.jpg)
បុគ្គលិកផែកំពុងជិះកង់នៅបរិវេណចំណតទូកុងតឺន័រនៃកំពុងផែស្វយ័តភ្នំពេញ។ ការធ្លាក់ចុះនៃសកម្មភាពដឹកជញ្ជូនប៉ះពាល់ដល់ចំណូលគយ។ ហុង មិនា
ភ្នំពេញៈ អគ្គនាយកនៃអគ្គនាយកដ្ឋានគយ និងរដ្ឋាករ (GDCE) បានឲ្យដឹងថា ការរីករាលដាលវីរុសខូវិដ-១៩ និងធ្វើឲ្យខកខានដល់ទិសដៅកំណត់របស់រដ្ឋាភិបាលក្នុងការប្រមូលចំណូលនៅឆ្នាំនេះ ខណៈក្នុងរយៈពេលនេះការប្រមូលចំណូលពន្ធបាននិងកំពុងរងផលប៉ះពាល់។
សម្រាប់ច្បាប់ថវិកាឆ្នាំ ២០២០ ដែលត្រូវបានឡាយព្រះហស្តលេខាដោយព្រះមហាក្សត្រកាលពីចុងខែវិច្ឆិកា រដ្ឋាភិបាលកំណត់ប្រាក់ចំណូល ៥ ២៧២ លានដុល្លារ ជាប្រាក់ចំណូលសារពើពន្ធសម្រាប់ឆ្នាំ ២០២០ ក្នុងចំណោមនោះ ២ ៩១១ លានដុល្លារបានមកពីគយ និងរដ្ឋាករ និង ២ ៣៦១ លានដុល្លារ បានមកពីពន្ធដារ។
ថ្លែងក្នុងសន្និសីទព័ត៌មានកាលពីល្ងាចថ្ងៃពុធលោក គុណ ញឹម អគ្គនាយក GDCE បានឲ្យដឹងថា ការប្រមូលចំណូលពន្ធគយនឹងមានការអាក់ខានមួយចំនួនពីផលប៉ះពាល់ដោយសារការរីករាលដាលវីរុសនេះ។
បច្ចុប្បន្ន វីរុសខូវិដ-១៩ កំពុងប៉ះពាល់ដល់សេដ្ឋកិច្ចពិភពលោកដែលរួមទាំងប្រទេសកម្ពុជា ខណៈប្រទេសចិនជាសេដ្ឋកិច្ចឈានមុខគេទី ២ របស់ពិភពលោក និងជាប្រទេសមហាអំណាចនៃការផ្គត់ផ្គង់វត្ថុធាតុដើមបច្ចុប្បន្នកំពុងព្យាយាមជម្នះការរីករាលដាលវីរុសនេះ។
លោកបានថ្លែងថា៖ «យើងមើលឃើញថា ផលប៉ះពាល់ដោយសារតែ វីរុសខូវិដ-១៩ កាត់បន្ថយការផ្គត់ផ្គង់វត្ថុធាតុដើម ពិសេសវិស័យកាត់ដេរ និងវិស័យទេសចរណ៍ដែលយើងមើលឃើញនៅពេលនេះ។ នេះក៏នឹងប៉ះពាល់ដល់ការរំពឹងទុកប្រាក់ចំណូលរបស់យើងផងដែរ»។
លោកបានបន្តថា៖ «នៅពេលនេះយើងមើលឃើញថា វាប៉ះពាល់រួចហើយដល់ការប្រមូលប្រាក់ចំណូលរបស់យើងកាលពីខែមករា និងខែកុម្ភៈ ប៉ុន្តែយើងសង្ឃឹមថា វានឹងស្ទុះងើបឡើងវិញក្នុងរយៈពេលពីរបីខែក្រោយ ដូច្នេះនឹងមានការចាប់ផ្ដើមឡើងវិញនៃចង្វាក់ផ្គត់ផ្គង់ដែលមានន័យថា តម្រូវការនឹងកើនឡើង»។
លោកថ្លែងថា៖ «ទោះយ៉ាងណាយើងមិនអាចធ្វើការស្មានទុកជាមុន សម្រាប់រយៈពេលវែងប៉ុន្មាន ដែលវីរុស ខូវិដ-១៩ នេះនឹងស្ថិតក្រោមការគ្រប់គ្រង និងត្រូវបានដោះស្រាយយ៉ាងណានោះទេ»។
លោក គុណ ញឹម ឲ្យដឹងថា GDCE បានប្រមូលប្រាក់ចំណូលប្រហែល ២,២១៥ ពាន់លានដុល្លារកាលពីឆ្នាំមុន លើសទិសដៅកំណត់របស់រដ្ឋាភិបាល ១ ពាន់លានដុល្លារ។ ចំណូលគយបានពីពន្ធនាំចូលមានចំនួន ៥៩៣ លានដុល្លារកើនឡើងប្រហែល ៣១ ភាគរយពន្ធលើអាករពិសេស និងសេវាមួយចំនួនទទួលបាន ១,៣២០ ពាន់លានដុល្លារ កើនឡើង ៣៣ ភាគរយ ពន្ធអាករលើតម្លៃបន្ថែមមាន ១,១៥ ពាន់លានដុល្លារកើន ២៩ ភាគរយ។
ប្រភពដ៏សំខាន់នៃប្រាក់ចំណូលគយ និងរដ្ឋាករគឺបានមកពីរថយន្ត និងគ្រឿងម៉ាស៊ីនមានចំនួន ១,៦៩៣ ពាន់លានដុល្លារកើនឡើង ៥០ ភាគរយ តំណាងឲ្យប្រហែល ៥២,៧ ភាគរយ ប្រេងឥន្ធនៈ និងថាមពលមានចំនួន ៥៣៧ លានដុល្លារ កើនឡើងប្រហែល ១៤ ភាគរយមានចំនួន ១៦,៧ ភាគរយ និងផលិតផលផ្សេងទៀត និងសម្ភារសំណង់មានចំនួន ៩៨៤ លានដុល្លារកើនឡើងប្រហែល ១៤ ភាគរយមានចំនួន ៣០,៦ ភាគរយ៕LA
