The Phnom Penh Post Search

Search form

Logo of Phnom Penh Post newspaper Phnom Penh Post - ចំណូល​ពី​ការ​លក់​សំបុត្រ​ទស្សនា​អង្គរ​មាន​ $៥៩ ​លាន

ចំណូល​ពី​ការ​លក់​សំបុត្រ​ទស្សនា​អង្គរ​មាន​ $៥៩ ​លាន

ភ្ញៀវ​ទេសចរ​អន្តរជាតិ​មក​ទស្សនា​ប្រាសាទ​អង្គរវត្ត​នា​ពេល​កន្លង​មក។
ភ្ញៀវ​ទេសចរ​អន្តរជាតិ​មក​ទស្សនា​ប្រាសាទ​អង្គរវត្ត​នា​ពេល​កន្លង​មក។ ហេង ជីវ័ន

ចំណូល​ពី​ការ​លក់​សំបុត្រ​ទស្សនា​អង្គរ​មាន​ $៥៩ ​លាន

ភ្នំពេញៈ កម្ពុជា​ទទួល​បាន​ចំណូល​ជិត​ ៦០ ​លាន​ដុល្លារ​ពី​ការ​លក់​ប័ណ្ណ​ចូល​ទស្សនា​តំបន់​ប្រាសាទ​អង្គរ​ដល់​ភ្ញៀវទេសចរ​អន្តរជាតិ​ចំនួន​ជាង​ ២​ លាន​នាក់​ចាប់​តាំងពី​ខែ​ មករា រហូត​ដល់​ខែ ​ធ្នូ កាលពី​ឆ្នាំ​ ២០១៤។ នេះ​បើ​តាម​តួលេខ​ចេញ​ផ្សាយ​ជា​ផ្លូវការ​ដោយ​អាជ្ញាធរ​អប្សរា​កាលពី​ម្សិលមិញ។

សេចក្តី​ប្រកាស​ព័ត៌មាន​បង្ហាញ​ថា ភ្ញៀវទេសចរ​ទៅ​ទស្សនា​ខេត្ត​សៀមរាប​សរុប​មាន ​៥,០២ ​លាន​នាក់ ក្នុង​នោះ​ភ្ញៀវ​អន្តរជាតិ​មាន ​២,៣ ​លាន​នាក់​។ ទោះ​ជា​យ៉ាង​ណា ​មាន​តែ​ភ្ញៀវ​អន្តរជាតិ ​២,០៥ ​លាន​នាក់​ប៉ុណ្ណោះ​ដែល​ទិញ​ប័ណ្ណ​ចូល​ទស្សនា​តំបន់​ប្រាសាទ​អង្គរ​។

ចំណូល​សរុប​ពី​ការ​លក់​ប័ណ្ណ​ចូល​ទស្សនា​ អង្គរ ​ដល់​ភ្ញៀវ​ទេសចរ​អន្តរជាតិ​បាន​កើន​ពី​ ៥៧,៦ ​លាន​ដុល្លារ​កាលពី​ឆ្នាំ ​២០១៣ ​មក ​៥៩,៣ ​លាន​ដុល្លារ​ក្នុង​ឆ្នាំ ​២០១៤ ខណៈ​ ភ្ញៀវ​ទេសចរ​អន្តរជាតិ​ចូល​ទស្សនា​ប្រាសាទ​អង្គរវត្ត​បាន​កើន​ពី ​២,០២ ​លាន​នាក់​ក្នុង​ឆ្នាំ ​២០១៣ ទៅ​ ២,០៥ ​លាន​នាក់​ កាលពី​ឆ្នាំ​មុន​។

ទោះបី​ជា​តួលេខ​នៃ​ចំណូល​បង្ហាញ​កំណើន អ្នកសង្កេត​នៅ​តែ​យល់​ឃើញ​ថា តួលេខ​ចំណូល​នេះ​មិន​ឆ្លុះបញ្ចាំង​ពី​ចំនួន​និង​រយៈពេល​ទស្សនា​ពិតប្រាកដ​របស់​ភ្ញៀវទេសចរ​អន្តរជាតិ​។

លោក ឡុង កុសល អគ្គនាយករង​នាយកដ្ឋាន​ផ្សព្វផ្សាយ​របស់​អាជ្ញាធរ​អប្សរា កាលពី​ម្សិលមិញ ​បាន​ការពារ​ភាពត្រឹមត្រូវ​ពាក់ព័ន្ធ​នឹង​តួលេខ​ចំណូល​ដែល​ចេញ​ផ្សាយ​នេះ​។

លោក​ថ្លែង​ថា៖ «អាជ្ញាធរ​អប្សរា​បាន​ផ្ទៀងផ្ទាត់​រវាង​តួលេខ​ចំនួន​ភ្ញៀវទេសចរ​ជាមួយ​តួលេខ​ពី​មន្ទីរទេសចរណ៍​ខេត្ត និង​តួលេខ​ពី​ក្រុមហ៊ុន​។ យើង​ផ្ទៀងផ្ទាត់​ដោយ​ត្រឹមត្រូវ និង​ប្រាកដប្រជា ហើយ​យើង​ក៏​មាន​អ្នកជំនាញ​ពី​ក្រសួង​សេដ្ឋកិច្ច​ផ្ទៀងផ្ទាត់​លើ​តួលេខ​នេះ​បន្ថែម​មុន​នឹង​សម្រេច​លើ​តួលេខ​នេះ»​។

