ភ្នំពេញៈ ប្រាក់ចំណូលរបស់កំពង់ផែស្វយ័តក្រុងព្រះសីហនុ (PAS) ដែលចុះបញ្ជីក្នុងផ្សារហ៊ុនកម្ពុជាបានកើនឡើងជាង ១៦ ភាគរយ នៅត្រីមាសទី២ ឆ្នាំ ២០១៩ បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍មិនទាន់ធ្វើសវនកម្មដែលបានចេញផ្សាយនៅលើផ្សារហ៊ុន។
របាយការណ៍បង្ហាញថា នៅត្រីមាសទី២ ឆ្នាំ ២០១៩ កំពង់ផែរកចំណូលបានប្រមាណ ២០,៤២ លានដុល្លារ កើនឡើង ១៦,៥៥ ភាគរយ ពីចំនួន ១៧,៥២ លានដុល្លារ កាលពីត្រីមាសទី២ ឆ្នាំ ២០១៨។
ទោះបីយ៉ាងនេះក្តីប្រាក់ចំណេញសុទ្ធបានធ្លាក់ចុះ ៩៣,៩៨ ភាគរយ ពីចំនួន ៤,៧២ លានដុល្លារ នាត្រីមាសទី ២ ឆ្នាំ ២០១៨ មកនៅត្រឹម ២៨៣ ៦៥៥ ដុល្លារ។
លោក លូ គឹមឈន់ អគ្គនាយកកំពង់ផែស្វយ័តក្រុងព្រះសីហនុបានប្រាប់ភ្នំពេញប៉ុស្តិ៍កាលពីម្សិលមិញថា បរិមាណទំនិញ និងចំនួនកុងតឺន័រឆ្លងកាត់តាមកំពង់ផែស្វយ័តក្រុងព្រះសីហនុបានកើនឡើងជាបន្តបន្ទាប់ ជាក់ស្តែងក្នុងត្រីមាសទី២ ឆ្នាំ ២០១៩ នេះចំនួនទំនិញឆ្លងកាត់ (គិតជាតោន) បានកើនឡើងប្រហែល ២២ ភាគរយ ចំណែកចំនួនកុងតឺន័រកើន ១៥,៥ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨។
លោកថ្លែងថា៖ «ខ្ញុំរំពឹងថា កំពង់ផែក្រុងព្រះសីហនុនឹងបន្តភាពល្អប្រសើរជាបន្តទៀត ខណៈបច្ចុប្បន្នយើងក៏កំពុងស្នើសុំថ្នាក់ដឹកនាំដើម្បីពង្រីកទីលានទុកកុងតឺន័រ និងបំពាក់គ្រឿងចក្របន្ថែមទៀត ដើម្បីឆ្លើយតបនឹងសភាពការណ៍នេះ»។
ទោះយ៉ាងណាទន្ទឹមនឹងកំណើនបរិមាណទំនិញឆ្លងកាត់ និងកំណើនកុងតឺន័រនាពេលនេះកំពង់ផែក៏កំពុងមានបញ្ហាប្រឈមទាក់ទងនឹងកនែ្លងស្តុកទំនិញផងដែរ។
លោក គឹមឈន់ បាននិយាយថាបច្ចុប្បន្នកំពង់ផែកំពុងមានបញ្ហាប្រឈមនឹងទីតាំងសម្រាប់ដាក់កុងតឺន័រ ពិសេសក្នុងរយៈពេលប្រមាណជាង ១ សប្តាហ៍នេះ ដោយសារតែផ្លូវថ្នល់ដឹកជញ្ជូនទំនិញមកកាន់រាជធានីភ្នំពេញត្រូវទឹកភ្លៀងជន់លិចនោះបានធ្វើឲ្យមានការកកស្ទះកុងតឺន័រយ៉ាងច្រើន។ លោកប្រាប់ថា៖ «ការស្តុកកុងតឺន័រនៅកំពង់ផែដែលធម្មតាមានរយៈពេល ៥ ថ្ងៃ នៅពេលនេះបានកើនឡើងដល់ ៨ ថ្ងៃ ដែលធ្វើឲ្យកុងតឺន័រនៅពេញផែ»។
ខណៈបច្ចុប្បន្ន PAS មានជម្រៅទឹក ១១,៥ ម៉ែត្រ និងមានប្រវែង ៤៥០ ម៉ែត្រនោះ លោក លូ គឹមឈន់ បានឲ្យដឹងថា នៅចុងឆ្នាំ ២០២០ កំពង់ផែនឹងពង្រីកជម្រៅទឹក ១៤,៥ ម៉ែត្រ និងមានប្រវែង ៣៥០ ម៉ែត្របន្ថែមទៀត ដែលតាមគម្រោងនឹងបញ្ចប់នៅពាក់កណ្តាលឆ្នាំ ២០២៤។ លោកលើកឡើងថា ការពង្រីកនេះនឹងធ្វើឲ្យការដឹកជញ្ជូនតាមផ្លូវសមុទ្រមានភាពមមាញឹកជាងមុន។
លោកថ្លែងថា៖ «ការពង្រីកនេះនឹងធ្វើឲ្យសមត្ថភាពប្រកួតប្រជែង និងការដឹកទំនិញតាមផ្លូវសមុទ្រកាន់តែមានឧត្តមភាព ហើយតម្លៃដឹកជញ្ជូននឹងធ្លាក់ចុះ»។
ពេលបិទការជួញដូរកាលពីម្សិលមិញភាគហ៊ុន PAS មានតម្លៃ ១៤ ៨០០ រៀលក្នុង ១ ហ៊ុនធ្លាក់ចុះ ១០០ រៀលពីថ្ងៃអង្គារ៕LA