួមទាំងក្រុមហ៊ុនក្នុងទស្សនាវដ្តី Fortune 500 មួយចំនួនផងនោះបានតាំងបង្ហាញផលិតផលរបស់ពួកគេក្នុងព្រឹត្តិការណ៍នេះ ដែលកើនឡើង ២,៦ ភាគរយ ធៀបនឹងព្រឹត្តិការណ៍ឆ្នាំមុន។
នវានុវត្តន៍ជាចំណុចផ្តោត ១ នៃពិព័រណ៍ឆ្នាំនេះ។ ប្រទេស ចិន និងបណ្ដាប្រទេសអាស៊ាន កំពុងបង្ហាញការរីកចម្រើនថ្មីៗរបស់ខ្លួន៕ P.Daily/LA