ភ្នំពេញៈ តំបន់សេដ្ឋកិច្ចពិសេសភ្នំពេញ (PPSP) ដែលចុះបញ្ជីក្នុងផ្សារហ៊ុនកម្ពុជា បានរាយការណ៍ពីកំណើនប្រាក់ចំណូលដ៏រឹងមាំនៅត្រីមាសទី ៣ ឆ្នាំនេះ ធៀបនឹងរយៈពេលដូចគ្នាកាលឆ្នាំទៅ ដែលគាំទ្រដោយប្រាក់ចំណូលពីការលក់ដី។
យោងតាមសេចក្ដីប្រកាសព័ត៌មានរបស់ PPSP ស្តីពីរបាយការណ៍ហិរញ្ញវត្ថុ ដែលបានផ្ញើទៅផ្សារមូលបត្រកម្ពុជា (CSX) កាលពីសប្ដាហ៍មុន ប្រាក់ចំណូលសរុបរបស់ PPSP បានកើនឡើង ៤៦,៩៦ ភាគរយ ដែលទទួលបានជាង ២ លានដុល្លារនៅត្រីមាសទី ៣ ឆ្នាំនេះ ធៀបនឹង ១,៤ លានដុល្លារ នៅត្រីមាសទី ៣ ឆ្នាំ ២០១៨។
ក្រុមហ៊ុនបានឲ្យដឹងនៅក្នុងរបាយការណ៍ថា ការកើនឡើងប្រាក់ចំណូលសរុបភាគច្រើនជំរុញដោយការកើនឡើងដ៏ធំក្នុងការលក់ដីនៅត្រីមាសនេះ។ ប៉ុន្តែយោងតាមរបាយការណ៍នេះ ក្រុមហ៊ុនបានរាយការណ៍ការខាតបង់ប្រាក់ចំណេញ ៣០,៤៩ ភាគរយ ដែលទទួលបាន ៧៦២ ៦៦៥ ដុល្លារ ធៀបនឹង ១,១ លានដុល្លារកាលពីត្រីមាសទី ៣ ឆ្នាំមុន។
លោកស្រី គីម សុផានីតា ប្រធានស្តីទីនាយកដ្ឋានប្រតិបត្តិការទីផ្សារ CSX បានប្រាប់ភ្នំពេញប៉ុស្ដិ៍ថា ការធ្លាក់ចុះប្រាក់ចំណេញនេះ មិនប៉ះពាល់ដល់ប្រតិបត្តិការជារួមរបស់ក្រុមហ៊ុននេះទេដោយសារតែវាគ្រាន់តែជារយៈពេលមួយប៉ុណ្ណោះ ខណៈតួនាទីអាជីវកម្មរបស់ក្រុមហ៊ុននេះនៅតែរឹងមាំ។
លោកស្រីថ្លែងថា៖ «ខ្ញុំគិតថា ក្រុមវិនិយោគិននឹងពិនិត្យដោយស៊ីជម្រៅលើព័ត៌មានលម្អិត នៅពេលនិយាយពីការវាយតម្លៃអាជីវកម្ម និងមិនមែនគ្រាន់តែមួយពេលនោះទេ»។
លោកស្រីបន្តថា ប្រតិបត្តិការត្រីមាសទី ៣ របស់ PPSP មិនល្អនោះទេ ដែលបង្ហាញការធ្លាក់ចុះប្រាក់ចំណេញ ៣០ ភាគរយ ទោះបីជាប្រាក់ចំណូលកើនឡើង ៤៧ ភាគរយក៏ដោយ។
លោកស្រីបន្ថែមថា៖ «ប៉ុន្តែប្រសិនបើយើងពិនិត្យមើលប្រតិបត្តិការរយៈពេល ៩ ខែនេះ PPSP ទទួលបានប្រាក់ចំណេញចំនួនច្រើន ៣៥ ២៨១ ៨៩៨ ០០០ រៀល ឬប្រហែល ៨ ៦១៥ ៨៤៨ ដុល្លារ ខណៈក្នុងរយៈពេលដូចគ្នាកាលពីឆ្នាំមុន ក្រុមហ៊ុននេះបានខាតបង់ ២ ២០៨ ៩៥០ ដុល្លារ។ ខ្ញុំគិតថា វានៅតែបង្ហាញចក្ខុវិស័យវិជ្ជមានសម្រាប់ប្រតិបត្តិការពេញ ១ ឆ្នាំ ដោយសារតែប្រតិបត្តិការដ៏រឹងមាំរបស់ខ្លួននៅត្រីមាសទី ១ និងត្រីមាសទី ២»។
PPSEZ បានក្លាយជាក្រុមហ៊ុនចុះបញ្ជីទី ៤ នៅលើ CSX កាលពីខែឧសភា ឆ្នាំ ២០១៦។ ក្រុមហ៊ុននេះបានឲ្យដឹងថាខ្លួននឹងប្រើប្រាស់ទឹកប្រាក់នេះ ដើម្បីគាំទ្រដល់ការពង្រីកអាជីវកម្ម ឱកាសអភិវឌ្ឍអាជីវកម្មថ្មី និងសម្រាប់គោលបំណងសាជីវកម្មទូទៅ៕LA