ភ្នំពេញៈ ប្រាក់ចំណូលសរុបរបស់កំពង់ផែស្វយ័តភ្នំពេញ (PPAP) នៅឆ្នាំ ២០១៩ នឹងមើលឃើញពីកំណើនខ្ពស់រហូតដល់ ៣៥ ភាគរយ បើធៀបឆ្នាំ ២០១៨ គាំទ្រដោយកំណើនខ្ពស់នៃចរាចរទំនិញ និងភ្ញៀវទេសចរឆ្លងកាត់កំពង់ផែ។
តាមរបាយការណ៍ហិរញ្ញវត្ថុប៉ាន់ស្មានរបស់ PPAP ដែលបានដាក់ទៅផ្សារមូលបត្រកម្ពុជាកាលពីថ្ងៃចន្ទ ប្រាក់ចំណូលសរុបរបស់កំពង់ផែសម្រេចបាន ២៩,៨២ លានដុល្លារសម្រាប់ឆ្នាំ ២០១៩ កើនឡើង ៣៥ ភាគរយបើប្រៀបធៀបនឹង ២២,១០ លានដុល្លារក្នុងឆ្នាំ ២០១៨។
របាយការណ៍ដដែលបង្ហាញថា នាវាដឹកទំនិញឆ្លងកាត់តាមកំពង់ផែនេះមានចំនួន ២ ៣៥០ គ្រឿង ដែលដឹកកុងតឺន័រទំនិញចំនួន ២៧៥ ០០០ TEU កើនឡើង ២៩ ភាគរយ បើធៀបនឹងឆ្នាំ ២០១៨ មានចំនួន ២១៣ ៥៧១ TEU។
ភ្នំពេញប៉ុស្តិ៍មិនអាចសុំការអត្ថាធិប្បាយពីលោក ហ៊ឺ បាវី អគ្គនាយកនៃ PPAP បានទេកាលពីថ្ងៃពុធ។
អ្នកស្រី គឹម សុផានីតា ប្រធានស្តីទីផ្នែកប្រតិបត្តិការទីផ្សារមូលបត្រកម្ពុជា (CSX) បានប្រាប់ភ្នំពេញប៉ុស្តិ៍ថា ការបង្ហាញនូវប្រតិបត្តិការអាជីវកម្មដ៏ល្អរបស់កំពង់ផែនឹងក្លាយជាការទាក់ទាញមួយទៀតដល់វិនិយោគិនសាធារណៈលើការជួញដូរមូលបត្ររបស់ពួកគេដែលកំពុងជួញដូរលើទីផ្សារ។
អ្នកស្រីបន្តថា៖ «PPAP តែងតែជាក្រុមហ៊ុនចុះបញ្ជីឆ្នើមព្រោះក្រុមហ៊ុនតែងតែបង្ហាញពីដំណើរការអាជីវកម្មល្អ។ ការណ៍នេះនឹងផ្តល់តម្លៃបន្ថែមដល់ក្រុមហ៊ុនតាមរយៈការទទួលបានភាពជឿជាក់ និងទំនុកចិត្តរបស់វិនិយោគិន»។
អ្នកស្រីបន្ថែមថា៖ «ហើយខ្ញុំជឿជាក់ថា ក្រុមហ៊ុននឹងសម្រេចបែងចែកភាគលាភកាន់តែខ្ពស់ទៅដល់ម្ចាស់ភាគហ៊ុនរបស់ខ្លួននៅឆ្នាំនេះ»។
របាយការណ៍ដដែលបង្ហាញថា ចំនួនប្រេងឥន្ធនៈ និងហ្គាសឆ្លងកាត់កំពង់ផែមានបរិមាណចំនួន ៣ ៨១០ ៦៦៥ តោន កើនឡើង ២២ ភាគរយ បើប្រៀបធៀបទៅនឹង ៣ ១៣៤ ៩៩៦ តោន ក្នុងឆ្នាំ ២០១៨។
របាយការណ៍បានបង្ហាញទៀតថា សម្រាប់រយៈពេលនេះដែរ កំពង់ផែនេះក៏ត្រូវបានស្វាគមន៍ អ្នកដំណើរ និងភ្ញៀវទេសចរអន្តរជាតិចំនួន ៥១ ៨២៨ នាក់ឆ្លងកាត់ប្រទេសកម្ពុជា វៀតណាម កើនឡើង ១៧ ភាគរយបើប្រៀបធៀបទៅនឹងតែចំនួន ៤៤,២៩០ នាក់ ក្នុងឆ្នាំ ២០១៨ ខណៈអ្នកដំណើរអន្តរជាតិ និងនាវាទេសចរណ៍តាមនាវាធំៗឆ្លងកាត់ច្រកកម្ពុជា វៀតណាមមានចំនួន ២ ២៩០ នាក់ គឺកើនឡើង ២ ភាគរយ បើប្រៀបធៀបដំណើរកម្សាន្តចំនួន ២ ២៤៩ កាលពីឆ្នាំ ២០១៨៕