The Phnom Penh Post Search

Search form




Logo of Phnom Penh Post newspaper Phnom Penh Post - ចំណូល​ពី​ការ​លក់​សំបុត្រ​ចូល​អង្គរ​វត្ត​ធ្លាក់​ចុះ​ខណៈ​ភ្ញៀវ​កើន​ឡើង

ចំណូល​ពី​ការ​លក់​សំបុត្រ​ចូល​អង្គរ​វត្ត​ធ្លាក់​ចុះ​ខណៈ​ភ្ញៀវ​កើន​ឡើង

Content image - Phnom Penh Post
ភ្ញៀវ​ទេសចរ​ជាតិ និង​អន្តរជាតិ​មក​ទស្សនា​ប្រាសាទ​អង្គរវត្ត ក្នុង​ពិធី​ចូលឆ្នាំ​ខ្មែរ​កាល​ពី​ខែ​មេសា ឆ្នាំ​២០១៥។ រូបថត លាង ផាន់ណារ៉ា

ចំណូល​ពី​ការ​លក់​សំបុត្រ​ចូល​អង្គរ​វត្ត​ធ្លាក់​ចុះ​ខណៈ​ភ្ញៀវ​កើន​ឡើង

ភ្នំពេញៈ ប្រាក់​ចំណូល​បាន​ពី​ការ​លក់​សំបុត្រ​ចូល​ទស្សនា​អង្គរ​វត្ត​នៅ​ក្នុង​រយៈពេល ៦ខែ​ដំបូង​បាន​ធ្លាក់​ចុះ​បន្តិច​ខណៈ​ដែល​ចំនួន​ភ្ញៀវ​ទេសចរ​បរទេស​បាន​កើន​ឡើង​ជិត ២​ភាគរយ។ នេះ​បើ​យោង​តាម​តួលេខ​ផ្លូវ​ការ​បាន​ចេញ​ផ្សាយ​ដោយ​អាជ្ញាធរ​អប្សារា​កាល​ពី​ម្សិលមិញ។

ប្រាសាទ​អង្គរវត្ត​ទទួល​បាន​ភ្ញៀវ​ទេសចរ​សរុប​ជាង ១,០៨​លាន​នាក់ កើន​ឡើង​ប្រហែល ១,៦១​ភាគរយ​ធៀប​នឹង​រយៈពេល​ដូច​គ្នា​កាល​ពី​ឆ្នាំ​មុន ដោយ​រក​បាន​ប្រហែល ៣០,៩​លាន​ដុល្លារ គឺ​ធ្លាក់​ចុះ ០,៦៩​ភាគរយ​បើ​ធៀប​រយៈពេល​ដូចគ្នា​កាល​ពី​ឆ្នាំ​ទៅ។ នេះ​បើ​តាម​របាយការណ៍។

លោក ឡុង កុសល អ្នក​នាំ​ពាក្យ​អាជ្ញាធរ​អប្សារា​ថ្លែង​ថា៖ «ការ​ធ្លាក់​ចុះ​ប្រាក់​ចំណូល​គឺ​ដោយ​សារ​ភ្ញៀវ​ទេសចរ​ភាគ​ច្រើន​ទិញ​សំបុត្រ​ចូល​ទស្សនា​រយៈពេល​មួយ​ថ្ងៃ​ជំនួស​ឲ្យ​រយៈពេល​ទស្សនា ៣ថ្ងៃ និង​មួយ​សប្ដាហ៍»។

បច្ចុប្បន្ន ភ្ញៀវ​ទេសចរ​បរទេស​ចំណាយ​ប្រាក់ ២០​ដុល្លារ​អាមេរិក​សម្រាប់​តម្លៃ​សំបុត្រ​ចូល​ទស្សនា​រយៈពេល​មួយ​ថ្ងៃ​នៅ​តំបន់​ប្រាសាទ​អង្គរវត្ត តម្លៃ ៤០​​ ដុល្លារ​អាមេរិក​សម្រាប់​រយៈពេល ៣ថ្ងៃ និង​តម្លៃ ៦០ ​ដុល្លារ​អាមេរិក​សម្រាប់​សំបុត្រ​ចូល​ទស្សនា​រយៈពេល​មួយ​សប្ដាហ៍។

លោក​លើក​ឡើង​ថា៖ «ក្រៅ​ពី​នេះ យើង​បាន​កត់​សម្គាល់​ឃើញ​ថា ចំនួន​ភ្ញៀវ​ទេសចរ​បរទេស​ចាប់​ពី​ខែ​មករា​ដល់​ខែ​មីនា​ឆ្នាំ​នេះ​បាន​ធ្លាក់​ចុះ​ប្រហែល​ពី៤ ទៅ​៥ភាគរយ ហើយ​ចំនួន​នេះ​បាន​កើន​ឡើង​បនិ្តច​ចាប់​ពី​ខែ​មេសា​ដល់​ខែ​មិថុនា។ និន្នាការ​នេះ​គឺ​ផ្ទុយ​ពី​ឆ្នាំ​មុន​នៅ​ពេល​ដែល​រយៈពេល​៣​ខែ​ដំបូង ជា​រដូវ​មាន​ភ្ញៀវ​ច្រើន»។

