.jpg)
កំពង់ផែស្វយ័តភ្នំពេញ ដែលស្ថិតនៅស្រុក កៀនស្វាយ ខេត្ត កណ្ដាល។ ហេង ជីវ័ន
ភ្នំពេញៈ ចំណូលកំពង់ផែស្វយ័តភ្នំពេញ (ក.ស.ភ.) ដែលជាសហគ្រាសរដ្ឋចុះបញ្ជីក្នុងផ្សារហ៊ុនកម្ពុជាបានកើនឡើងជាង ២៥ ភាគរយ នៅត្រីមាសទី១ ឆ្នាំ ២០១៩។ នេះបើយោងតាមរបាយការណ៍ដែលបានចេញផ្សាយកាលពីថ្ងៃម្សិលមិញ។
របាយការណ៍ប្រចាំត្រីមាសទី១ ដែលបានចេញផ្សាយនៅលើផ្សារហ៊ុនកម្ពុជាបង្ហាញថា ត្រីមាសទី១ ឆ្នាំ ២០១៩ កំពង់ផែរកចំណូលសរុបពីផលអាជីវកម្ម និងសេវាកម្ម បានចំនួនជាង ៥,៨៧ លានដុល្លារ កើនឡើង ២៥,៨៤ ភាគរយ បើធៀបនឹងត្រីមាសទី១ ឆ្នាំ ២០១៨ ដែលមានជាង ៤,៦៥ លានដុល្លារ។ របាយការណ៍បង្ហាញថា និងចំណេញសុទ្ធក្រោយបង់ពន្ធមានចំនួនជាង ៣,៦៣ លានដុល្លារកើនឡើង ២១៨,៣៧ ភាគរយ បើធៀបនឹងត្រីមាសទី១ ឆ្នាំ ២០១៨ ដែលមានតែជាង ១,១៤ លានដុល្លារ។
សមិទ្ធផលខាងលើនេះ ដោយសារតែទំនុកចិត្តរបស់អតិថិជន ខណៈកំពង់ផែបានផ្តល់សេវាប្រកបដោយតម្លាភាព និងឆាប់រហ័ស។ នេះបើយោងតាមសេចក្តីថ្លែងការណ៍របស់ក្រុមប្រឹក្សាភិបាលកំពង់ផែ។
សេចក្តីថ្លែងការណ៍ដដែលបានឲ្យដឹងថា កំពង់ផែនឹងបន្តពង្រីកសេវាកម្ម និងអាជីវកម្មដែលមានស្រាប់ឲ្យកាន់តែទូលំទូលាយ និងការបង្កើតសេវាកម្មថ្មីៗបន្ថែមទៀតពាក់ព័ន្ធនឹងវិស័យកំពង់ផែ និងភ័ស្តុភារកម្ម។
ទ្រព្យសកម្មសរុបរបស់ ក.ស.ភ. គិតត្រឹមថ្ងៃទី ៣១ ខែ មីនា ឆ្នាំ ២០១៩ មានចំនួនជាង ១៨៩ លានដុល្លារ ២,១១ ភាគរយ ខណៈមូលធនសរុបមានចំនួនជាង ១៤២ លានដុល្លារ កើនឡើង ១,៩៩ ភាគរយ៕LA
