The Phnom Penh Post Search

Search form




Logo of Phnom Penh Post newspaper Phnom Penh Post - ចំណូល​ពី​វិស័យ​ទេសចរណ៍​នៅ​បី​ខែ​ទទួល​បាន​ជាង​$៧០០​លាន

ចំណូល​ពី​វិស័យ​ទេសចរណ៍​នៅ​បី​ខែ​ទទួល​បាន​ជាង​$៧០០​លាន

ចំណូល​ពី​វិស័យ​ទេសចរណ៍​នៅ​បី​ខែ​ទទួល​បាន​ជាង​$៧០០​លាន

ភ្នំពេញៈ កម្ពុជា​រក​ចំណូល​បាន​ជាង​៧០០​លាន​ដុល្លារ​ពីវិ​ស័យ​ទេសចរណ៍​ក្នុង​រយៈពេល​បី​ខែ​ដំបូង​ឆ្នាំ​២០១៤ ខណៈ​ចំនួន​ភ្ញៀវទេសចរ​អន្តរជាតិ​ចូល​មក​ទស្សនា​កម្ពុជា​សរុប​នៅ​ត្រីមាស​ទី​១ ឆ្នាំ​នេះ កើន​ជិត​៩​ភាគរយ​។

យោងតាម​តួលេខ​ពី​ក្រសួង ទេសចរណ៍​ចេញ​ផ្សាយ​កាលពី​ម្សិលមិញ បាន​បង្ហាញ​ថា មាន​ភ្ញៀវ​ចំនួន​១,២ លាន​នាក់ ក្នុង​រយៈពេល​នេះ​ដែល​កើនឡើង​៨,២​ភាគរយ​បើ​ធៀប​នឹង​រយៈពេល​ដូច​គ្នា​កាលពី​ឆ្នាំ​មុន​។

លោក ថោង ខុន រដ្ឋមន្ត្រី​ក្រសួង​ទេសចរណ៍​ឲ្យ​ដឹង​ថា កម្ពុជា​រក​ចំណូល​ពី​វិស័យ​ទេសចរណ៍​បាន​ប្រមាណ​ជាង​៧០០ លាន​ដុល្លារ​ក្នុង​រយៈ​៣​ខែ​ដំបូង​ឆ្នាំ​នេះ​។

លោក​បន្ត​ថា ក្នុង​ចំណោម​ភ្ញៀវ​អន្តរជាតិ​សរុប ភ្ញៀវ​ជនជាតិ​វៀតណាម​នៅ​តែ​ឈរ​នៅ​លេខរៀង​ទី​១ ចិន​ឈរ​នៅ​លេខរៀង​ទី​២ កូរ៉េ​ខាង​ត្បូង​ឈរ​នៅ​លេខរៀង​ទី​៣ ឡាវ​ឈរ​នៅ​លេខរៀង​ទី​៤ និង​ជប៉ុន​នៅ​លេខរៀង​ទី​៥ ខណៈ​ភ្ញៀវ​ថៃ​ថយ​ចុះ​៩,២​ភាគរយ​។ លោក​បន្ថែម​ថា តួលេខ​ដែល​កើនឡើង​នេះ​គឺ​សមស្រប​តាម​ការ​ព្យាករ​ដែល​ថា ភ្ញៀវ​អន្តរជាតិ​មក​ទស្សនា​កម្ពុជា​នឹង​កើន​រហូត​ដល់​៤,៧ លាន​នាក់​នៅ​ក្នុង​ឆ្នាំ​នេះ។

លោក​មាន​ប្រសាសន៍​ថា៖ «​៨,២ ភាគរយ​មិនមែន​ជា​កំណើន​តិច​នោះ​ទេ​។ នៅ​ត្រីមាស​ទី​មួយ​យើង​បាន​១,២​លាន​នាក់​។ នៅ​៣​ត្រីមាស​ទៀត យើង​អាច​ឃើញ​ចំនួន​ហើយ​។ ភ្ញៀវ​នឹង​ចាប់ផ្តើម​មក​ច្រើន​នៅក្នុង​ខែ​តុលា»​។

