The Phnom Penh Post Search

Search form




Logo of Phnom Penh Post newspaper Phnom Penh Post - ចំណូល​លក់​សំបុត្រ​ចូល អង្គរវត្ត កើន​ឡើង ១៤%

ចំណូល​លក់​សំបុត្រ​ចូល អង្គរវត្ត កើន​ឡើង ១៤%

ចំណូល​លក់​សំបុត្រ​ចូល អង្គរវត្ត កើន​ឡើង ១៤%

131022_11
ភ្ញៀវទេសចរជាតិ និងអន្តរជាតិដែលមកទស្សនាប្រាសាទអង្គរវត្តកាលពីខែមុន ចំណូលបានពីការលក់សំបុត្រក្នុងរយៈពេល៩ខែកើនឡើង១៤ភាគរយ ហេង ជីវ័ន

សៀមរាបៈ ទិន្នន័យ​ពី​អាជ្ញាធរ​អប្សរា​បាន​បង្ហាញ​ថា ប្រាក់ ចំណូល​បាន​ពី​ការ​លក់​សំបុត្រ​ឲ្យ​ភ្ញៀវ​ទេសចរ​បរទេស​ចូល​ទស្សនា​ប្រាសាទ អង្គរ​វត្ត ក្នុង​រយៈ​ពេល ៩ ខែ​ឆ្នាំ​នេះ​កើន​ឡើង ១៤ ភាគរយ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​ទៅ។

ទិន្នន័យ​បង្ហាញ​ថា ក្នុង​រយៈ​ពេល ៩ ខែ​ដំបូង​ឆ្នាំ​នេះ​ចំណូល​បាន​ពី​ការ​លក់​សំបុត្រ​មាន​ចំនួន ៤១,៤ លាន​ដុល្លារ។

លោក ប៊ុន ណារិទ្ធ អគ្គ​នាយក​អាជ្ញាធរ​អប្សរា​បាន​ប្រាប់ ភ្នំពេញ ប៉ុស្ដិ៍ នៅ​ថ្ងៃ​ចន្ទ​ថា ការ​កើន​ឡើង​នេះ​កំពុង​ឆ្លុះ​បញ្ចាំង​ពី​កំណើន​ភ្ញៀវ​ទេសចរ​បរទេស។ ប៉ុន្តែ​អត្រា​នេះ គឺ​ទាប​ជាង​បន្តិច​ធៀប​នឹង​រយៈ​ពេល​ដូច​គ្នា​ពី​បី​ឆ្នាំ​មុន​។

លោក​បន្ត​ថា៖ «យើង​នៅ​តែ​មើល​ឃើញ​ថា​ចំនួន​ភ្ញៀវ​ទេសចរ​បរទេស​គឺ​នៅ​តែ​ចង់​មក​ទស្សនា ប្រទេស​យើង ប៉ុន្តែ​កំណើន​ប្រាក់​ចំណូល​គឺ​ទាប​ជាង​រយៈ​ពេល​ផ្សេង​ទៀត​ដោយ​សារ​តែ​ភ្លៀង​ឆាប់​ធ្លាក់។ យើង​មិន​អាច​ព្យាករ​ថា​ចំនួន​នេះ​នឹង​កាន់​តែ​ចុះ​ទាប​សម្រាប់​ឆ្នាំ​នេះ​ទេ​ដោយសារ​យើង​សង្ឃឹម​ថា​ចំនួន​នេះ​នឹង​កាន់​តែ​ប្រសើរ​ឡើង​ក្នុង​អំឡុង​រដូវ​ភ្ញៀវ​ទេសចរ​កើន​ឡើង​ខ្លាំង​បំផុត​នៅ​ខែ វិច្ឆិកា និង​ខែ ធ្នូ ដោយ​សារ​ការ​មក​ដល់​របស់​ភ្ញៀវ​ទេសចរ​កាន់​តែ​ច្រើន​ឡើងៗ»។

លោក យឹម សុវណ្ណ អ្នក​នាំ​ពាក្យ​មក​ពី​គណបក្ស​សង្គ្រោះ​ជាតិ​បាន​អះអាង​ថា​ចំនួន​ប្រាក់ ចំណូល​ដែល​ប្រមូល​បាន​នេះ​គឺ​ទាប​បើ​ប្រៀប​ធៀប​នឹង​ចំនួន​ពិត​ប្រាកដ។ លោក​បាន​បន្ត​ថា៖ «ប្រសិន​បើ​អ្នក​សម្លឹង​មើល​ទៅ​ចំនួន​ភ្ញៀវ​ទេសចរ​មក​ទស្សនា​ប្រាសាទ​នេះ​ក្នុង​មួយ​ឆ្នាំៗ​មាន​ប្រហែល​ពី ២ ទៅ ៣ លាន​នាក់ យើង​អាច​ប្រមូល​បាន​យ៉ាង​ហោច​ណាស់​ក៏ ១០០ លាន​ដុល្លារ​អាមេរិក​ក្នុង​មួយ​ឆ្នាំៗ»។