នៅ​ខេត្ត​សៀមរាប​ចាប់​ពី​ខែ​មករា​ដល់​ខែ​ឧសភា​ទទួល​បាន​ភ្ញៀវ​ទេសចរ​សរុប ២,៨​ លាន​នាក់ កើន​ឡើង ២៣,៥​ ភាគរយ​ធៀប​នឹង​រយៈពេល​ដូច​គ្នា​កាល​ពី​ឆ្នាំ​មុន។ ខណៈ​ដែល​ចំនួន​ភ្ញៀវ​ទេសចរ​ក្នុង​ស្រុក​មក​កាន់​ខេត្ត​សៀមរាប​បាន​កើន​ឡើង ៥៦,៥៩​ ភាគរយ​ដល់ ១,៨​លាន​នាក់ ចំនួន​ភ្ញៀវ​ទេសចរ​បរទេស​មក​កាន់​ខេត្ត​សៀមរាប​បាន​ធ្លាក់​ចុះ ១១ ​ភាគរយ​មក​នៅ​ត្រឹម​ជាង ៩៩០ ៩៩៦​នាក់។ នេះ​បើ​តាម លោក ឆឺយ ឆន អនុ​ប្រធាន​មន្ទីរ​ទេសចរណ៍​ខេត្ត​សៀមរាប។

លោក​លើក​ឡើង​ថា៖ «ចំនួន​ភ្ញៀវ​ទេសចរ​បរទេស​ទើប​នឹង​បាន​ចាប់​ផ្ដើម​កើន​ឡើង​កាលពី​ខែ​ឧសភា។ វា​ទំនង​ជា​ថា ពួក​គេ​ចំណាយ​ពេល​វេលា​កាន់​តែ​តិច​ក្នុង​ការ​ទស្សនា​ប្រាសាទ​អង្គរ​វត្ត ហើយ​ចំណាយ​ពេល​វេលា​ច្រើន​នៅ​ក្នុង​សកម្មភាព​កម្សាន្ត​នៅ​កន្លែង​នានា»។

លោក អាង គឹមអៀង ប្រធាន​សមាគម​ភ្នាក់ងារ​ទេសចរណ៍​កម្ពុជា​បាន​ថ្លែង​កាលពី​ម្សិលមិញ​ថា ការ​កើន​ឡើង​ភ្ញៀវ​ទេសចរ​អាស៊ី​មក​កាន់​ខេត្ត​សៀមរាប​កំពុង​ជំរុញ​ឲ្យ​មាន​ការ​ធ្លាក់​ចុះ​ប្រាក់​ចំណូល។

លោក​បន្ត​ថា៖ «វា​ទំនង​ជា​ថា ការ​កើន​ឡើង​ចំនួន​ភ្ញៀវ​ទេសចរ​មក​កាន់​ខេត្ត​សៀមរាប​មក​ពី​តំបន់​អាស៊ី។ ភ្ញៀវ​ទេសចរ​អាស៊ី​មិន​មាន​ចំណាប់​អារម្មណ៍​ក្នុង​ការ​ស្វែងយល់​ពី​ប្រវត្តិសាស្ដ្រ និង​ភាព​ស្មុគស្មាញ​របស់​ប្រាសាទ​នីមួយៗ​នោះ​ទេ ដោយ​សារ​តែ​ប្រាសាទ​ទាំង​អស់​នោះ​មើល​ទៅ​ដូច​គ្នា​មិន​ដូច​ជា​ភ្ញៀវ​ទេសចរ​មក​ពី​ប្រទេស​លោក​ខាង​លិច​ទេ»។

លោក​បាន​បន្ថែម​ថា៖ «ភ្ញៀវ​ទេសចរ​អាស៊ី​មិន​អាច​ស៊ូទ្រាំ​នឹង​កម្ដៅ​ព្រះ​អាទិត្យ​បាន​ទេ។ ពួក​គេ​នឹង​ចំណាយ​ពេល​មួយ​ថ្ងៃ​នៅ​បរិវេណ​ប្រាសាទ​អង្គរ ហើយ​ជ្រើស​រើស​យក​សកម្មភាព​កម្សាន្ត​កាន់​តែ​ច្រើន ដូច​ជា​ការ​ហែល​ទឹក ការ​ម៉ាស្សា ស្ប៉ា និង​ការ​ដើរ​ទិញ​អីវ៉ាន់៕PB

អត្ថបទគួរចាប់អារម្មណ៍