The Phnom Penh Post Search

Search form




Logo of Phnom Penh Post newspaper Phnom Penh Post - ចំណូល​ពន្ធដារ​កើន​​ជិត​១៩%

ចំណូល​ពន្ធដារ​កើន​​ជិត​១៩%

ចំណូល​ពន្ធដារ​កើន​​ជិត​១៩%

130911_13
ការប្រមូលពន្ធលើមធ្យោបាយធ្វើដំណើរនាពេលកន្លងមក

ភ្នំពេញៈ ចំណូល​ពន្ធដារ​បាន​កើន​ឡើង​ជិត ១៩ ភាគរយ​ក្នុង​រយៈ​ពេល ៨ ខែ​ឆ្នាំ ២០១៣ នេះ​បើ​ធៀប​ទៅ​នឹង​រយៈ​ពេល​ដូច​គ្នា​កាល​ពី​ឆ្នាំ​មុន។ នេះ​បើ​យោង​តាម​តួលេខ​ពី​អគ្គ​នាយកដ្ឋាន​ពន្ធដារ​ដែល​បាន​ចេញ​ផ្សាយ​កាល​ពី​ម្សិលមិញ។

យោង​តាម​សេចក្តី​ប្រកាស​ព័ត៌មាន​កិច្ច​ប្រជុំ​ស្ដី​អំពី​ការ​សរុប​លទ្ធផល​ការងារ​សារពើពន្ធ​ប្រចាំ ខែ សីហា ឆ្នាំ ២០១៣ របស់​អគ្គ​នាយកដ្ឋាន​ពន្ធដារ​នៅ​ថ្ងៃទី៩ ខែ កញ្ញា ឆ្នាំ ២០១៣ បាន​ឲ្យ​ដឹង​ថា សរុប​រយៈ​ពេល ៨ ខែ​ក្នុង​ឆ្នាំ ២០១៣ ចំណូល​ពន្ធអាករ​សរុប​មាន​ចំនួន ២ ៤២៤ ៩១៦ លាន​រៀល​គឺ​ប្រមាណ ៦០៦,២ លាន ដុល្លារ​ស្មើ​នឹង ៧០ ភាគរយ​នៃ​គោលដៅ​កំណត់​ក្នុង​ច្បាប់ ហិរញ្ញវត្ថុ​សម្រាប់​ការ​គ្រប់​គ្រង​នៅ​ឆ្នាំ​២០១៣ ក្នុង​នោះ​មាន​ថវិកា​រដ្ឋ​សម្រេច​បាន​ចំនួន​ស្មើ​នឹង ៦៨,១ ភាគរយ និង​ថវិកា​រាជធានី ខេត្ត​សម្រេច​បាន ៨៤,៤ ភាគរយ។ បើ​ប្រៀប​ធៀប​នឹង​ការ​អនុវត្ត​ក្នុង​រយៈ​ពេល ៨ ខែ​ដូច​គ្នា​ក្នុង​ឆ្នាំ ២០១២ ឃើញ​ថា នៅ​ក្នុង​ឆ្នាំ ២០១៣ នេះ មាន​កំណើន ១៦,៨ ភាគរយ។

សេចក្តី​ប្រកាស​ព័ត៌មាន​ឲ្យ​ដឹង​ថា តាម​ការ​វិភាគ​ប្រភេទ​ពន្ធ​ឃើញ​ថា ចំណូល​ក្នុង​ឆ្នាំ ២០១៣ កើន​ឡើង​គ្រប់​ប្រភេទ​ពន្ធ ក្នុង​នោះ​ប្រភេទ​ពន្ធ​សំខាន់ៗ​ដែល​មាន​ការ​កើន​ឡើង​មាន​ពន្ធ​លើ​ប្រាក់​បៀវត្សរ៍​មាន​ការ​កើន​ឡើង​ប្រមាណ ២២,១ ភាគរយ ពន្ធ​លើ​ប្រាក់​ចំណេញ​មាន​ការ​កើន​ឡើង​ប្រមាណ ១៨,៣ ភាគរយ រីឯ​អាករ​លើ​តម្លៃ​បន្ថែម​មាន​ការ​កើន​ឡើង​ប្រមាណ ១៤,៩ ភាគរយ និង​អាករ​ពិសេស​មាន​ការ​កើន​ឡើង​ប្រមាណ​ជា ១៥,៨ ភាគរយ។