លោក​និយាយ​ថា៖ «ខ្ញុំ​កំពុង​ឆ្ងល់​ថា ហេតុ​អ្វី​បាន​ជា​រដ្ឋាភិបាល​មិន​ចង់​បង្កើត​យន្តការ​ដើម្បី​ប្រមូល​ប្រាក់​ចំណូល​ឲ្យ​បាន​ត្រឹម​ត្រូវ​ដោយ​ខ្លួន​ឯង? ហេតុអ្វី​ក៏​ឲ្យ​ក្រុមហ៊ុន​ឯកជន​ជា​អ្នក​ប្រមូល​ទៅ​វិញ? យើង​ទទួល​បាន​ប្រាក់​យ៉ាង​ងាយ​ស្រួល​ក្នុង​ការ​អភិវឌ្ឍ​ប្រទេស»។

លោក​បាន​និយាយ​ថា ជា​ធម្មតា​ភ្ញៀវ​ទេសចរ​ចំណាយ​ប្រាក់ ៤០ ដុល្លារ​រយៈ​ពេល ៣ ថ្ងៃ​ជា​ជាង​រយៈ​ពេល​មួយ​ថ្ងៃ​ក្នុង​ការ​ទស្សនា​ប្រាសាទ អង្គរ។

ភ្ញៀវ​ទេសចរ​បរទេស​ចំណាយ ២០ ដុល្លារ​អាមេរិក​ដើម្បី​ទស្សនា​ប្រាសាទ​រយៈ​ពេល​មួយ​ថ្ងៃ ៤០ ដុល្លារ​អាមេរិក​សម្រាប់​រយៈ​ពេល ៣ ថ្ងៃ និង ៦០ ដុល្លារ​អាមេរិក​សម្រាប់​ការ​ទស្សនា​មាន​រយៈ​ពេល​មួយ​សប្ដាហ៍។ ប្រាក់​ចំណូល​សរុប​បាន​ពី​ការ​លក់​សំបុត្រ​កាល​ពី​ឆ្នាំ​ទៅ​មាន​ប្រហែល ៥១ លាន​ដុល្លារ​អាមេរិក។

ទិន្នន័យ​បាន​ពី​អាជ្ញាធរ​អប្សរា​បាន​បង្ហាញ​ថា ភ្ញៀវ​ទេសចរ​បរទេស​ប្រហែល ១ ៤៦២ ១៨២ នាក់​បាន​ទស្សនា​ប្រាសាទ អង្គរវត្ត ក្នុង​អំឡុង​រយៈ​ពេល​នេះ​ដែល​បាន​កើន​ឡើង ១៣ ភាគរយ។

ទិន្នន័យ​ខេត្ត សៀមរាប បាន​បង្ហាញ​ថា ខេត្ត​នេះ​បាន​ទាក់​ទាញ​ភ្ញៀវ​ទេសចរ​បរទេស​ចំនួន​ជាង ១,៥៧៣ លាន​នាក់​ក្នុង​រយៈ​ពេល​នេះ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​ទៅ គឺ​កើន​ឡើង ៥,៨៣ ភាគរយ។ នៅ​ក្នុង​ចំនួន​នេះ​ភ្ញៀវ​ទេសចរ​កូរ៉េ​ជាប់​ចំណាត់​ថ្នាក់​លេខ ១ មាន​ចំនួន ២៥៩ ៦២៧ នាក់​បាន​កើន​ឡើង​ប្រហែល ៣ ភាគរយ បន្ទាប់​មក​គឺ​ភ្ញៀវ​ទេសចរ​ចិន​បាន​កើន​ឡើង ៦០,០៣ ភាគរយ​មាន​ចំនួន ២០០ ៩៧៥ នាក់ ភ្ញៀវ​ទេសចរ វៀតណាម​មាន​ចំនួន ២៥៩ ៦២៧ នាក់​បាន​កើន​ឡើង ៣០,២៤ ភាគរយ​ភ្ញៀវ​ទេសចរ​មក​ពី​ជប៉ុន​បាន​កើន​ឡើង ១១,០៥ ភាគរយ​មាន​ចំនួន ១០៨ ៣៤៣ នាក់​និង​ភ្ញៀវ​ទេសចរ​ថៃ​មាន​ចំនួន ៨១ ០៦៦ បាន​ធ្លាក់​ចុះ ៥,០៣ ភាគរយ។

លោក ប៊ុន ណារិទ្ធ បាន​និយាយ​ថា ជា​ធម្មតា​ប្រាក់​ចំណូល​បាន​កើន​ឡើង​ជាង ២០ ភាគរយ​ជា​រៀង​រាល់​ឆ្នាំ​ផ្អែក លើ​ការ​មក​ដល់​របស់​ភ្ញៀវ​ទេសចរ​បរទេស។

រដ្ឋាភិបាល​បាន​ប្រគល់​សិទ្ធិ​លក់​សំបុត្រ​ទៅ​ឲ្យ​ក្រុមហ៊ុន សូគីម៉ិច របស់​លោក សុខ គង់ កាល​ពី​ឆ្នាំ ១៩៩៩។ ស្ថិត​ក្រោម​កិច្ច​ព្រម​ព្រៀង​នេះ​ក្រុមហ៊ុន សូគីម៉ិច យល់​ព្រម​ប្រគល់​ប្រាក់​ចំណូល ៥០ ភាគរយ​ប្រសិន​បើ​ការ​លក់​សំបុត្រ​នៅ​សួន​អង្គរ​ទាប​ជាង ៣ លាន​ដុល្លារ និង ៧០ ភាគរយ​ប្រសិន​បើ​ការ​លក់​សំបុត្រ​លើស​ពី ៣ លាន​ដុល្លារ៕ PB

អត្ថបទគួរចាប់អារម្មណ៍