The Phnom Penh Post Search

Search form

Logo of Phnom Penh Post newspaper Phnom Penh Post - ចំណូល​ពីការ​ប្រមូល​ពន្ធ​កើន​២៩%




ចំណូល​ពីការ​ប្រមូល​ពន្ធ​កើន​២៩%

ចំណូល​ពីការ​ប្រមូល​ពន្ធ​កើន​២៩%

121211_13
ប្រជាពលរដ្ឋបង់ពន្ធលើធម្យោបាយធ្វើដំណើរតាមផ្លូវកាលពីមុន ប៉ុស្តិ៍

ភ្នំពេញៈ កម្ពុជា​ប្រមូល​ពន្ធ​បាន​៦៨៣​លាន​ដុល្លារ​គិត​ត្រឹម​ខែ​វិច្ឆិកា​ឆ្នាំ​នេះ គឺ​កើន​ឡើង​២៩,២២​ភាគ​រយ​បើ​ធៀប​រយៈ​ពេល​ដូច​គ្នា​កាល​ពីឆ្នាំ​ទៅ​ដែល​មាន​៤៨៣​លាន​ដុល្លារ។ នេះ​បើ​តាម​ទិន្នន័យ​ពី​អគ្គ​នាយកដ្ឋាន​ពន្ធ​ដារ​ចេញ​ផ្សាយ​កាល​ពី​សប្តាហ៍​មុន។

សេដ្ឋ​វិទូ​បាន​ឲ្យ​ដឹង​ថា​កំណើន​ចំណូល​ពន្ធ​បាន​ឆ្លុះ​បញ្ចាំង​ឲ្យ​ឃើញ​ថា​កម្ពុជា​នៅ​មាន​ឱកាស​ប្រមូល​ពន្ធ​កាន់​តែ​ច្រើន ហើយ​អាច​លុប​បំបាត់​ការ​ពឹង​ផ្អែក​លើ​ជំនួយ​បរទេស ប៉ុន្តែ​ព្រមាន​ថា គេ​ត្រូវ​កែ​លម្អ​ការ​ប្រមូល​ពន្ធ​។

សេចក្តី​ប្រកាស​ព័ត៌មាន​ពី​អគ្គ​នាយកដ្ឋាន​ពន្ធដារ​បង្ហាញ​ថា​ចំណូល​ទាំង​នេះ​ប្រមូល​បាន​ពី​ពន្ធ​លើ​ប្រាក់​ចំណូល ពន្ធ​កាត់​ទុក ពន្ធ​ប្រាក់​ខែ ពន្ធ​លើ​តម្លៃ​បន្ថែម​ពន្ធ​ពិសេស​សម្រាប់​ការ​ទិញ​ទំនិញ និង​សេវាកម្ម​មួយ​ចំនួន ពន្ធ​អាជីវកម្ម ពន្ធ​យាន​យន្ត ពន្ធ​ប៉ាតង់ និង​ពន្ធ​អចលនវត្ថុ។

លោក កង ច័ន្ទ​តារារ័ត្ន ប្រធាន​វិទ្យាស្ថាន​កម្ពុជា​សម្រាប់​ការ​សិក្សា​លើ​ការ​អភិវឌ្ឍ​បាន​ឲ្យ​ដឹង​ថា កំណើន​ប្រាក់​ចំណូល​ថ្នាក់​ជាតិ ឆ្លុះ​បញ្ចាំង​អំពី​ការ​រីក​ចម្រើន​ក្នុង​ការ​ប្រមូល​ពន្ធ និង​កំណើន​សកម្មភាព​សេដ្ឋកិច្ច។

លោក​បន្ត​ថា៖ «វា​ឆ្លុះ​បញ្ចាំង​ឲ្យ​ឃើញ​ថា យើង​មាន​ក្តី​សង្ឃឹម​ជា​ច្រើន ក្នុង​ការ​ឈាន​ដល់​ចំណុច​កាន់​តែ​ខ្លាំង ដើម្បី​សង​បំណុល​បរទេស និង​កាត់​បន្ថយ​ការ​ពឹង​ផ្អែក​លើ​ជំនួយ​បរទេស។ យើង​សប្បាយ​រីក​រាយ​នៅ​ពេល​យើង​ឃើញ​ពី​កំណើន​ប្រាក់​ចំណូល​ពី​ការ​ប្រមូល​ពន្ធ​ថ្នាក់​ជាតិ»​។

គណបក្ស​ប្រឆាំង​អះអាង​ថា​ចំណូល​នៅ​តែ​ទាប​ហើយ​អំពើ​ពុក​រលួយ​ស្ថិត​ពីក្រោយ​បញ្ហា​នេះ​។

លោក យឹម សុវណ្ណ អ្នក​នាំ​ពាក្យ​គណបក្ស​សម រង្ស៊ី បាន​ឲ្យ​ដឹង​ថា កម្ពុជា អាច​ប្រមូល​បាន​តែ​ប្រហែល​១២​ភាគ​រយ​នៃ GDP ប៉ុណ្ណោះ បើ​ធៀប​នឹង​ប្រទេស​ផ្សេង​ៗ​ទៀត ដូច​ជា​ប្រទេស​ថៃ​។

លោក​បន្ត​ថា៖ «​ចំណូល​ក្នុង​ស្រុក​របស់​យើង មិន​ស្រប​តាម​ចំនួន​ជាក់​ស្តែង​ឡើយ។ យើង​ខាត​បង់​ប្រហែល​ពី៥០០​លាន​ទៅ​១​ពាន់​លាន​ដុល្លារ ក្នុង​មួយ​ឆ្នាំ ដោយ​សារ​អំពើ​ពុក​រលួយ​»។ លោក​បញ្ជាក់​ថា​ចំណូល​ជា​ច្រើន​មិន​បាន​រឹត​បន្តឹង​ខ្លាំង​ទៅ​ដី​សម្បទាន​សេដ្ឋកិច្ច កាស៊ីណូ​៥០​កន្លែង និង​សំបុត្រ​ចូល​ទស្សនា​ប្រាសាទ​អង្គរវត្ត​នោះ​ឡើយ​។

កាល​ពី​សប្តាហ៍​មុន រដ្ឋាភិបាល​បាន​អនុម័ត​បង្កើន​ការ​ចំណាយ​ថវិកា​ជាតិ រហូត​ដល់​ជិត​១៣​ភាគ​រយ​សម្រាប់​២០១៣​ដល់​ជាង​៣​ពាន់​លាន​ដុល្លារ​កើន​២,៧​ពាន់​លាន​ដុល្លារ​នៅ​ឆ្នាំ​នេះ​។

កាល​ពី​ថ្ងៃ​ចន្ទ​លោក នាយក​រដ្ឋមន្ត្រី ហ៊ុន សែន មិន​បាន​លើក​ឡើង​នូវ​ក្តី​កង្វល់​ចំពោះ​កំណើន​ថវិកា​ជាតិ​នេះ​ទេ ដោយ​លោក​បាន​លើក​ឡើង​ថា ប្រាក់​ចំណូល​ជាតិ​នៅ​តែ​បន្ត​កើន​ឡើង។

តាម​សេចក្តី​ព្រាង​ថវិកា​ជាតិ​ឆ្នាំ​២០១៣​មក​ទល់​ពេល​នេះ​កម្ពុជា​ជំពាក់​បំណុល​បរទេស ៣,៦​ពាន់​លាន​ដុល្លារ​អាមេរិក​៕​CS

អត្ថបទគួរចាប់អារម្មណ៍