ការ​ពិនិត្យ​តាម​វិស័យ​ឃើញ​ថា ចំណូល​ក្នុង ២០១៣ មាន​ការ​កើន​ឡើង ស្ទើរ​គ្រប់​សកម្មភាព​ក្នុង​នោះ​ផ្នែក​សេវា​ហិរញ្ញវត្ថុ បាន​កើន​ឡើង​ប្រមាណ ២៧,៤ ភាគរយ ផ្នែក​ផលិត​ភេសជ្ជៈ​កើន​ឡើង​ប្រមាណ ១៥,២ ភាគរយ ផ្នែក​ផលិត​គ្រឿង​ប្រើ​ប្រាស់​កើន​ឡើង​ប្រមាណ ៣៦,២ ភាគរយ ផ្នែក​ទូរគមនាគមន៍​កើន​ឡើង​ប្រមាណ ១៤,៧ ភាគរយ អាហរ័ណ នីហរ័ណ​កើន​ឡើង​ប្រមាណ ២៣,៨ ភាគរយ ស្ថាបត្យកម្ម និង​សំណង់​កើន​ឡើង ប្រមាណ ៣១,៣ ភាគរយ ផ្នែក​ផលិត​សម្លៀកបំពាក់ កើន​ឡើង​ប្រមាណ ៤៤,៦ ភាគរយ ផ្នែក​ដឹក​ជញ្ជូន និង​ទេសចរណ៍​កើន​ឡើង​ប្រមាណ ៣៣,២ ភាគរយ អាកាសយានដ្ឋាន និង​កំពង់ផែ​បាន​កើន​ឡើង​ប្រមាណ ៦៤,៣ ភាគរយ សណ្ឋាគារ​និង​ផ្ទះ​សំណាក់​កើន​ឡើង​ប្រមាណ ២២,៤ ភាគរយ លក់​គ្រឿង​យន្ត​ស្មើ ២៣១ ភាគរយ ផលិត​ម្ហូប អាហារ​ស្មើ​នឹង ៤៧,៩ ភាគរយ និង ផ្នែក​ផលិត​គ្រឿង​អេឡិច​ត្រូនិក និង​អេឡិច​ត្រូនិក​ស្មើ​នឹង ៣៩,៧ ភាគរយ។

លោក គង់ វិបុល អគ្គ​នាយក​នៃ​អគ្គ​នាយកដ្ឋាន​ពន្ធដារ​បាន​ឲ្យ​ដឹង​ថា បើ​ទោះ​បី​ជា​មាន​បញ្ហា​ប្រឈម​ខ្លះៗ​ក៏​ដោយ ក៏​លោក​នៅ​តែ​ជំរុញ​លើក​ទឹក​ចិត្ត​ថ្នាក់​ដឹក​នាំ​គ្រប់​អង្គភាព​ពន្ធដារ​ទូទាំង​ប្រទេស​ឲ្យ​ជម្នះ​ការ​លំបាក ដោយ​ខិតខំ​អនុវត្ត​ភារកិច្ច​ប្រមូល​ចំណូល​ពន្ធ​គ្រប់​ប្រភេទ​ឲ្យ​បាន​សម្រេច តាម​គោលដៅ​កំណត់ និង​បង្កើន​ការ​ផ្តល់​សេវា​ដល់​អ្នក​ជាប់​ពន្ធ​ឲ្យ​បាន​កាន់​តែ​ប្រសើរ។ លោក​ថ្លែង​ថា ស្ថាប័ន​នេះ​នឹង​ផ្តល់​ភាព​ងាយ​ស្រួល​ដល់​អ្នក​ជាប់​ពន្ធ​ទទួល​សេវា​ងាយ​ស្រួល​ឆាប់​រហ័ស​គ្រប់​ទីកន្លែង។

ដោយ​ឡែក​សម្រាប់ ខែ សីហា ឆ្នាំ ២០១៣ អគ្គ​នាយកដ្ឋាន​ពន្ធដារ​ប្រមូល​និង​បង់​ពន្ធ​ចូល​រដ្ឋ​បាន ២៧៦ ៥៤៩ លាន​រៀល​ប្រមាណ ៦៩,២ លាន​ដុល្លារ បាន​កើន​លើស​ខែ កក្កដា ឆ្នាំ ២០១៣ ចំនួន ៩,៣២៣ លាន​រៀល ចំណូល​ពន្ធ​មាន​ការ​កើន​ឡើង​ស្មើ​នឹង ១៥,៤ ភាគរយ៕

អត្ថបទគួរចាប់អារម្មណ៍