.jpg)
ក្រសួងពាណិជ្ជកម្មកម្ពុជា។ រូបថត ភ្នំពេញ ប៉ុស្តិ៍
ភ្នំពេញៈ ចំណូលរបស់ក្រសួងពាណិជ្ជកម្មក្នុងឆ្នាំ ២០២០ សម្រេចបានជាង ១២ លានដុល្លារ ធ្លាក់ចុះជាង ៥០ ភាគរយ ធៀបនឹងឆ្នាំ ២០១៩។
យោងតាមរបាយការណ៍ប្រចាំរបស់ក្រសួងនេះ ក្រសួងពាណិជ្ជកម្មរកចំណូលបានចំនួន ៥១ ៦១៩,២ លានរៀល (១២,៧ លានដុល្លារអាមេរិក) ស្មើនឹង ១១៤ ភាគរយនៃផែនការប្រចាំឆ្នាំ ធ្លាក់ចុះ ៥០, ៨៣ ភាគរយ បើធៀបនឹងឆ្នាំ ២០១៩ ដែលមាន ២៦,៦០ លានដុល្លារ។
របាយការណ៍នេះ បង្ហាញថា ក្នុងចំណោមចំណូល ១២ លានដុល្លារនេះ រួមមានចំណូលទទួលបានពីការចុះបញ្ជីពាណិជ្ជកម្មចំនួន ១៩,៣១៦,៦១០,០០០ រៀល (ជាង ៤,៧៥ លានដុល្លារ) និងចំណូលពីការផ្តល់វិញ្ញាបនបត្រប្រភពដើមទំនិញ និងការចេញអាជ្ញាប័ណ្ណ និងសេវាពាក់ព័ន្ធ ២៣,៥៧៦,២៨៤,១២៣ រៀល (៥,៧៩ ដុល្លារ)។
របាយការណ៍នេះបញ្ជាក់ទៀតថា ក្រសួងក៏ទទួលបានចំណូលចំនួន ៨,២៨២,៥៦៩,៥២៤រៀល (ជាង ២ លានដុល្លារ) ពីការចុះបញ្ជីម៉ាក និងសេវាពាក់ព័ន្ធ និងចំណូលពីការតម្កល់លិខិតជូនដំណឹងនៃប្រតិបត្តិការដែលមានកិច្ចធានាចំនួន ៣១២,៥២០,០០០ រៀល (ជាង ៧៦ ៩៣២ ដុល្លា)។
ដោយឡែក ចំណូលពីសេវារបស់អគ្គនាយកដ្ឋាន ក.ប.ប ៨៨,៦៦៨,០០០ រៀល (២១ ៨០៧ លានដុល្លារ) និងចំណូលពីកិច្ចការពិព័រណ៍ចំនួន ៤២,៦៤០,០០០រៀល (១០ ៤៩២ ដុល្លារ)។
ក្រសួងបញ្ជាក់ថា រាល់ចំណូល និងចំណាយទាំងអស់របស់ក្រសួងពាណិជ្ជកម្ម ត្រូវបានកត់ត្រានៅក្នុងប្រព័ន្ធគ្រប់គ្រងចំណូលមិនមែនសារពើពន្ធ (NRMIS) និងប្រព័ន្ធគ្រប់គ្រងហិរញ្ញវត្ថុសាធារណៈ (FMIS)៕