លោក​បន្ត​ថា មាន​ការ​បកស្រាយ​ខុស​គ្នា​ពី​តួលេខ៖ «​មាន​ការ​ប៉ាន់ប្រមាណ​ថា​ នឹង​មាន​ភ្ញៀវទេសចរ​បរទេស​ ៥​ លាន​នាក់​បាន​មក​ទស្សនា​ប្រាសាទ​អង្គរវត្ត បន្ទាប់មក និយាយ​ថា ៣​ លាន​នាក់ ប៉ុន្តែ​តាមពិត​ចំនួន​ពិតប្រាកដ​គឺ​មាន​ត្រឹម​តែ ​២,០៥ ​លាន​នាក់​ប៉ុណ្ណោះ​នៅ​ឆ្នាំ​នេះ ដែល​កើនឡើង​ពី ​២,០២​ លាន​នាក់ កាលពី​ឆ្នាំ​មុន​»​។

លោក​បាន​និយាយ​សំដៅ​ទៅ​ដល់​តួលេខ​ដែល​បាន​ផ្ដល់​ដោយ​លោក សុន ឆ័យ តំណាងរាស្ដ្រ​គណបក្ស​ប្រឆាំង​កាលពី​ខែ​ធ្នូ ឆ្នាំ​ ២០១៤​ កន្លង​ទៅ​នេះ​។

តាម​លិខិត​ចេញ​ផ្សាយ​ដោយ​អាជ្ញាធរ​អប្សារា​កាលពី​ចុង​ខែ​វិច្ឆិកា​ឆ្នាំ​មុន បង្ហាញ​ថា ប្រាក់ចំណូល​បាន​ពី​ការ​លក់សំបុត្រ​កើនឡើង​ពី ​៣៣​ លាន​ដុល្លារ​កាលពី​ឆ្នាំ ​២០១០ ដល់​ជាង​ ៤២​ លាន​ដុល្លារ​ កាលពី​ឆ្នាំ​ ២០១១ និង​ជាង ​៥១​ លាន​ដុល្លារ​ កាលពី​ឆ្នាំ​ ២០១២។

រដ្ឋាភិបាល​បាន​ផ្ដល់​សិទ្ធិ​សម្បទាន​លើ​ការ​លក់សំបុត្រ​ដល់​ក្រុមហ៊ុន ​សូគីម៉ិច របស់​លោក សុខ គង់ ដែល​ជា​ម្ចាស់​សណ្ឋាគារ​សុខា តាំងពី​ឆ្នាំ ​១៩៩៩​។

យោងតាម​លិខិត​នេះ ក្រុមហ៊ុន​ទទួល​បាន​អាណត្តិ​រយៈពេល​ ៥​ ឆ្នាំ ហើយ​ប្រាក់ចំណូល​បាន​ពី​ការ​លក់​សំបុត្រ​នឹង​ត្រូវ​បែងចែក​ជា ​១០ ​ភាគរយ​នៅក្នុង​ពន្ធ​លើ​តម្លៃ​បន្ថែម​ (VAT) ​១៥ ​ភាគរយ​សម្រាប់​ការអភិរក្ស និង​ការ​អភិវឌ្ឍ​របស់​មូលនិធិ​ប្រាសាទ​ ១៥​ ភាគរយ ​ផ្ដល់​ជូន​ក្រុមហ៊ុន និង​ប្រាក់ចំណូល​នៅ​សល់​ត្រូវ​ដាក់​ចូល​ជា​ថវិការដ្ឋ​។ បន្ថែម​លើ​នេះ ក្រុមហ៊ុន​មាន​ភារកិច្ច​វិនិយោគ​លើ​ការ​អភិវឌ្ឍ​តំបន់​អង្គរ​ក្នុង​ទឹកប្រាក់​ចន្លោះ​ពី​ ៧០ ​ដល់ ​៨០ ​ម៉ឺន​ដុល្លារ​ជា​រៀងរាល់​ឆ្នាំ​។

លោក យ៉ែម បុញ្ញឫទ្ធិ ប្រធាន​គណៈកម្មការ​ទី​៧ នៃ​រដ្ឋសភា កាលពី​ម្សិលមិញ​បាន​ថ្លែង​ថា​ប្រាក់ចំណូល​នេះ​មិន​ឆ្លុះបញ្ចាំង​ពី​តម្លៃ​នៃ​ការ​លក់​សំបុត្រ​នៅ​ប្រាសាទ​អង្គរវត្ត​នោះ​ទេ​។

លោក​បន្ត​ថា​៖ «​បើ​យើង​បែងចែក​ប្រាក់​ ៥៩ ​លាន​ដុល្លារអាមេរិក​ជាមួយ​នឹង​ភ្ញៀវទេសចរ ​២,៣៥​ លាន​នាក់ នៅពេល​នេះ​យើង​មើល​ឃើញ​ថា ភ្ញៀវទេសចរ​ម្នាក់​ចំណាយ​តែ​ជិត​ ៣០ ​ដុល្លារអាមេរិក​ប៉ុណ្ណោះ​។

ប័ណ្ណ​ចូល​ទស្សនា​តំបន់​ប្រាសាទ​អង្គរ​ក្នុង​មួយ​ថ្ងៃ​មាន​តម្លៃ​ ២០ ​ដុល្លារ និង ​៤០ ​ដុល្លារ​សម្រាប់​រយៈពេល ​៣ ​ថ្ងៃ ហើយ​ ៦០ ​ដុល្លារ​សម្រាប់​រយៈពេល​មួយ​សប្តាហ៍​៕

អត្ថបទគួរចាប់អារម្មណ៍