ភ្នំពេញៈ រដ្ឋាភិបាលប្រមូលចំណូលពន្ធអាករបានជាង ២ ពាន់លានដុល្លារ ក្នុងរយៈពេល ១០ ខែ ឆ្នាំ ២០១៩ កើនឡើងជាង ២៨ ភាគរយ បើធៀបរយៈពេលដូចគ្នាកាលពីឆ្នាំទៅ។ នេះបើយោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារដែលបានចេញផ្សាយកាលពីថ្ងៃចន្ទ។
សេចក្តីប្រកាសព័ត៌មានបានឲ្យដឹងថាក្នុងរយៈពេល ១០ ខែ ឆ្នាំ ២០១៩ ចំណូលពន្ធអាករដែលអគ្គនាយកដ្ឋានពន្ធដារប្រមូលបានមានចំនួន ២ ៤០៤ លានដុល្លារ កើនឡើងចំនួន ៥៣០,៥ លានដុល្លារ ឬស្មើនឹង ២៨,៣១ ភាគរយបើធៀបនឹងរយៈពេលដូចគ្នាឆ្នាំ ២០១៨។
ចំណូលក្នុងរយៈពេល ១០ ខែនេះ គឺមានបរិមាណស្មើនឹង ១០៥,០៦ ភាគរយ នៃផែនការប្រមូលចំណូលប្រចាំឆ្នាំ ២០១៩ របស់អគ្គនាយកដ្ឋានពន្ធដារ។
ដោយឡែកសម្រាប់ខែតុលា អគ្គនាយកដ្ឋានពន្ធដារប្រមូលចំណូលបានប្រមាណ ២២១,៩១ លានដុល្លារ កើនឡើង ២១,៨៥ ភាគរយ បើធៀបនឹងខែតុលា ឆ្នាំ ២០១៨។
លោក គង់ វិបុល អគ្គនាយកនៃអគ្គនាយកដ្ឋានពន្ធដារបានឲ្យដឹងថា កំណើននៃការប្រមូលពន្ធរបស់អគ្គនាយកដ្ឋានពន្ធដារ ព្រោះតែការអនុវត្តដោយជោគជ័យនូវប្រព័ន្ធស្នើសុំបង្វិលសងអាករលើតម្លៃបន្ថែម ដែលបច្ចុប្បន្នអ្នកជាប់ពន្ធ និងសហគ្រាសមានការយល់ដឹងច្រើន ក៏ដូចជាការខិតខំប្រឹងប្រែងប្រមូលចំណូលពន្ធរបស់ថ្នាក់ដឹកនាំ និងមន្ត្រីពន្ធដារគ្រប់ជាន់ថ្នាក់។
ជាមួយគ្នានេះលោកក៏បានណែនាំដល់គ្រប់អង្គភាពឲ្យបន្តខិតខំពង្រឹងការអនុវត្តច្បាប់ វិន័យ និងការងារប្រកបដោយប្រសិទ្ធភាពផងដែរ។
ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យធនធានមនុស្សកាលពីថ្ងៃចន្ទ លោកនាយករដ្ឋមន្ត្រី ហ៊ុន សែន បានលើកឡើងថា ក្នុងឆ្នាំ ២០១៩ នេះកម្ពុជានឹងមានចំណូលសារពើពន្ធលើសផែនការប្រមាណជាង ១ ពាន់លានដុល្លារ ក្នុងនោះពីអគ្គនាយកដ្ឋានពន្ធដារនឹងមានចំនួនចន្លោះពី ៤០០-៥០០ លានដុល្លារ។
លោកថ្លែងថា៖ «រយៈពេល ១០ ខែ ពន្ធដារបានសម្រេចលើសផែនការ ១០៥ ភាគរយ អ៊ីចឹងនៅសល់ពេល ២ ខែចុងក្រោយ លទ្ធភាពក៏អាចរកបាន ៤០០ ទៅ ៥០០ លានដុល្លារដែរ។
កាលពីឆ្នាំ ២០១៨ អគ្គនាយកដ្ឋានពន្ធដារប្រមូលពន្ធអាករគ្រប់ប្រភេទបានចំនួនប្រមាណ ២,២ ពាន់លានដុល្លារដែលស្មើនឹងប្រមាណ ១១៤ ភាគរយ នៃផែនការប្រចាំឆ្នាំ៕LA