ភ្នំពេញៈ ប្រាក់ចំណូលរបស់ក្រុមហ៊ុនថៃ Siam Cement Group (SCG) នៅកម្ពុជាក្នុងឆ្នាំ ២០១៩ បានកើនឡើងជាង ១៣ ភាគរយ បើធៀបនឹងឆ្នាំ ២០១៨ ។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុន។
សេចក្ដីប្រកាសព័ត៌មានរបស់ SCG កាលពីថ្ងៃទី ២៩ ខែមករា បានឲ្យដឹងថា ក្នុងឆ្នាំ ២០១៩ ក្រុមហ៊ុនទទួលបានប្រាក់ចំណូលសរុបប្រមាណ ៤៥១ លានដុល្លារកើនឡើង ១៣,៨៨ ភាគរយ បើធៀបនឹងឆ្នាំ ២០១៨ ដែលមានប្រមាណ ៣៩៦ លានដុល្លារ។ ដោយឡែកក្នុងត្រីមាសទី ៤ ឆ្នាំ ២០១៩ ការលក់សម្រេចបានប្រមាណ ១១៤ លានដុល្លារ កើនឡើង ១៧ ភាគរយ បើធៀបនឹងត្រីមាសទី ៤ ឆ្នាំ ២០១៨ ដែលកំណើននេះជំរុញដោយអាជីវកម្មស៊ីម៉ងត៍សម្ភារសាងសង់។
ទោះបីយ៉ាងណាប្រាក់ចំណូលពីការលក់នៅទូទាំងពិភពលោករបស់ក្រុមហ៊ុន SCG ក្នុងឆ្នាំ ២០១៩ គឺបានធ្លាក់ចុះ ៨ ភាគរយ បើធៀបនឹងឆ្នាំ ២០១៨។
លោក Roongrote Rangsiyopash ប្រធាន និងជាអគ្គនាយកប្រតិបត្តិរបស់ SCG បានឲ្យដឹងអំពីលទ្ធផលប្រតិបត្តិការមិនទាន់ធ្វើសវនកម្មសម្រាប់ឆ្នាំសារពើពន្ធ ២០១៩ របស់ក្រុមហ៊ុនថា ចំណូលពីការលក់បានប្រមាណ ១៤,១០ ពាន់លានដុល្លារធ្លាក់ចុះ ៨ ភាគរយ បើធៀបនឹងឆ្នាំ ២០១៨ ដែលការថយចុះនេះបណ្ដាលមកពីការធ្លាក់ចុះនៃតម្លៃផលិតផលគីមី។
លោកបន្តថា៖ «ការប្រែប្រួលដែលមិនអាចគ្រប់គ្រងបាន បានធ្វើឲ្យមានផលប៉ះពាល់គួរឲ្យកត់សម្គាល់លើក្រុមហ៊ុននានានៅទូទាំងពិភពលោកក្នុងរយៈពេល ១ ឆ្នាំចុងក្រោយនេះ។ ជាលទ្ធផលនៅឆ្នាំ ២០២០ នេះ SCG ចាំបាច់ត្រូវតែបង្កើតយុទ្ធសាស្ត្រអាជីវកម្មគ្រប់ជ្រុងជ្រោយ ដើម្បីជម្នះលើការរំខានទាំងនេះជាបន្ទាន់ និងដើម្បីរក្សាកំណើនអាជីវកម្មប្រកបដោយចីរភាព។
របាយការណ៍របស់ធនាគារជាតិនៃកម្ពុជា NBC បានឲ្យដឹងថា កាលពីឆ្នាំ ២០១៩ កម្ពុជាបាននាំចូលសម្ភារសំណង់ពីបរទេសមកផ្គត់ផ្គង់ទីផ្សារក្នុងស្រុក មានតម្លៃ ១,៥ ពាន់លានដុល្លារ កើនឡើងប្រមាណ ៥០ ភាគរយ បើធៀបនឹងឆ្នាំ ២០១៨។ ក្នុងនោះប្រមាណ ៥០០ លានដុល្លារ គឺទៅលើការនាំចូលដែកថែប និងសម្ភារសំណង់ផ្សេងៗទៀតប្រមាណជា ១ ពាន់លានដុល្លារ។
លោក ជីវ ស៊ីវផេង ប្រធានគ្រប់គ្រងទូទៅនៃសមាគមអ្នកសាងសង់កម្ពុជា បានប្រាប់ភ្នំពេញប៉ុស្តិ៍ថា ការរីកចម្រើននៃវិស័យអចលនទ្រព្យ និងសំណង់ បានធ្វើឲ្យកម្ពុជាត្រូវការគ្រឿងសម្ភារសំណង់នាំចូលជាច្រើនមកបំពេញតម្រូវការក្នុងស្រុក។ លោកបន្តថា ខណៈសមត្ថភាពផលិតក្នុងស្រុកនៅមានកម្រិតនោះ កម្ពុជាបាននាំចូលផលិតផលជាច្រើនប្រភេទពីបរទេសជារៀងរាល់ឆ្នាំ។
បើតាមលោក ស៊ីវផេង កម្ពុជាបាននាំចូលសម្ភារសំណង់ជាច្រើនប្រភេទដូចជា ស៊ីម៉ងត៍ ដែក ឥដ្ឋការ៉ូ សម្ភារបន្ទប់ទឹក គ្រឿងអគ្គិសនី និងសម្ភារផ្សេងៗជាច្រើនទៀត។
អគ្គលេខាធិការសមាគមឧស្សាហកម្មស៊ីម៉ងត៍កម្ពុជាលោក ពុត ចន្តារិទ្ធ កាលពីពេលកន្លងមកបានប្រាប់ភ្នំពេញប៉ុស្តិ៍ថា តម្រូវការប្រើប្រាស់ស៊ីម៉ងត៍នៅកម្ពុជាបានកើនឡើងយ៉ាងច្រើនក្នុងរយៈពេល ៣-៤ ឆ្នាំចុងក្រោយនេះ។ តាមការសិក្សាក្នុង ១ ឆ្នាំ កម្ពុជាតម្រូវការប្រើប្រាស់ស៊ីម៉ងត៍មានប្រហែល ៩ លានតោន ខណៈរោងចក្រក្នុងស្រុកទាំង ៥ អាចមានសមត្ថភាពផលិតបានប្រហែល ៨ លានតោន ក្នុង ១ ឆ្នាំនៅពេលដំណើរការពេញលេញ៕LA