ភ្នំពេញៈ បើតាមទិន្នន័យរបស់អាជ្ញាធរអប្សរាស្តីពីចំនួនភ្ញៀវទេសចរបរទេស ចូលទស្សនាអង្គរវត្ត ហើយដែលត្រូវបានគណនាដោយភ្នំពេញ ប៉ុស្តិ៍ បង្ហាញថា ចំណូលបានពីការលក់សំបុត្រចូលអង្គរវត្តនៅតែខ្ពស់ជាងតួលេខដែល អាជ្ញាធរអប្សរាបានបង្ហាញ។
ការគណនាចំណូលនៅឆ្នាំ២០១២ មានរហូតដល់៥១លានដុល្លារ នៅតែខ្ពស់ជាងទិន្នន័យរបស់រដ្ឋាភិបាលដែលថាមានតែ៣០លានដុល្លារនោះ ខណៈបក្សប្រឆាំងអះអាងថា មានរហូតដល់ជាង១៥០លានដុល្លារក្នុងមួយឆ្នាំ។
លោក ប៊ុន ណារិទ្ធ អគ្គនាយកអាជ្ញាធរអប្សរាបានបញ្ជាក់ប្រាប់ភ្នំពេញ ប៉ុស្តិ៍ កាលពីម្សិលមិញថា ចំណូលពីការលក់សំបុត្រនេះពិតជាមានក្នុងរង្វង់ ៥១ លានដុល្លារក្នុងមួយឆ្នាំ បើសិនជាគណនាទៅតាមទិន្នន័យជាក់ស្តែងពីចំនួនសំបុត្រដែលបានលក់ចេញនិងតម្លៃសំបុត្រ។
លោកបានថ្លែងថា៖ «ប្រសិនបើយើងមើលទិន្នន័យហើយគណនាឲ្យបានត្រឹមត្រូវ ពិតណាស់ចំណូលពីការលក់សំបុត្រហ្នឹងមានប្រហែល ៥១ លានដុល្លារ។ យើងអាចផ្ទៀងផ្ទាត់ចំនួនទេសចរបានជាមួយវិស័យឯកជនដែលធ្វើការក្នុងវិស័យទេសចរណ៍ដូចជាក្រុមហ៊ុនទេសចរណ៍ និងសណ្ឋាគារជាដើម»។
របាយការណ៍ថ្មីមួយដែលចេញផ្សាយនៅថ្ងៃសុក្រសប្តាហ៍មុន ដែលមានហត្ថលេខារបស់លោក ប៊ុន ណារិទ្ធ បានឲ្យដឹងថា ចំនួនភ្ញៀវទេសចរបរទេសដែលចូលមកទស្សនាខេត្តសៀមរាបមានចំនួនសរុបប្រមាណ២លាននាក់ប៉ុន្តែចំនួនភ្ញៀវដែលទិញសំបុត្រមានប្រមាណ១,៨លាននាក់ ដោយទេសចរមួយចំនួនត្រូវបានអនុញ្ញាតឲ្យចូលទស្សនាដោយមិនបង់ប្រាក់។
របាយការណ៍ដដែលបានបង្ហាញថា ចំនួនភ្ញៀវដែលទិញសំបុត្រទស្សនាសម្រាប់មួយថ្ងៃមានចំនួន ៥៩,២ ភាគរយនៃអ្នកចូលទស្សនាសរុប ស្មើ ១ ០៧០ ៧០៤ នាក់ (តាមការគណនារបស់ភ្នំពេញ ប៉ុស្តិ៍)។ ភ្ញៀវដែលទិញសំបុត្រសម្រាប់ទស្សនា ៣ថ្ងៃមានចំនួន ៣៩,៨ ភាគរយ ឬ ស្មើនឹង៧១៩ ៨៣១ នាក់ ខណៈដែលអ្នកទិញសម្រាប់មួយសប្តាហ៍មាន១ភាគរយស្មើនឹង ១៨ ០៨៦ នាក់។
តម្លៃសំបុត្រចូលទស្សនាមួយថ្ងៃគឺ២០ដុល្លារ បីថ្ងៃ ៤០ ដុល្លារ និង មួយសប្តាហ៍៦០ ដុល្លារ។ យោងតាមចំនួនសំបុត្រដែលបានលក់ចេញនិងតម្លៃសំបុត្រនេះប្រាក់ចំណូលអាចមានក្នុងរង្វង់៥១លានដុល្លារពីឆ្នាំ ២០១២។
