.jpg)
ចេកអំបូងលឿងកម្ពុជាកំពុងមានទីផ្សារល្អ និងតម្រូវការកើនឡើងជាបន្តបន្ទាប់ ក្រោយពីកម្ពុជាទទួលបានសិទ្ធិនាំចេញជាផ្លូវការទៅកាន់ប្រទេសចិន។ ហេង ជីវ័ន
ភ្នំពេញៈ ចេកអំបូងលឿងកម្ពុជាកំពុងមានទីផ្សារល្អ និងតម្រូវការកើនឡើងជាបន្តបន្ទាប់ ក្រោយពីកម្ពុជាទទួលបានសិទ្ធិនាំចេញជាផ្លូវការទៅកាន់ប្រទេសចិន ដោយផ្ទាល់កាលពីពាក់កណ្តាលឆ្នាំ ២០១៩។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានថ្លែងក្នុងពេលពិនិត្យមើលវឌ្ឍនភាពរបស់ក្រុមហ៊ុន Long Sreng International Co., Ltd កាលពីថ្ងៃអាទិត្យថា ការរីកចម្រើនផ្នែកបច្ចេកវិទ្យាកសិកម្ម ការកែច្នៃ និងការវេចខ្ចប់កំពុងជួយធ្វើឲ្យការនាំចេញមានកំណើនគួរឲ្យកត់សម្គាល់ក្នុងរយៈពេល ៥ ខែ ដើមឆ្នាំ ២០២០ នេះ។
លោកថ្លែងថា៖ «ក្រសួងកំពុងខិតខំពង្រឹងកិច្ចសហប្រតិបត្ដិការជាមួយដៃគូអភិវឌ្ឍន៍ និងវិស័យឯកជន ដើម្បីគាំទ្រលើការវិនិយោគគ្រប់ខ្សែចង្វាក់តម្លៃផលិផលកសិកម្មចាប់ពីចំណុច A ដល់ Z តាមរយៈការបង្កើនផលិតភាពផលិតកម្ម ការវេចខ្ចប់ ការរក្សាស្តុកទុក ការកែច្នៃ ប្រកបដោយគុណភាព អនាម័យ និងសុវត្ថិភាពសមស្របតាមស្តង់ដានៃទីផ្សារនាំចេញ»។
ទិន្នន័យរបស់ក្រុមហ៊ុនបង្ហាញថា ក្នុងរយៈពេលខាងលើនេះក្រុមហ៊ុនបាននាំចេញចេកអំបូងលឿងចំនួន ២២ ៧៦២ តោនក្នុងនោះទៅប្រទេសចិនមានចំនួន ៨ ៣៤៨ តោន និងវៀតណាម ១៤ ៤១៤ តោន។
លោក ហ៊ុន ឡាក់ នាយកក្រុមហ៊ុន Longmate Agriculture Co.,Ltd ដែលវិនិយោគលើការដាំចេកអំបូងលឿងលើផ្ទៃដីជាង ១ ពាន់ហិកតាក្នុងខេត្តកំពត បានឲ្យដឹងថាក្នុងរយៈពេល ៥ ខែដំបូងឆ្នាំនេះក្រុមហ៊ុនបាននាំចេញចេកអំបូងលឿង ១០ ០០០ តោន។
លោកថ្លែងថា៖ «ការនាំចេញចេកស្រស់របស់យើងទៅកាន់ប្រទេសចិនដំណើរការល្អជាធម្មតា។ ភាគីចិនមិនមានការកម្រិតបរិមាណនៃការនាំចូលទេក្នុងអំឡុងពេលនេះ ដោយពួកគេនៅតែអនុញ្ញាតឲ្យដំណើរការជាធម្មតា គ្មានបម្រាមអ្វីទេ»។
របាយការណ៍ក្រសួងកសិកម្មឲ្យដឹងថា កាលពីឆ្នាំ ២០១៩ ការនាំចេញចេកអំបូងលឿងស្រស់ទៅទីផ្សារអន្តរជាតិមាន ១៥៧ ៨១២ តោន៕ LA