លោក បន្ថែម​ថា ចំនួន​ភ្ញៀវ​ដែល​កើនឡើង​នេះ​គឺ​ដោយសារ​តែ​សេដ្ឋកិច្ច​នៅ​ប្រទេស​ក្នុង តំបន់​អាស៊ី​ប៉ាស៊ីហ្វិក ដែល​ជា​ប្រភព​ភ្ញៀវ​អន្តរជាតិ​មក​ទស្សនា​កម្ពុជា មាន​ស្ថានភាព​ល្អ ដែល​ជំរុញ​ឲ្យ​ប្រជាជន​នៅ​ប្រទេស​ទាំងនោះ​ធ្វើ​ដំណើរ​កម្សាន្ត​។

លោក​ថ្លែង​ថា​៖ «​ស្ទើរតែ​៧៥​ភាគរយ​នៃ​ភ្ញៀវបរទេស​សរុប​គឺ​មកពី​ប្រទេស​ស្ថិតនៅ​តំបន់​អាស៊ីប៉ាស៊ីហ្វិក​ដែល​មាន​ដូចជា ចិន កូរ៉េ និង​ជប៉ុន​ជាដើម ហើយ​ស្ថានភាព​សេដ្ឋកិច្ច​នៅ​ទី​នោះ​មាន​សភាព​ប្រសើរ អ៊ីចឹង​គេ​ដើរ​កម្សាន្ត​ច្រើន ហើយ​ពេល​គេ​មក​ទេសចរ​ក្នុង​តំបន់​អាស៊ាន គេ​នឹង​ទស្សនា​២​ទៅ​៣​ប្រទេស ហើយ​កម្ពុជា​ជា​កន្លែង​ដែល​គេ​មិន​អាច​រំលង​បាន​»។

លោក អាង គឹមអៀង ប្រធាន​សមាគម​ទីភ្នាក់ងារ​ទេសចរណ៍​កម្ពុជា​ឲ្យ​ដឹង​ថា លោក​មាន​សុទិដ្ឋិនិយម​ចំពោះ​កំណើន​ភ្ញៀវ​ទស្សនាក​ម្ពុជា​ក្នុង​ខែ​បន្ទាប់ៗ​នៅ​ឆ្នាំ​នេះ ប៉ុន្តែ​ថា ដើម្បី​រក្សា​កំណើន​ភ្ញៀវ កម្ពុជា​ត្រូវការ​ធ្វើឲ្យ​ប្រសើរ​ឡើង​នូវ​ហេដ្ឋារចនាសម្ព័ន្ធ​ដែល​មាន គុណភាព និង​បន្ត​ពង្រឹង​ធនធាន​មនុស្ស​នៅក្នុង​វិស័យ​នោះ​ផង​ដែរ។

លោក​និយាយ​ថា៖ «យើង​ត្រូវការ ហេដ្ឋារចនាសម្ព័ន្ធ​ដែល​មាន​គុណភាព ក្នុង​នោះ​មាន​ដូចជា ស្ពាន ផ្លូវជាតិ និង​ផ្លូវតូចៗ​ដែល​តភ្ជាប់​ទៅ​កាន់​រមណីយដ្ឋាន​នានា​ដែល​នៅ​ឆ្ងាយៗ»​។

លោក​បន្ត​ថា៖ «ជាមួយ​គ្នា​នោះ​ដែរ បុគ្គលិក​ដែល​ធ្វើការ​ក្នុង​វិស័យ​នេះ គួរ​តែ​មាន​ការ​បណ្តុះបណ្តាល​ពី​វិស័យ​ទេសចរណ៍ និង​បដិសណ្ឋារកិច្ច»​។

លោក​បន្ថែម​ថា ក្រៅពី​ក្រសួង​ទេសចរណ៍ និង​អ្នក​នៅក្នុង​វិស័យ​ឯកជន​ផ្នែក​ទេសចរណ៍​នេះ អាជ្ញាធរ​ពាក់ព័ន្ធ ក៏​គួរ​តែ​រួម​ចំណែក​ជំរុញ​វិស័យ​ទេសចរណ៍​ផង​ដែរ​។ លោក​ថ្លែង​បន្ត​ថា៖​«អាជ្ញាធរ​ពាក់ព័ន្ធ គួរតែ​យល់ដឹង​ពី​វិស័យ​ទេសចរណ៍​ដែរ​ព្រោះ​វា​ជា​ផ្នែក​មួយ​នៃ​បដិសណ្ឋារកិច្ច​»៕

អត្ថបទគួរចាប់អារម្មណ៍