ភ្នំពេញ: ចំណូលពីការនាំចេញអង្ករទៅកាន់ទីផ្សារអន្តរជាតិកើនឡើងជាង ១០ ភាគរយ ដល់ជិត ៣៣០ លានដុល្លារ ក្នុងរយៈពេល ៩ ខែនៃឆ្នាំ ២០២០ នេះ ធៀបនឹងរយៈពេលដូចគ្នាកាលពីឆ្នាំមុន ខណៈអង្ករដំណើបកំពុងរួមចំណែកសំខាន់ជាផលិតផលជំរុញទីផ្សារអង្ករ។
របាយការណ៍របស់សហព័ន្ធស្រូវអង្ករកម្ពុជា (CRF) បង្ហាញថា ចាប់ពីខែមករា ដល់ខែកញ្ញា កម្ពុជាទទួលបានចំណូលពីការនាំចេញអង្ករចំនួនជាង ៣២៨ លានដុល្លារ កើន ១០,៤៣ ភាគរយ បើធៀបនឹងរយៈពេលដូចគ្នាកាលពីឆ្នាំមុនមានចំនួន ២៩៧ លានដុល្លារ។ ក្នុងអំឡុងពេលនេះការនាំចេញអង្ករសរុបចំនួន ៤៨៨ ៧៨៥ តោន កើនឡើង ២២,៦២ ភាគរយ ធៀបនឹងឆ្នាំមុនដែលមានចំនួន ៣៩៨ ៥៨៦ តោន។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាប្រាប់ ភ្នំពេញ ប៉ុស្តិ៍ កាលពីថ្ងៃអាទិត្យថា ការនាំចេញអង្កររបស់កម្ពុជាទៅទីផ្សារប្រទេសចិន នៅតែរក្សាកំណើនល្អព្រោះប្រទេសនេះមានតម្រូវការអង្ករខ្ពស់ពិសេសប្រភេទអង្ករក្រអូប និងអង្ករដំណើប។
លោកបានបន្តថា រយៈពេល ៩ ខែនេះ កម្ពុជាបាននាំចេញអង្ករដំណើបសម្រេចបានជិត ១៤០ ០០០ តោន ទៅកាន់ទីផ្សារចិនដែលជាកំណើនខ្ពស់មិនធ្លាប់មាន។
លោកថ្លែងថា៖ «យើងឃើញថា អង្ករដំណើបកំពុងមានទីផ្សារល្អនៅប្រទេសចិនដែលអង្ករប្រភេទនេះគេយកទៅក្នុងឧស្សាហកម្មផលិតនំចំណី ហើយយើងនឹងជំរុញឱ្យប្រជាកសិករយើងបង្កើនការដាំដុះស្រូវដំណើបបន្ថែមទៀតនៅឆ្នាំក្រោយនេះ»។
បណ្ឌិត អ៊ុក ម៉ាការ៉ា នាយកវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា (CARDI) ដែលជាស្ថាប័នសំខាន់បញ្ចេញ ពូជស្រូវរបស់កម្ពុជាបានឱ្យដឹងថា លោកបានជួបពិភាក្សាជាមួយលោក សុង សារ៉ន ប្រធានសហព័ន្ធស្រូវអង្ករកម្ពុជាក្នុងពេលថ្មីៗនេះដោយលោកបានបង្ហាញពីនិន្នាការកើនឡើងនៃតម្រូវការអង្ករដំណើបនៅទីផ្សារចិន ហើយលោកក៏បានសន្យាជួយលើកទឹកចិត្តកសិករឱ្យដាំដុះស្រូវដំណើបនៅក្នុងស្រុក។
លោក អះអាងថា ពូជដំណើបស្បៃមង្គលដែលបញ្ចេញដោយ CARDI តាំងពីឆ្នាំ ២០១៣ មិនទាន់ត្រូវបានដាំដុះទូលំទូលាយនោះទេ ហើយមានតែកសិករគោលដៅខ្លះនៅខេត្តបាត់ដំបង និងខេត្តខ្លះទៀតដាំដុះប៉ុណ្ណោះ។
លោកនិយាយថា៖ «ខ្ញុំយល់ថា ក្នុងចំណែកអង្ករដំណើបនាំចេញទាំងនោះ អាចមានប្រភពនាំចូលខ្លះ រួចនាំចេញ។ ខ្ញុំប្រាប់ឱ្យជួយលើកទឹកចិត្តកសិករដាំដុះដំណើបស្បៃមង្គលនេះ ព្រោះវាមានគុណភាពល្អអាចបំពេញតម្រូវការទីផ្សារបាន»។
ចិននៅតែជាទីផ្សារធំជាងគេសម្រាប់កម្ពុជាដែលកាន់កាប់ចំណែកទីផ្សារសរុប ៣៥ ភាគរយ (១៧១ ៨៩៦ តោន) ខណៈទីផ្សារសហគមន៍អឺរ៉ុប (រួមទាំងអង់គ្លេស) ឈរនៅលំដាប់ទី ២ មានចំណែកទីផ្សារ ៣៣ ភាគរយ។
ប្រទេសកម្ពុជាបាននាំចេញអង្ករជាង ៧៨ ភាគរយគឺជាប្រភេទអង្ករក្រអូបទៅកាន់ទីផ្សារអន្តរជាតិក្នុងអំឡុងពេលនេះ។
លោក ចាន់ ពេជ្រ ប្រធានគ្រប់គ្រងទូទៅនៃក្រុមហ៊ុន Signature of Asia បាននិយាយថា ការនាំចេញអង្កររបស់កម្ពុជាបន្តកើនឡើងនេះបានឆ្លុះបញ្ចាំងពីការខិតខំប្រឹងប្រែងរបស់រដ្ឋាភិបាល និងវិស័យឯកជនក្នុងការធ្វើពិពិធកម្មទីផ្សារក្នុងវិស័យស្រូវអង្ករ។
លោកថ្លែងថា៖ «ខ្ញុំគិតថា ការនាំចេញអង្ករយើងបន្តកើនឡើងនេះ វាជាសញ្ញាវិជ្ជមាន ១ ឆ្ពោះទៅរកគោលដៅរបស់រដ្ឋាភិបាល និងសហព័ន្ធស្រូវអង្ករដែលបានកំណត់នាំចេញអង្ករឱ្យបាន ១ លានតោននៅត្រឹមឆ្នាំ ២០២៣»៕ LA