.jpg)
ភ្ញៀវទៅទស្សនាប្រាសាទអង្គរវត្ត នាពេលកន្លងមក។ ហេង ជីវ័ន
ភ្នំពេញ: ប្រាក់ចំណូលបានពីការលក់សំបុត្រចូលទស្សនារមណីយដ្ឋានអង្គរបានបន្តធ្លាក់ចុះនៅក្នុងរយៈពេល ៨ ខែ ឆ្នាំ ២០១៩ នេះដោយសម្រេចបានជិត ៧០ លានដុល្លារ ដែលធ្លាក់ចុះជាង ១១ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមសេចក្តីប្រកាសព័ត៌មានរបស់គ្រឹះស្ថានអង្គរចេញផ្សាយនៅថ្ងៃទី ១ កញ្ញា ម្សិលមិញ។
យោងតាមសេចក្តីប្រកាសព័ត៌មានរបស់គ្រឹះស្ថានអង្គរប្រាក់ចំណូលពីការលក់សំបុត្រឲ្យភ្ញៀវទេសចរបរទេសចូលទស្សនារមណីយដ្ឋានអង្គរក្នុងរយៈពេល ៨ ខែមានជាង ៦៩,៤ លានដុល្លារធ្លាក់ចុះ ១១,៨២ ភាគរយបើធៀបនឹងរយៈពេលដូចគ្នាកាលពីឆ្នាំមុន។ ចំណែកភ្ញៀវមានចំនួន ១,៥ លាននាក់ធ្លាក់ចុះ ១១,០៥ ភាគរយ។
សេចក្តីប្រកាសព័ត៌មានបានឲ្យដឹងទៀតថា ចំណែកប្រាក់ចំណូលពីការលក់សំបុត្រចូលទស្សនារមណីយដ្ឋានអង្គរក្នុងខែសីហាមានជាង ៧,១ លានដុល្លារធ្លាក់ ២១,៥០ ភាគរយបើធៀបនឹងខែសីហាឆ្នាំមុន។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាធ្លាប់ប្រាប់ភ្នំពេញ-ប៉ុស្តិ៍ថាការធ្លាក់ចុះចំនួនភ្ញៀវទេសចរមកទស្សនាតំបន់អង្គរអាចបណ្តាលមកពីមានការប្រកួតប្រជែងខ្លាំងជាមួយប្រទេសជិតខាង។ លោកស្រីបានថ្លែងថា៖ «កម្ពុជាកំពុងមានការប្រកួតប្រជែងខ្លាំងក្នុងវិស័យទេសចរណ៍ជាមួយប្រទេសថៃ និងវៀតណាម។ ប្រទេសទាំងនោះបានបញ្ចុះតម្លៃសំបុត្រយន្តហោះ ហើយការផ្តល់ទិដ្ឋាការរបស់គេក៏មានភាពងាយស្រួលដែរ»។
លោកស្រីបន្តថានៅកម្ពុជាការផ្តល់ទិដ្ឋាការមានភាពស្មុគស្មាញ យឺតយ៉ាវ ពិសេសកង្វះជើងហោះហើរត្រង់ដើម្បីទាក់ទាញភ្ញៀវទេសចរបរទេស។
លោកស្រីបន្តថា៖ «មានភ្ញៀវត្អូញត្អែរប្រាប់យើងថា នៅច្រកព្រំដែនការផ្តល់សេវាមិនមានភាពងាយស្រួល ភ្ញៀវរង់ចាំយូរ ហើយចំណុចមួយទៀតយើងខ្វះជើងហោះហើរត្រង់ពីអឺរ៉ុប និងអាមេរិក»។
បើតាមរបាយការណ៍ក្រសួងទេសចរណ៍ក្នុងរយៈពេល ៦ ខែក្នុងឆ្នាំ ២០១៩ នេះកម្ពុជាបានទទួលភ្ញៀវទេសចរបរទេសជាង ៣,៣ លាននាក់ កើនឡើង ១១ ភាគរយបើធៀបនឹងរយៈពេលដូចគ្នាក្នុងឆ្នាំ ២០១៨។
កាលពីអំឡុងខែកក្កដាកន្លងមក លោក ថោង ខុន រដ្ឋមន្ត្រីក្រសួងទេសចរណ៍ បានថ្លែងថា Zero-Dollar Tour កំពុងក្លាយជាចំណែកធ្វើឲ្យចំនួនភ្ញៀវទេសចរបរទេសទស្សនាខេត្តសៀមរាបធ្លាក់ចុះ។ លោកថ្លែងថាក្រុមហ៊ុនលក់កញ្ចប់ប្រភេទ Zero-Dollar Tour ជាអ្នកបំផ្លាញគោលដៅទេសចរណ៍ខេត្តសៀមរាប៕ LA
