.jpg)
ទិដ្ឋភាពចំណតផែថ្មីដែលបើកដាក់ឲ្យដំណើរការនៅខេត្តព្រះសីហនុកាលពីថ្ងៃម្សិលមិញ។ រូបថត ហ្វេសប៊ុកនាយករដ្ឋមន្ត្រី
ខេត្តព្រះសីហនុៈ កំពង់ផែស្វយ័តក្រុងព្រះសីហនុ (PA S) ដែលចុះបញ្ជីនៅផ្សារហ៊ុនកម្ពុជាបានដាក់ឲ្យដំណើរការជាផ្លូវការនូវចំណតផែពហុបំណងថ្មីរបស់ខ្លួនកាលពីម្សិលមិញ ដើម្បីទទួលនាវាធំៗផ្ទុកទំនិញធ្ងន់ៗ។
ចំណតផែថ្មីដែលគាំទ្រហិរញ្ញវត្ថុដោយជប៉ុនមានតម្លៃ ៧៤ លានដុល្លារមានប្រវែង ៣៣០ ម៉ែត្រ និងជម្រៅទឹក ១៣,៥ ម៉ែត្រ។ នេះបើតាមលោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន។
លោករដ្ឋមន្ដ្រីបានថ្លែងថាចំណតផែថ្មីនេះគឺជាច្រកទ្វារផ្លូវទឹកដ៏សំខាន់មួយសម្រាប់ផលិតផលកសិកម្មរបស់ប្រទេសនេះ និងការនាំចេញកសិឧស្សាហកម្មទៅទីផ្សារអន្តរជាតិ។
លោកថ្លែងថា៖ «ដោយសារវាភ្ជាប់ផ្លូវសំខាន់ៗ និងការកែលម្អសមត្ថភាពរបស់កំពង់ផែនេះ វានឹងធ្វើឲ្យកំពង់ផែក្រុងព្រះសីហនុដើរតួនាទីដ៏សំខាន់ក្នុងការបង្កើនល្បឿន ការដឹកជញ្ជូនទំនិញព្រមទាំងចំណាយតិច ដែលត្រូវបានលើកកម្ពស់សមត្ថភាពនៃការប្រកួតប្រជែងរវាងកម្ពុជា និងប្រទេសជិតខាង និងក្នុងតំបន់ផងដែរ»។
ចំណតផែនេះនឹងស្រូបយកចំណែកទីផ្សារ ៧០ ភាគរយនៃការនាំចូល និងនាំចេញរបស់កម្ពុជា។ នេះបើតាមលោក ស៊ុន ចាន់ថុល។ លោកបានបន្តថា៖ «វាជាចំណតផែទេសចរណ៍ ទំនិញលក់រាយ ចំណតផែកុងតឺន័រ ព្រមទាំងចំណតសម្រាប់មូលដ្ឋានដឹកជញ្ជូនសម្រាប់ការរុករកប្រេងផងដែរ»។
ចំណតផែថ្មីនេះត្រូវបានសម្ពោធដាក់ឲ្យប្រើប្រាស់ដោយលោកនាយករដ្ឋមន្ដ្រី ហ៊ុន សែន។
ចំណតផែនេះអាចផ្ទុកការដឹកជញ្ជូនទំនិញធ្ងន់ៗក្នុងចំនួនពី ៤០ ០០០ ទៅ ៥០ ០០០ តោនច្រើនជាង ២ ដងនៃចំណតផែដែលមានស្រាប់។
រដ្ឋាភិបាលគ្រោងនឹងសាងសង់ចំណតផែកុងតឺន័រថ្មីមួយមានតម្លៃ ២០៣ លានដុល្លារ ដែលផ្ដល់ការគាំទ្រហិរញ្ញវត្ថុដោយទីភ្នាក់ងារជប៉ុន JICA ផងដែរ។ នេះបើយោងតាមលោក ស៊ុន ចាន់ថុល។
លោកថ្លែងថាការសាងសង់ចំណតផែជម្រៅ ១៤,៥ ម៉ែត្រ និងបណ្ដោយ ៣៥០ ម៉ែត្រ នឹងចាប់ផ្ដើមនៅចុងឆ្នាំ ២០១៩ និងបញ្ចប់នៅចុងឆ្នាំ ២០២២។
ចរាចរណ៍កុងតឺន័របានកើនឡើង ១២,៦៥ ភាគរយក្នុងអំឡុងពេល ៥ ឆ្នាំចុងក្រោយ ហើយក្នុងអំឡុង ៥ ខែដំបូងឆ្នាំនេះចរាចរណ៍កុងតឺន័របានកើនឡើងដល់ ២០៧ ០៤៧ TEU កើនឡើង ២០ ភាគរយធៀបនឹងរយៈពេលដូចគ្នាកាលពីឆ្នាំមុន។
PAS បានក្លាយជាក្រុមហ៊ុនចុះបញ្ជីទី ៥ នៅលើផ្សារមូលបត្រកម្ពុជា (CSX) កាលពីខែមិថុនាឆ្នាំមុន បន្ទាប់ពីរកប្រាក់បាន ២៧ លានដុល្លារដោយជោគជ័យនៅក្នុងដំណើរការបោះផ្សាយមូលបត្រជាសាធារណៈលើកដំបូង។
ប៉ុន្តែមិនមានការជួញដូរភាគហ៊ុនទេកាលពីម្សិលមិញ ហើយតម្លៃភាគហ៊ុនគឺ ៥ ១៦០ រៀលក្នុង ១ ភាគហ៊ុនកាលពីម្សិលមិញធៀបនឹងការជួញដូរសប្ដាហ៍មុន៕LA