ការបញ្ចេញរបាយការណ៍នេះជាការឆ្លើយតបនឹងបក្សប្រឆាំងដែល អះអាងថា ចំណូលក្នុងមួយឆ្នាំមានជិត២០០លានដុល្លារ។
លោក កឹម សុខា ប្រធានស្តីទីគណបក្សសង្គ្រោះជាតិថ្លែងថា ចំណូលបានពីសំបុត្រចូលទស្សនាអង្គរមានជិត២០០លានដុល្លារក្នុងមួយឆ្នាំ។
សុខ អាន ឧបនាយករដ្ឋមន្ដ្រី រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី និងជាប្រធានអាជ្ញាធរអប្សារា ថ្លែងក្នុងខួប៥ឆ្នាំនៃការដាក់បញ្ចូលប្រាសាទព្រះវិហារជាសម្បត្តិ បេតិកភណ្ឌពិភពលោកថា ចំណូលបានពីការលក់សំបុត្រចូលទស្សនាអង្គរមានត្រឹមតែ៣០ លានដុល្លារប៉ុណ្ណោះ។
លោក សុន ឆ័យ បេក្ខជនតំណាងរាស្រ្តពីគណបក្សសង្គ្រោះជាតិអះអាងថា ទិន្នន័យនេះជាទិន្នន័យមានការក្លែងបន្លំ ហើយមិនបានឆ្លុះបញ្ចាំងពីតថភាពជាក់ស្តែង។ លោកបានឲ្យដឹងថា ចំនួនភ្ញៀវជាក់ស្តែងដែលចូលទស្សនាអង្គរអាចមានរហូតដល់ជាង២ លាននាក់ ស្របពេលដែលសំបុត្រលក់ចេញសម្រាប់រយៈពេលបីថ្ងៃមានច្រើនជាង។
លោកបន្តថា៖«គេតែងលុបចោលទិន្នន័យភ្ញៀវចូលទស្សនា ដោយលាក់បំបាំងមិនឲ្យយើងដឹងនោះឡើយ។ យើងបានធ្វើការសង្កេតជាច្រើនលើកច្រើនសា ហើយបានរកឃើញថា ភ្ញៀវភាគច្រើនទិញសំបុត្រចូលទស្សនាអង្គរយ៉ាងហោចណាស់បីថ្ងៃ។ ខ្ញុំគិតថា ភ្ញៀវដែលទិញសំបុត្រទស្សនាសម្រាប់មួយថ្ងៃមានតែក្នុងរង្វង់១០ភាគរយប៉ុណ្ណោះនៃអ្នកចូលទស្សនាសរុប»។
លោកអំពាវនាវឲ្យមានការអនុញ្ញាតឲ្យស្ថាប័នស្រាវជ្រាវឯករាជ្យចុះសិក្សាពីចំណូលជាក់ស្តែងដើម្បីពង្រឹងតម្លាភាពនៃការគ្រប់គ្រង និងបង្កើនភាពជឿជាក់ដល់សាធារណជន។
អត្ថបទរបស់ភ្នំពេញ ប៉ុស្តិ៍ ដែលចុះផ្សាយកន្លងមកបង្ហាញថា ចំណូលបានពីការលក់សំបុត្រចូលទស្សនាអង្គរត្រូវបានគ្រប់គ្រងដោយ អាជ្ញាធរអប្សារា និងក្រុមហ៊ុន សុខា ហូតែល របស់លោក សុខ គង់។ ក្នុងនោះចំណូល ៣ លានដំបូងត្រូវបែងចែងស្មើគ្នារវាងភាគី ទំាងពីរ។ ចំណូលដែលនៅសល់ត្រូវបានបែងចែកដូចខាងក្រោម ១៥ ភាគរយសម្រាប់អភិវឌ្ឍតំបន់អង្គរ៦៨ភាគរយ បែកចែកទៅឲ្យអាជ្ញាធរអប្សរា ខណៈដែលចំនួន១៧ ភាគរយត្រូវបែងចែកទៅឲ្យក្រុមហ៊ុន សុខា ហូតែល៕
