.jpg)
សកម្មភាពភ្ញៀវទេសចរ ទៅទស្សនាប្រាសាទបាយ័ន កាលពីពេលថ្មីៗនេះ។ ហ៊ឹន ពីសី
ភ្នំពេញ: ប្រាក់ចំណូលបានពីការលក់សំបុត្រចូលទស្សនារមណីយដ្ឋានអង្គរក្នុងរយៈពេល ៧ ខែ ឆ្នាំ ២០១៩ នេះបានធ្លាក់ចុះជាង ១០ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមសេចក្តីប្រកាសព័ត៌មានរបស់គ្រឹះស្ថានអង្គរ ដែលជាស្ថាប័នរដ្ឋគ្រប់គ្រងការលក់សំបុត្រសម្រាប់តំបន់ទេសចរណ៍មួយនេះ។
យោងតាមសេចក្តីប្រកាសព័ត៌មានរបស់គ្រឹះស្ថានអង្គរចេញផ្សាយកាលពីម្សិលមិញ បានឲ្យដឹងថា ប្រាក់ចំណូលពីការលក់សំបុត្រឲ្យភ្ញៀវទេសចរបរទេសចូលទស្សនារមណីយដ្ឋានអង្គរមានចំនួនជាង ៦២,៣ លានដុល្លារ ក្នុងរយៈពេល ៧ ខែ ឆ្នាំ ២០១៩ នេះ ដោយធ្លាក់ចុះ ១០,៥៦ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ចំណែកភ្ញៀវទេសចរមានចំនួនជិត ១,៤ លាននាក់ ធ្លាក់ចុះ ៩,៦៧ ភាគរយ។
សេចក្តីប្រកាសព័ត៌មានបានឲ្យដឹងទៀតថា ចំណែកប្រាក់ចំណូលពីការលក់សំបុត្រចូលទស្សនារមណីយដ្ឋានអង្គរក្នុងខែកក្កដា មានជាង ៦,៥ លានដុល្លារ ធ្លាក់ ១៩,៦៨ ភាគរយ ធៀបនឹងខែកក្កដា ឆ្នាំមុន។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានឱ្យដឹងថា ការធ្លាក់ចុះចំនួនភ្ញៀវទេសចរមកទស្សនាតំបន់អង្គរ អាចបណ្តាលមកពីមានការប្រកួតប្រជែងខ្លាំងជាមួយប្រទេសជិតខាង។
លោកស្រីបានថ្លែងថា៖ «កម្ពុជាកំពុងមានការប្រកួតប្រជែងខ្លាំងក្នុងវិស័យទេសចរណ៍ជាមួយប្រទេស ថៃ និងវៀតណាម។ប្រទេសទាំងនោះបានបញ្ចុះតម្លៃសំបុត្រយន្តហោះ ហើយការផ្តល់ទិដ្ឋាការរបស់គេក៏មានភាពងាយស្រួលដែរ។ ម៉្យាងវិញទៀតប្រទេសនៅក្នុងសមាគមអាស៊ានមួយចំនួន គេមិនយកថ្លៃទិដ្ឋាការផងដែរ ដើម្បីទាក់ទាញភ្ញៀវទេសចរ»។
លោកស្រីបន្តថា នៅកម្ពុជាការផ្តល់សេវាទិដ្ឋាការដល់ភ្ញៀវមានភាពស្មុគស្មាញ យឺតយ៉ាវ ពិសេសកង្វះជើងហោះហើរត្រង់ ដើម្បីទាក់ទាញភ្ញៀវទេសចរបរទេស។
លោកស្រីបន្តថា៖ «មានភ្ញៀវត្អូញត្អែរប្រាប់យើងថា នៅច្រកព្រំដែនការផ្តល់សេវាមិនមានភាពងាយស្រួល ភ្ញៀវរង់ចាំយូរ ហើយចំណុចមួយទៀតយើងខ្វះជើងហោះហើរត្រង់ពីអឺរ៉ុប និងអាមេរិក»។
លោក ខៀវ ធី ប្រធានសមាគមមគ្គុទេសក៍អង្គរកម្ពុជា បានប្រាប់ថា ការដំឡើងថ្លៃសំបុត្រចូលតំបន់អង្គរ សណ្ដាប់ធ្នាប់ក្នុងក្រុងសៀមរាប និងការផ្តោតការយកចិត្តទុកដាក់ខ្លាំងលើភ្ញៀវទេសចរជនជាតិចិន គឺជាមូលហេតុធ្វើឲ្យចំនួនទេសចរបរទេសថយចុះ។
លោកថ្លែងថា៖ «ចាប់តាំងពីសំបុត្រដំឡើងថ្លៃមក ភ្ញៀវភាគច្រើនទិញសំបុត្រចូលតំបន់អង្គរតែ ១ ថ្ងៃ គាត់ចេញទៅប្រទេសគេ ហើយសណ្តាប់ធ្នាប់យើងនៅមានកម្រិត»។
លោកបន្ថែមថា៖«ផ្លូវថ្មើរជើងយើងមាន ប៉ុន្តែការដាក់លក់ទំនិញ និងចតរថយន្តគ្មានសណ្តាប់ធ្នាប់ ព្រមទាំងគោលនយោបាយថ្នាក់ថ្នមចិនកំពុងធ្វើឱ្យប៉ះពាល់ភ្ញៀវទេសចរបរទេសផ្សេងទៀត»។
កាលពីថ្មីៗនេះ លោក ថោង ខុន រដ្ឋមន្ត្រីក្រសួងទេសចរណ៍ បានថ្លែងថា Zero-Dollar Tour កំពុងក្លាយជាចំណែកធ្វើឲ្យចំនួនភ្ញៀវទេសចរបរទេសមកទស្សនាខេត្តសៀមរាបធ្លាក់ចុះ។ ក្រុមហ៊ុនដែលលក់កញ្ចប់ប្រភេទ Zero-Dollar Tour ជាអ្នកបំផ្លាញគោលដៅទេសចរណ៍ខេត្តសៀមរាប៕ LA
